L'Abizanda

De Biquipedia
Ir ta: navego, busca
Iste articlo tracta sobre l'Abizanda. Ta altros usos de «Abizanda» se veiga Abizanda (desambigación).
L'Abizanda
Municipio d'Aragón
005.Abizanda 02b.JPG
O nuclio de l'Abizanda, dende a carretera A-138.
Entidat
 • País
 • Provincia
 • Comarca
 • Capital
Municipio
Flag of Aragon.svg Aragón
Flag of Huesca (province).svg Uesca
Sobrarbe
L'Abizanda
Superficie 44,8 km²
Población
 • Total

139 hab. (2011)
Altaria 617 m.
Distancia
 • 88 km

enta Uesca
Codigo postal 22392
Patrons Santa María de l'Asumpción y Sant Veturián
Parroquial
 • Diocesi
 •Arciprestato
 • Parroquia

Bp. de Balbastro-Monzón
Sobrarbe
Artasona
Ríos Barranco d'o Río y río Cinca
Coordenatas 42°16’48’’N 0°15’ 0’’E
L'Abizanda en Aragón
L'Abizanda
L'Abizanda
Situación de L'Abizanda en Aragón
www.abizanda.es

L'Abizanda[1][2] (oficialment, en castellano, «Abizanda»[3][4]) ye un lugar y municipio aragonés d'a provincia de Uesca, en a comarca d'o Sobrarbe y o partiu chudicial de Boltanya. A suya población ye de 139 habitants (2011[3]) en una superficie de 44,8 km² y una densidat de población de 2,94 hab/km².

O nuclio de l'Abizanda tiene 77 d'os 139 habitants d'o municipio (2011).[3]

O municipio actual comprende os lugars de l'Abizanda, que n'estió o primordial ta formar-lo, Escaniella y Ligüerre d'a Cinca, que se fusionón con l'Abizanda en o periodo 1842-1857,[4][5][6] Lamata, que feba parte de l'antigo municipio d'Escaniella,[6] y o Mesón de Ligüerre, l'aldeyeta de 3 casas a'l canto de a carretera que teneba l'antigo municipio de Ligüerre.

Dica la suya repentina muerte en mayo de 2005,[7] o suyo alcalde yera Pedro Santorromán Lacambra, senador por o PSOE en a cambra alta,[7] fundador y president de l'asociación ADELPA[7] y secretario cheneral de a Federación de Asociaciones y Municipios con Centrales Hidroeléctricas y Embalses,[7] presonache muit ligau a la promoción de a cultura de o Sobrarbe y a la promoción d'una nueva cultura de l'augua que minimizás l'impacto d'os pantanos en a población d'as zonas afectadas.[7]

Cheografía[editar | editar código]

O lugar de l'Abizanda se composa de dos vicos deseparaus a cada costau de o barranco d'o Río. O vico d'o castiello destaca por a torre de l'homenache de l'antigo castiello de l'Abizanda, d'o sieglo XI,[8] que le da o nombre a'l nuclio, y con ell, a'l municipio. Se troba en alto d'una penya extraplomada, con una espluga en a baixant nordeste, en sinyoreando un punto d'estretimiento en o corso d'o barranco, con una baixant petrosa tamién en a man cuentra.

Por a suya posición, y porque l'actual carretera d'acceso más important a'l Sobrarbe, dende o Sud, pasa por a cuenca d'o barranco, l'Abizanda se destaca como a primer población sobrarbenca que se troba quan se puya en sentiu ta l'Aínsa dende o Semontano de Balbastro.

Estructura urbana[editar | editar código]

O vico d'a plaza de l'Abizanda dende o suyo castiello.

Un barranco estacional, que heba nombre «barranco de Riazuelo», afluent de o d'o Río, esnavesaba tradicionalment por o centro d'o vico d'o castiello de l'Abizanda, a on que en l'actualidat ye a plaza.[8] A plaza se pavimentó en o sieglo XX,[8] tot tapando ixe barranco.

A plaza de l'Abizanda ye singular, además, por haber estau feita con cimento que donó un empresario catalán, de nombre Domingo Muniente, y por ixo recibe o nombre d'o presonache[8] por cuentas de dicir-se «Plaza Mayor» como en a mayoría de lugars en a comarca.

