Ligüerre d'a Cinca

De Biquipedia
Ir ta: navego, busca
Iste articlo tracta sobre Ligüerre d'a Cinca. Ta atros emplegos d'o toponimo «Ligüerre» se veiga Ligüerre (desambigación).
Ligüerre
Localidat d'Aragón
089.Ligüerre de Cinca.jpg
Entidat
 • País
 • Provincia
 • Comarca
 • Municipio
Lugar
Flag of Aragon.svg Aragón
Flag of Huesca (province).svg Uesca
Sobrarbe
L'Abizanda
Población
 • Total

5 hab. (2010)
Altaria 483 m.
Distancia
 • 94 km
 • 8 km
 • 20 km

enta Uesca
enta L'Abizanda
enta l'Aínsa
Codigo postal 22393
Patrons Santa María de l'Asumpción
Parroquial
 • Diocesi
 •Arciprestato
 • Parroquia

Balbastro-Monzón
Sobrarbe
Artasona
Ríos Cinca y Susía
Ligüerre en Aragón
Ligüerre
Ligüerre
Situación de Ligüerre en Aragón
www.LigüerreDeCinca.com

Ligüerre d'a Cinca u Ligüerre de Cinca[1] (oficialment, en castellano, «Ligüerre de Cinca»[2][3]) ye un lugar aragonés d'o municipio de l'Abizanda, en a provincia de Uesca y a comarca de Sobrarbe. A suya población ye de 5 habitants (2010[3]).

Ligüerre fue a capital d'un municipio[4] que l'incluiba a ell y a la suya aldeya, o Mesón de Ligüerre, dende os primers censos modernos de 1834 dica l'absorción en l'achuntamiento de l'Abizanda, en o periodo d'entre censos 1842-1857.[2]

Cheografía[editar | editar código]

Ligüerre se troba en un plano a meya altaria, con forma de falca apuntada cara ta'l sud, que sinyorea por un costau o río Cinca, y por l'altro lo río Susía que va a desembocar-se en o primero chusto en sud de lugar. Por o canto d'o Norte i tiene as garras de o tozal de Sant Mitier, que en l'altura tiene o conoixiu castiello de Sant Mitier, y que delimita la man occidental de o congosto de l'Entremont.

Se i arriba por un camal d'a carretera local que, en naixendo de l'autonomica A-138 en o Mesón de Ligüerre (km 28), trescruza o río Cinca por o puent de l'Entremont y s'adintra en a Fueva por Palo. Por ixo, cal desbarrar-se d'a carretera principal en o Mesón, y a bells 1.100 metros se troba a dentrada ta Ligüerre. A carretereta d'acceso se reacondicionó en l'anyo 2010, enamplando-se a calzada con un carril lateral en o punto d'unión a l'A-138, ta fer más fácils as incorporacions de vehiclos y reducir-ie a sinistralidat.

Por a cara este, o lugar s'aposienta sobre una espuenda que posiblement lo defensaba contra eventuals ataques que puyasen dende a glera d'a Cinca. As casas más antigas de Ligüerre, como as fortificadas de O Palacio d'os barons de Latrás y a casa Sabastián (d'os sieglos XV y XVI) son significativament mesas en a ladera d'ixa ripa. Historicament, antes que se construise o pantano de Lo Grau, i heba en a baixant por alto d'o río Cinca un paso de sirga ta cruzar ta la man cuentra.[4] As restas d'aquella estructura encara son visibles quan baixa o nivel d'o pantano.[4]

As poblacions más aman de Ligüerre son Sant Mitier, a pocos kilometros en norte, y Lamata, Escaniella y l'Abizanda en ueste, sud-ueste y sud, respectivament, en o que ye a cuentra d'o río Susía. En a cuentra de l'altro río de Ligüerre, a Cinca, se troba os lugars de Trillo y, un poquet más luent, Troncedo, totz dos en dirección este-nordeste en as baixants de a sierra de Torón (chusto adebant de Ligüerre ye a on i desemboca o barranco d'o Salinar). L'aldeya de Caneto ye adebant de Ligüerre, a l'altro costau de a Cinca, anque poco visible por ser-ie alto en un sarrato en a sierra de Torón; y Clamosa y a Peniella son auguas t'abaixo en sud-sudeste, tamién en a cuentra de o río.

