Kitesurf

De Biquipedia
Ir ta: navego, busca
Kitesurfistas navegando
Equipe basico de kitesurf

O kite surfing u kite surf, tamien conoixito como kiteboarding, y en bells puestos d'Europa como flysurfing, ye una modalidat de navegación en a que se fa servir una milorcha como tracción (kite, en anglés), que ye subchecta a o esportista (kiter) por 4 u 5 (rara vegata dos) linias, dos fixas a la barra, y as dos u tres restants pasan por o centro d'a barra y se subchectan a o cuerpo a traviés d'un arnés, permitindo eslizar-se sobre l'augua por meyo d'una tabla disenyata a tal efecto.

O equipe basico de kitesurf se composa de:

  1. Milorcha.
  2. Barra de dirección.
  3. Arnés.
  4. Tabla.

Y opcionalment puet encluyir elementos de seguridat y confort como:

Iniciación[editar | editar código]

Kitesurf en o río Ebro.

Ta prencipiar con iste esporte os expertos recomiendan fer un curso d'iniciación a on amostre un primer contacto con o material, y ya que se tracta d'un esporte de riesgo, ye menester a o menos conoixer unas normas basicas de seguridat y procedimientos de rescate que permitirán resolver situacions de rotura de material, cayita d'a milorcha, etc. Iste esporte en mans inexpertas puet estar perigloso, pero bien practicato ye un esporte muit emocionante que desborda adrenalina.

En un curset d'iniciación, por un regular bi ha una parti teorica de seguridat, finestra de vuelo, etc. y una atra parti practica, que prencipia en l'arena con una milorcha d'iniciación, a on que se prene contacto con a fuerza d'a milorcha en as diferents posicions d'a finestra de vuelo y o suyo comportamiento en función d'a velocidat. Procedimiento ta puyar y baixar y suelta d'a milorcha. Se pasa posteriorment a l'augua y se practica o "bodydrag", desplazamiento en l'augua sin d'a tabla. Ista tecnica permite recuperar a tabla en l'augua, dimpués se practica o "waterstart" u salita con a tabla dende l'augua.

Seguridat[editar | editar código]

O kitesurfer va unito a la milorcha por unas linias fixatas a un arnés

No se gosa practicar o kitesurf con viento de tierra (o viento que t'aluenya d'a placha). Manimenos existen puestos especificos a on que con viento de tierra se puet navegar, como ye o levant en a placha de Valdevaqueros en Tarifa (Cádiz) u en a la placha de sotavento en Jandía (Fuerteventura).

O equipe basico contiene diferents elementos de seguridat. O tándem milorcha-barra ye o que mas elementos contiene. En caso de que bufe un viento muit cerenyo con o qualo a milorcha se pueda descontrolar y nos pueda arrastrar, a unión a l'arnés dita chickenloop tien una aniella de seguridat que permite soltar a milorcha d'o cuerpo. Ye nomás alavez quan actua a cinquena linia, opcional, que evita que a milorcha s'aluenye y s'extravíe. Como s'ha dito antis, a traviés d'a barra pasan unas linias, dando un marguin ta que a barra pueda amanar-se mas a o cuerpo u aluenyar-se. Ista acción influye licherament en a milorcha fendo-la mas u menos sensible a o viento (pillando-ne mas u menos), ye por si mesma una mesura de seguridat, ya que se puet regular a milorcha quan vienen rachas cerenyas de viento. As milorchas de dos linias no tienen iste sistema, hue en día imprescindible (por ixo son en desuso). En zagueras a constitución d'a milorcha, que varía entre marcas y modelos, y o suyo disenyo pueden aportar tamién elementos de seguridat.

En iste esporte se ye innovando en seguridat, disenyo y prestacions y data a suya curta vida, cada anyo se meten nuevos elementos de seguridat.

Prencipios[editar | editar código]

Un choven practicando o kitesurf

Encara que a practica d'iste esporte de manera cheneral ye muit recient, se tien conoixencia de que dende muit antigo en China y Indonesia se feban servir milorchas ta arrastrar chicotas embarcacions. Manimenos no ye dica 1977 quan Gijsbertus Adrianus Panhuise patenta un sistema de navegació sobre una tabla de surf traccionata por una mena de paracayitas, convertindo-se asinas en o pai d'iste esporte. En Indonesia ye una cultura y un arte, os disenyos son amplos y variatos, en istas zonas ye a on se troba a indústria de kiteboarding. Tamién ye un gran puesto ta entrenar y desembolicar o material, ixo a mas d'a man d'obra barata y o desembolique industrial d'ista zona la sitúa como pionera en quanto a o desembolique d'o kiteboarding. Marcas de renombre como North Kiteboarding la emplegan como seu central.

Por un regular, o primer trango d'o kitesurfing ye volar a milorcha en una posición neutral, en a quala a milorcha ye dreitament sobre o tozuelo, de traza que a milorcha no tira mas que o peso d'o cuerpo d'uno mesmo.

A catalana Gisela Pulido ye 6 vegatas campiona d'o mundo de kitesurf en a modalidat freestyle.

Vinclos externos[editar | editar código]