Por o demás, o nuclio de l'Abizanda (principalment, o vico d'o castiello) se troba en as dos costeras que fan a sierra de Sant Benedet (u sierra d'Arbe) por a man occidental y o puntón d'o castiello, con a plaza en a part más baixa.

En o puntón, se destaca as restas d'o castiello, d'o sieglo XI, que dominan o paisache urbano de a población. En o perimetro d'o recinto, más alto que a resta de l'Abizanda, se i conserva bells trocetz de muro d'o que pudon estar os lienzos exteriors d'a fortificación.[8]

Historia[editar | editar código]

L'Abizanda amaneixió como población en a base d'o castiello, que ye un d'os más grans que existe en o Sobrarbe meridional.[8] Por ixo, a historia d'o lugar ye muit dominada por a historia d'o suyo castiello.

O castiello de l'Abizanda o fundón os sinyors musulmans de a familia Ibn Sallam.[8][9] A dita familia tenión presencia en belaltros nuclios en a redolada, dica dimpués de a reconquiesta, y ostentón bells castiellos y fortificacions tamién en os anyos sucesivos a la dominación cristiana, como por eixemplo o castiello de Clamosa,[10] en a cuentra d'o río Cinca. D'alcuerdo con o historiador Manuel Benito Moliner, podrían trobar-se en as oríchens de l'apelliu Salamero, que lievan muitas presonas en a zona de confluencia d'as comarcas de o Sobrarbe, o Semontano de Balbastro y a Ribagorza,[10] en a redolada a on ye l'Abizanda. O nombre musulmán de l'Abizanda yera «Abinyuyas».[9]

O castiello, con a suya caracteristica torre, sinyorea o nuclio de l'Abizanda.

Amaneix en os documentos historicos como fortaleza conquerida por os cristians de camín ta l'anyo 1017, en tiempos de o reinau de Sancho lo Mayor.[9] S'accepta que se reconstruyó en 1023,[9] porque ye a calendada en a que s'ha puesto fechar a construcción de a torre, d'estilo romanico, executada por mayestros lombardes[9] en o marco d'a primer epoca d'expansión de o romanico por l'Alto Aragón.

A linia de tinents de o castiello se conoix con bellas interrupcions: Ato Galíndiz de 1055 dica 1079, Galindo de Dato en 1090, don Calbet d'entre 1095 y 1114, Sancho Iñiguez en l'anyo 1135, Fortunio Garcés en 1159, Guillén de Castrozol en 1194 y Guillén Castillazuelo en 1291.[9] En l'anyo 1413, dimpués de o compromís de Caspe, o castiello de l'Abizanda sofrió l'ataque de a facción d'o conte d'Urchel, que no acceptaba o resultau conveniu y se mostró en rebelión bells anyos más.

En o reinau d'Alifonso V, o castiello yera propiedat de a corona, pero le'n cedión a Domingo de Naya.[9] Por ixas envueltas, apareix en os documentos siempre con as formas «Avinçalla» u «Aviçanlla» (probablement pronunciaus «Abinsal·la» y «Abisanla», respectivament), forma d'escribir o toponimo que encara duraría bells tiempos más. En o sieglo XVII, pareix que ye atestiguau que perteneceba a la baronía de Castro.[9]

Demografía[editar | editar código]

D'o municipio:

Evolución demografica
1362 f 1495 f 1842 1857 1860 1877 1887 1897 1900
- - - 592 595 564 582 501 504
1910 1920 1930 1940 1950 1960 1970 1981 1991
487 424 422 371 374 291 195 118 129
1992 1994 1996 1997 1998 1999 2000 2001 2002
- - 136 - 140 142 137 135 143
2003 2004 2005 2006 2007 2008 2009 2010 2011
132 131 128 136 133 130 126 132 139
 1717-1981: población de feito; 1990- : población de dreito.
Fuent: Intercensal en l'INE, Series de población en l'INE y Relación d'unidatz poblacionals en l'INE.

Evolución d'a población d'os nuclios que forman l'Abizanda dende 1857.