Viello Sobrarbe[editar | editar código]

A ilesia de l'Asumpción, antiga parroquial de Ligüerre.

Seguntes una información obtenida con enqüestas por Chabier Tomás en a segunda metat de a decada de 1990, realizadas en o marco d'o suyo estudeo dialectolochico sobre l'aragonés d'o Viello Sobrarbe, o limite oriental de o que a mayoría d'os pobladors d'a redolada consideran «Viello Sobrarbe» remata en a Cinca,[1] por o que Ligüerre y totz os lugars que se troba en a ribera d'o río pero en a man dreita encara farían parte, d'alcuerdo con a opinión mayoritaria replegada por Tomás, de o Viello Sobrarbe.[1] Ista afirmación puede estar controvertida, pos d'alcuerdo con a consideración mayoritaria d'entre os habitants de bells lugars aludidos, como Mediano, Sant Mitier, Plampalacios u Camporretuno, o «Viello Sobrarbe» ye una denominación con a que ellos designan as aldeyas y pardinas que se troba en «os sarratos» en a valle d'a Susía y más ta l'ueste, pero no pas os que se troba en a fondonada d'o río Cinca, que ye una zona que ellos, por motivos d'importancia demografica y social, a designan como «Ribera de Mediano». En relación con isto, a pertinenza de Ligüerre a o Viello Sobrarbe u a la Ribera de Mediano ye dificil de definir.

Estructura urbana[editar | editar código]

Tradicionalment, os casars de Ligüerre feban un entarabidau de carreras arrodeyau de casas por o perimetro exterior y con pocas dentradas ta l'interior, de forma que o lugar tenese una forma facilment defensable. Iste tipo d'estructuras, en chunto con que o lugar sía situau en alto d'una espuenda que o guarda relativament por a man oriental, son caracteristicas d'una plantificación defensiva, que ye cosa regular en os nuclios viellos de qualques sieglos en tot l'Alto Aragón.

Antes de a suya reforma, posterior a la cesión que en fizo la Confederación Hidrografica de l'Ebro a o sindicato UGT, en 1986, Ligüerre no teneba sique una plaza, situada en o extremo oriental de lugar, adebant de o palacio de Latrás. L'altra plaza que se troba en l'actualidat ye o producto de que se'n tirás as casas Lorient y casa Teixidor por trobar-se masiau malmesas en o momento d'iniciar-se as obras de restauración.[5]

A frontera de casa Sabastián, con un blasón enclastau.

A ilesia, antiga parroquial consagrada a l'advocación de l'Asumpción de Santa María, que data d'o sieglo XVI, actualment concabe una sala de reunions. L'abadía tiene una balconera con zelosías de madera que mira ta difuera de lugar.

A estructura cheneral de lugar ye modificada con a restauración. Bellas casas nobles que i heba s'han reconvertidas en hotels, como casa Broto (26 habitacions;[5] totalment remodelada por adintro y con un anacronico ascensor exterior, por a frontera) y casa Sabastián (s. XVI; 12 habitacions;[5] con una restauración más respectuosa con a distribución orichinal[5]). As casas menors de lugar y as que por construcción compartiban paretz meyanils se reconvirtión en apartamentos que se gosa logar de temporadas.[5]

Historia[editar | editar código]

Ligüerre ye un poblau d'oríchens medievals, y s'ha puesto documentar a suya mención en dos textos d'o sieglo XI: la uno de l'anyo 1069 y l'altro de 1076,[4] en os que se fa referencia a un castiello u fortificación (actualment desapareixida) que i habría habiu. En a redolada i ha en l'actualidat tres ermitas. A de Sant Salvador, que data de o sieglo XII[6] y ye en as garras d'o Tozal Corona, ye a candidata a haber estau más amanada a l'emplazamiento de l'antigo castiello. O nombre con o que gosa amaneixer Ligüerre d'a Cinca en totz os documentos anteriors a 1700 ye «Ligüerri».[4]

En 1380, o infant Chuan le'n cedió en sinyoría a Rodrigo de Mur,[4] o primer barón de Monclús, anque a pertenenza a ixa sinyoría no debió d'estar constant en os sieglos porque se'n sabe que, en 1610, Ligüerre yera sinyoría de Chuan de Latrás, sinyor de Latrás, y posible que estás familia de Lupercio Latrás. A tradición local diz que a propia mai de Lupercio Latrás, María de Mur, yera natural de Ligüerre y posible descendient en o linache d'os barons de Monclús.[7]

O Palacio.

