Latín bulgar
De Biquipedia
O latín bulgar (en latín, sermo vulgaris) ye un termín chenerico, emplegato ta designar os dialeutos bernaculos d'o latín, charratos en as probinzias d'o Imperio Román, d'os que vienen as luengas romanzes como l'aragonés, o castellán, o catalán, o francés, l'italiano, etc.
Ista espresión ye reyalment entibocata, porque o latín yera una luenga biba y charrata como totas as luengas, en eboluzión contina, frent á lo que clamamos simplement "latín" o que yera a luenga artifizial conserbata solament en a escritura. Allora, o "latín bulgar" se refiere á o latín en a suya forma biba, charrato por a chent en o Imperio Román. Ta par d'o sieglo VII, a chent no sapeba que a luenga que charraba ya no yera o "latín", sino dialeutos que dimpués dareban orichen á las autuals luengas romanzes. En un prozeso iniziato en o sieglo II y culminato en o sieglo IX, desaparixe o latín y aparixen as luengas romanzes.
As diferenzias entre o latín bulgar y o latín culto u literario (en reyalidat, latín clasico) yeran en aspectos gramaticals, de bocabulario y tamién de pronunziazión.
As fuens ta conoxer as caracteristicas d'o latín bulgar son de tres tipos:
- A Lingüistica contrastiba u lingüistica comparatiba, que puet reconstruyir as formas antigas d'o latín bulgar sotsjazents en as modernas luengas romanzes.
- L'analisis d'os testos gramaticals d'o periodo final d'o latín clasico que critican os errors gramaticals d'os fablans.
- L'analisis d'os solezismos y d'atros aspectos en os testos literarios d'ieste mesmo periodo, que nos muestra o modo de fablar en ixe periodo.