De o lugar de l'Abizanda:

Evolución demografica
1992 1994 1996 1997 1998 1999 2000 2001 2002
- - - - - - 82 80 86
2003 2004 2005 2006 2007 2008 2009 2010 2011
77 77 76 81 78 78 73 77 -
2012 2013 2014 2015 2016 2017 2018 2019 -
- - - - - - - - -
1990- : población de dreito.
Fuent: Intercensal en l'INE, Series de población en l'INE y Relación d'unidatz poblacionals en l'INE.

Imáchens[editar | editar código]

Administración[editar | editar código]

Reparto de concellers[editar | editar código]

Eleccions municipals
Partito 1979 1983 1987 1991 1995 1999 2003 2007 2011
Partido de los Socialistas de Aragón 5 5 5 5 5 5 4
Partido Popular 1
AP-PDP-UL 5
Unión de Centro Democrático 4
Total 4 5 5 5 5 5 5 5 5

Alcaldes[editar | editar código]

Lista d'alcaldes
Lechislatura Nombre Partito politico
19791983
19831987
19871991
19911995 Pedro Santorromán Lacambra Partido de los Socialistas de Aragón
19951999 Pedro Santorromán Lacambra Partido de los Socialistas de Aragón
19992003 Pedro Santorromán Lacambra Partido de los Socialistas de Aragón
20032007 Pedro Santorromán Lacambra / Ramón Guatas Partido de los Socialistas de Aragón
20072011 Fernando Torres Lacambra Partido de los Socialistas de Aragón
20112015 José Buesa Abadías Partido de los Socialistas de Aragón

Patrimonio[editar | editar código]

A ilesia parroquial de l'Asumpción, d'o sieglo XVI.

A población de l'Abizanda tiene dos monimentos destacables; o castiello de l'Abizanda, d'o sieglo XI, y a ilesia de l'Asumpción, d'o sieglo XVI.

O castiello ye o monumento más envistable, tanto dende a carretera A-138 que une Balbastro y l'Aínsa, como dende toda a cuenca de o barranco d'o Río. Con 40 metros d'altaria, a torre de tipo donchón ye a sola edificación que queda de piet entera, y a más envistable de todas. Tiene 5 plantas d'altaria, y en a zaguera muestra un cadafalso perimetral de madera sobre fustes, que teneba una misión defensiva. A dentrada en a torre se feba por una puerta en altaria, que corresponde con a segunda planta, dencima d'o magazén, y ta la que, historicament, se debeba acceder por una escalereta retirable.

L'interior de o donchón, que tiene as plantas de madera refirmada sobre fustes, y o cadafalso superior, se i troban dende a restauración que s'acometió en os anyos 1990, a iniciativa de l'alavetz alcalde Pedro Santorromán.[7] En imáchens anteriors a ixa epoca, como as que quitó Lucien Briet en as zaguerías d'o sieglo XIX, y como a estampa que muitos habitants de o Sobrarbe pueden recordar de os tiempos enantes de a construcción de l'actual carretera, A-138, quan s'esnavesaba por a'l costau de l'Abizanda por a carretera dita de «l'Alto'l Pino», a torre yera despullada y no se i conservaba sique as paretz exteriors.

En os arredols de o donchón, y especialment en a frontera norte de a ilesia parroquial, i ha qualques restas de muros que debión estar as murallas perimetrals de a fortificación. Un abside romanico y os alazetz d'un templo d'ixe estilo son parcialment conservaus por a man d'afuera de a ilesia parroquial, en o Norte, por o que s'aprecia que i habió d'estar o emplazamiento de a ilesia orichinal.

A ilesia parroquial, consagrada a l'advocación d'a figura de l'Asumpción de Santa María, ye una obra mayoritaria de o sieglo XVI, y por a construcción d'as fronteras con piedra de colors claras, y por o tellau de tellas, fa recordar a las ilesias de o Semontano. Se troba en alto, a'l canto d'o recinto d'o castiello, y tiene en a frontera, concabido, l'abside de l'antiga capiella u ilesieta, romanica, que i debeba tener o castiello.

A torre-donchón con cadafalso de o castiello de l'Abizanda.