A casa o Palacio, principal en a población, se troba en l'extrimo oriental de lugar, aman de a espuenda que sinyorea sobre a Cinca, y pareix que habría estau a residencia d'os sinyors de Ligüerre en belaltro tiempo. Ye un edificio baixomeyeval, de o que se deduce a suya correlación con a sinyoría noble sobre Ligüerre, y tiene una firme torraza defensiva en o costau oriental, por a on que enantes i heba la sola dentrada ta lugar que i heba por o costau de a ribera d'a Cinca. A torre se piensa que no ye más antiga que d'o sieglo XVI.[4]

O pantano[editar | editar código]

Tradicionalment, Ligüerre teneba una economía de base agraria y ganadera, como corresponde con a mayoría d'os lugars y pardinas en a comarca d'o Sobrarbe. Dende os inicios d'o sieglo XX se prochectón dos grans renclusas en o corso d'o río Cinca en os arredols de Ligüerre, la una a una miqueta más d'un kilometro auguas t'alto, en o congosto de l'Entremont, que ye l'actual renclusa de Mediano (que inicialment no habría d'afectar a Ligüerre) y unaltra bells kilometros más t'abaixo, en lo Grau, que ye l'actual embalse de lo Grau.

A coda d'o pantano de o Grau, que arriba dica l'Entremont, vista dende Ligüerre.

O pantano de lo Grau suposó una crisi demografica ta totz os lugars que teneban cultura en a ribera d'a Cinca, y dende que se fizo publico l'alcance de a lamina final d'augua, a Confederación Hidrografica de l'Ebro s'expropió os terrenos y casas de Ligüerre, o Mesón de Ligüerre, Mipanas, a Peniella, Clamosa, Pui de Cinca y belaltros nuclios más, tot pagando-los a chustiprecio, o que suposó a surtida forzosa de bellas dotzenas de familias en a redolada. Ligüerre, que heba gosau tener más de 70 habitants d'antes de os prochectos hidraulicos, se quedó despoblau enantes de 1969, que ye quan s'inauguró lo Grau.

A despoblación de Ligüerre, que duró más de vinticinco anyadas, se cobró a caida de qualques casas (como casa Teixidor), lur estructuras no pudon aguantar a falta total de mantenimiento.

Centro vacacional[editar | editar código]

Cartel d'a UGT d'Aragón, en o Mesón de Ligüerre.

En l'actualidat y dende 1986, Ligüerre fa parte d'un complexo d'ocio vacacional que forman o cámping y as instalacions d'o Mesón de Ligüerre, y o conchunto urbano de lugar.

O 6 de febrero de 1986,[8] o sindicato Unión General de Trabajadores (UGT) arribó a un alcuerdo con a Confederación Hidrografica de l'Ebro ta que les cedesen Ligüerre y o Mesón, con os que prochectaban fer o centro vacacional.

As obras de reconstrucción y adaptación comenzón en 1989 con as casas de o Mesón,[8] que en estando más amanau d'a carretera A-138, que une Balbastro con l'Aínsa, yera más accesible. O 20 d'abril de 1991 s'inauguró a parte toristica de o Mesón de Ligüerre, con l'albergue, o cámping y bellas instalacions,[8] en estando as primeras de o conchunto que dentrón en funcionamiento. O Palacio de Ligüerre fue a primer obra que s'emprendió en a población, anque a resta d'edificios encara yeran por restaurar-se.

A restauración de Ligüerre se fizo de forma paulatina, d'entre 1991 y 2009, anyada en a que s'inauguró a plaza nueva y l'hotel de Casa Sabastián. Os diferents edificios, especialment os d'alpartamentos, se fuen metendo en funcionamiento de forma progresiva, mientres en as temporadas baixas proseguiban as fayenas de restauración. En l'actualidat, encara se i fa obras ta meter en funcionamiento nuevas infrastructuras.

