Juniperus thurifera
De Biquipedia
| Juniperus thurifera | ||||||||||||||||
|---|---|---|---|---|---|---|---|---|---|---|---|---|---|---|---|---|
 |
||||||||||||||||
| Clasificazión zentifica | ||||||||||||||||
|
||||||||||||||||
| Nomenclatura binomial | ||||||||||||||||
| ''Juniperus thurifera'' | ||||||||||||||||
| L. |
O Juniperus thurifera ye una espezie de sabina distribuita dende L'Atlas dica los Alpes Franzeses e con zentro de masima abundanzia en lo Sistema Iberico.
[editar] Carauteristicas
Árbol u arbusto de fuella perén, de tamaño meyano, por un regular de 4 a 12 m d'altaria cuan ye árbol e d'un metro de diametro de trallo, curto, grueso, un poquet retuerto en los exemplars biellos, con escorza parda y grisenca, fibrosa y con crebazas lonchitudinals, esgallando-se á tiras. La copa ye muito densa, de color berda escura con forma conica u obalata y en exemplars remoldatos aplanata y irregular. Las brancas son gruesas e las fuellas con forma d'escata como ye normal en una cupresazia, adosatas a la branqueta berda, son como escatas romboidals e aspras á lo tacto. Produze piez masculins e femenins, los fruitos son redondeyatos de color azulenca u royenca seguntes l'estato de madurazión.
Florexe á partir de febrero e los fruitos maturan á la segunda añata, pero tamién bi ha epocas en las que no frutifican.
[editar] Estato de conserbazión
Los antigos sabinars de la Depresión de l'Ebro plegaban dende la Sierra d'Alcubierre dica Zaragoza e Quinto. La mayor parte de los sabinars de la Depresión de l'Ebro los han ido tallando dende la reconquiesta. La sabina de Billamayor ye un testimonio d'estos antigos sabinars á man de Zaragoza e ye la zaguera que en queda, han sembrato sabinas á lo suyo costato pa que pueda reproduzir-se. Lo sabinar de la Retuerta de Pina ha puesto durar dica güei porque yera propiedat reyal, pero ha retaculato dende lo sieglo XIX. La chent de los Monegros feban serbir los suyos trallos pa fer bigas de casas e tamién cremaban la suya fusta pa fer una zenisa con propiedaz antisepticas.
La presenzia d'un chicot sabinar en Oliet á man de Sant Per de los Griegos y los exemplars aislatos que bi ha en la Muela de Borcha fan de ligallo con los sabinars de lo Sistema Iberico.
Lo sabinar més gran d'esta espezie ye situato entre Arcos de Xalón e Maranchón inclindo los termins de las localidaz de Sagides, Chaorna, Judes, Iruecha, Codes e Mochales. Fa poco lo han declarato Puesto d'Intrés Comunitario (LIC).
[editar] Denominazions
Lo nombre zientifico d'esta espezie, thurifera, sennifica «produtora d'inzienso», car la suya fusta ye muito aromatica.
En l'aragonés de l'autual probinzia de Tergüel se debeba dizir tarabina u trabina, porque ha dixato siñal toponimica dende Castellot dica Chabalambre.
En castellán se clama ofizialment sabina alvar, pero en bellas zonas entre lo Sistema Zentral e Sistema Iberico en dizen enebro, denominazión común con lo chinebro.