Además, en os arredols de l'Abizanda i ha quatro ermitas. La una, a de Sant Veturián, patrón menor de l'Abizanda, ye construida en estilo romanico tardano y se i celebra anyalment a romería d'os langostos,[8] una peculiar romería en a que os de l'Abizanda i puyan ta sentir-ie misa y, como se fa en chinero, tradicionalment se vaticinaba a productividad d'as cullitas d'ixa anyada en función de si se trobaba langostos en o camino[11] u no se'n i trobaba (cal pensar que ixes insectos, que tanto les gusta a calor, no ye mica freqüent trobar-los en chinero). A ermita se troba en alto en a sierra de Sant Benedet, a más d'una hora de camino dende o nuclio, d'entre dos partidas que en dicen «a Valata» y «Laternal».[8]

As atras tres ermitas son as de Sant Salvador, Sant Miguel y «Santiago» Apóstol.[8] Todas tres se fizon d'entre os sieglos XVII y XVIII.[8]

Casas destacadas[editar | editar código]

L'Abizanda tiene, como tamién en son o castiello y a ilesia, tres casas principals que son catalogadas como Bien d'Intrés Cultural.

A más antiga de as tres ye «casa don Carlos», en o vico d'o Castiello. Ye un casal fuerte de o sieglo XV[12] con una torre defensiva que data d'o sieglo XVI,[13] y en l'actualidat ye reformada y habitada.

Casa Maza, datada en l'anyo 1745, ye un palacio que en l'actualidat se fa funcionar como vivienda de torismo rural.

Casa Cazolero, que ye en o vico de l'Entremuro, tiene o tellau espaldau dende fa bells anyos, y l'absencia de os suyos amos en a localidat fa que de as tres sia a que tiene o pior futuro.

Belatros focos d'interés[editar | editar código]

L'Abizanda cuenta, además de tot ixo, con dos museus y un archivo documental en o lugar, y con unatro museu, o Paleontolochico de Sobrarbe, en o nuclio de Lamata. Ista gran cantidat d'instalacions culturals (si se para cuenta que o municipio entero no tiene sique arredol de 130 habitants) se debe en parte a o compromís de o suyo difunto alcalde, Pedro Santorromán, en os prochectos de promoción cultural y de reivindicación de lo propio.[7]

D'entre os prochectos destacables que Santorromán fundó en l'Abizanda se cuenta o Museu d'as Creyencias y a Relichiosidat Popular d'o Pireneu Central, fundau de conchunta con l'antropologo Ángel Gari[7] en 1990, que se troba en ocupando l'edificio de a casa l'abadía, una d'as casas más grans de lugar (data d'o sieglo XVII[14]). Se troba a'l costau de a ilesia parroquial, y contiene una colección de 8.000 obchectos relichiosos que van dende o I milenio aC dica o sieglo XX.[14]

Anque a exposición remanent ye, principalment, en o edificio de l'abadía, ocasionalment s'habilita exposicions temporals en a torre d'o castiello.

A puerta d'o Centro de Estudios y Documentación de Aure y Sobrarbe (CEDAS), en l'Abizanda.

A casa d'os Titeres, museu y espacio cultural de a companyía tiatral Titiriteros de Binéfar, tamién s'ubica en l'Abizanda, en a baixada de o castiello de camín ta'l barranco. Cuenta con una exposición de monyacos y titeres que s'ha emplegau mientres d'anyos y en diferents puestos,[15] y d'un espacio a l'aire libre (en a era d'a casa) a on que se puede fer representacions.[15]

En l'actualidat, a Casa d'os Titeres se composa de dos edificios que son casas rehabilitadas de o lugar. A era que todas dos casas compartiban se fa servir en l'actualidat como scenario ta bellas actuacions de a companyía.[15]

Además d'ixes edificios, l'Abizanda ahuespa tamién a seu espanyola de o Centro de Estudios y Documentación de Aure y Sobrarbe, una institución publica promovida por l'achuntamiento de l'Abizanda y a comuna d'Ancizan (Meyodía-Pireneus, Francia) que s'adedica a la investigación, preservación y difusión d'a cultura tradicional de o Pireneu central.[16]