Manimenos, a rehabilitación y puesta en expleitación de o nuclio descartó ta cutio la posibilidat de reversión d'as propiedatz inmuebles ta os suyos amos orichinals. Debant de l'inicio d'as obras, bells antigos vecinos de a localidat, que en ixas envueltas viviban en belaltros nuclios d'a redolada, manifestón en bellas ocasions o suyo desalcuerdo con a cesión d'os terrenos y edificios ta fer-ie o centro vacacional, anque por diferents motivos nunca no se formó garra asociación con obchectivo de contraposar-se a o prochecto.

A la contra de como Moriello de Tou, que o chestiona una interpresa privada,[9] Ligüerre ye chestionau por una fundación sin animo de lucro, a Fundación Ligüerre de Cinca[8] fundada por melitants d'a UGT.

Demografía[editar | editar código]

Evolución demografica
1992 1994 1996 1997 1998 1999 2000 2001 2002
- - - - - - 0 2 6
2003 2004 2005 2006 2007 2008 2009 2010 2011
5 8 6 5 6 7 7 5 -
2012 2013 2014 2015 2016 2017 2018 2019 -
- - - - - - - - -
1990- : población de dreito.
Fuent: Intercensal en l'INE, Series de población en l'INE y Relación d'unidatz poblacionals en l'INE.

Imáchens[editar | editar código]

Toponimia[editar | editar código]

O nombre «Ligüerre», que en quasi totz os documentos anteriors a o sieglo XVIII amaneix como «Ligüerri»,[4][5] diz que dimana de dos radices vasconas: iri + gorri, que significaría «lugar royo», en alusión a l'archila y belaltros materials sedimentarios que abunda en a redolada, de colors royiscas, y que podrían haber feito parte d'as construccions dende bien antigo, en forma de buro.[1]

Respectibe a la denominación actual, Chabier Tomás no trobó sique a forma «Ligüerre de Cinca», sin articlo, quan estudeó a parla d'o Viello Sobrarbe. Manimenos, a forma con l'articlo «a» se conoix en buena cosa d'a comarca.

Como con totz os toponimos compuestos gosa pasar, a forma de denominar-lo que tienen os habitants d'a redolada quan no o tienen que diferenciar de garra altro, ye «Ligüerre». A forma cimpuesta se reserva, de regular, ta quan se nombra la forma oficial u quan, as menos vegadas, se mira ta contrastar-lo con belaltro nuclio que comparta ixe nombre, como o de l'Ara.

Fiestas[editar | editar código]

Referencias[editar | editar código]

  1. 1,0 1,1 1,2 1,3 (es) TOMÁS ARIAS, Chabier. El aragonés de Biello Sobrarbe. Instituto de Estudios Altoaragoneses. Uesca, 1999. ISBN 84-8127-095-4
  2. 2,0 2,1 (es) «Ligüerre de Cinca» en a subpachina «Alteraciones de los municipios en los Censos de Población desde 1842» d'o Instituto Nacional de Estadística, consultada o 14 de chunio de 2011.
  3. 3,0 3,1 (es) «Ligüerre de Cinca» en a subpachina «Relación de unidades poblacionales» d'o Insituto Nacional de Estadística; consultada o 14 de chunio de 2011.
  4. 4,0 4,1 4,2 4,3 4,4 4,5 4,6 4,7 (es) Ligüerre de Cinca en a web Huesca.com, consultada o 14 de chunio de 2011.
  5. 5,0 5,1 5,2 5,3 5,4 5,5 (es) Folleto toristico de Ligüerre; consultau o 18 de chunio de 2011.
  6. (es) «Ligüerre de Cinca: San Salvador» en CastilloDeLoarre.org, consultada o 18 de chunio de 2011.
  7. (es) LÓPEZ LANASPA, Alfredo; Sanz de Latrás; Condes de Atarés y Señores de Latrás. Revista Serrablo, num. 35 (2005). [1]; consultada o 18 de chunio de 2011.
  8. 8,0 8,1 8,2 8,3 (es) Historia de Ligüerre de Cinca; consultada o 18 de chunio de 2011.
  9. (es) Pachina d'o Centro de vacacions «Morillo de Tou»; consultada o 27 d'abril de 2011.

Vinclos Externos[editar | editar código]


Lugars d'o municipio de l'Abizanda
L'Abizanda | Escaniella | Lamata | Ligüerre d'a Cinca | Mesón de Ligüerre