Actualment tiene un aria de treballo que cubre tot o Sobrarbe y as valles d'Aure y de Louron, en os Altos Pireneus franceses, y ye a institución que se troba dezaga de a promoción de a iniciativa «Continua Pirineum», subscrita por totz os achuntamientos d'o Sobrarbe y por bellas comunas d'os Altos Pireneus, financiada con fondos Interreg d'a Unión Europea,[16] y que ha enchegau a recuperación de qualques monimentos y camins tradicionals en cada costau de iste sector de a muga franco-espanyola.[16]

Fiestas[editar | editar código]

Veyer tamién[editar | editar código]

Referencias[editar | editar código]

  1. (es) SAROÏHANDY, Jean-Joseph, Misión lingüística en el Alto Aragón (compilazión de materials ineditos dende 1906); Xordica Editorial. Zaragoza, 2005. ISBN 84-96457-06-0
  2. (es) BLAS GABARDA, Fernando et ROMANOS HERNANDO, Fernando, Diccionario Aragonés: Chistabín-Castellano; Gara d'Edizions. Zaragoza, 2008. ISBN 978-84-8094-061-0
  3. 3,0 3,1 3,2 (es) «Abizanda» en a subpachina «Relación de unidades poblacionales» d'o Insituto Nacional de Estadística; consultada o 20 d'octubre de 2012.
  4. 4,0 4,1 (es) «Abizanda» en a subpachina «Alteraciones de los municipios en los Censos de Población desde 1842» d'o Instituto Nacional de Estadística, consultada o 21 de chunio de 2011.
  5. (es) «Ligüerre de Cinca» en a subpachina «Alteraciones de los municipios en los Censos de Población desde 1842» d'o Instituto Nacional de Estadística, consultada o 21 de chunio de 2011.
  6. 6,0 6,1 (es) «Escanilla» en a subpachina «Alteraciones de los municipios en los Censos de Población desde 1842» d'o Instituto Nacional de Estadística, consultada o 21 de chunio de 2011.
  7. 7,0 7,1 7,2 7,3 7,4 7,5 7,6 7,7 (es) Obituario de Pedro Santorromán, apareixiu en o diario El País o 26 de mayo de 2005; consyultau o 22 de chunio de 2011.
  8. 8,00 8,01 8,02 8,03 8,04 8,05 8,06 8,07 8,08 8,09 8,10 8,11 8,12 8,13 (es) «Abizanda» en a web de l'achuntamiento de l'Abizanda; consultada o 21 de chunio de 2011.
  9. 9,0 9,1 9,2 9,3 9,4 9,5 9,6 9,7 (es) «Castillo de Abizanda» en www.CastillosDeAragon.es; consultada o 22 de chunio de 2011.
  10. 10,0 10,1 (es) Despoblados del antiguo municipio de Clamosa por Manuel Benito Moliner; consultau o 21 de chunio de 2011.
  11. (es) Noticia La lluvia suspende la romería de los langostos en Abizanda por tercer año consecutivo, amaneixida en o «Heraldo de Aragón» o 10 de chinero de 2011; consultada o 22 de chunio de 2011.
  12. (es) «Casa Carlos en Abizanda», en www.CastillosDeAragon.es; consultada o 23 de chunio de 2011.
  13. (es) «Casa Carlos» en www.CastillosNet.org; consultada o 23 de chunio de 2011.
  14. 14,0 14,1 (es) «Museo de Creencias y Religiosidad Popular del Pirineo Central» en a web www.PatrimonioCulturalDeAragon.com; consultada o 22 de chunio de 2011.
  15. 15,0 15,1 15,2 (es) Web www.LaCasaDeLosTíteres.com, consultada o 22 de chunio de 2011.
  16. 16,0 16,1 16,2 (es)(fr) Web oficial d'o prochecto CEDAS; consultada o 22 de chunio de 2011.

Vinclos externos[editar | editar código]


Lugars d'o municipio de l'Abizanda
L'Abizanda | Escaniella | Lamata | Ligüerre d'a Cinca | Mesón de Ligüerre


Municipios d'a comarca Sobrarbe
L'Abizanda | L'Aínsa-Sobrarbe | Barcabo | Bielsa | Boltanya | Broto | A Buerda | Chistén | A Espunya | Fanlo | Fiscal | A Fueva | Palo | Plan | Puértolas | O Pueyo d'Araguás | Tella-Sin | Sant Chuan de Plan | Torla