Inductor

De Biquipedia
Ir ta: navego, busca
Translate icon.svg Iste articlo ye escrito con as normas graficas d'o 87. Si quiers puetz aduyar cambeyando a la grafía actual y sacando dimpués ista plantilla.
Articlo d'os 1000
Indutors corrients.

Un indutor ye un component eletronico pasibo d'os zercuitos eletricos que, debito a lo fenomén de l'autoinduzión, almadazena enerchía en forma de campo magnetico creyato por o paso d'a corrient eletrica. Iste component tamién gosa dezir-se bobina u indutanzia. A capazidat d'un indutor d'almadazenar enerchía se mide por a suya indutanzia que s'esprisa en henrys (simbolizato por H), una unidat deribata d'o Sistema Internacional d'unidaz.

En a tioría de zercuitos un indutor ideyal tenerba indutanzia pero no pas resistencia ni tampoco no capazitanzia, por ixo no disiparba enerchía. En iste component ideyal tota la enerchía eletrica absorbita sería almadazenata en forma de campo magnetico. Pero os indutors reyals, que son fabricatos con un arrulamiento de filo condutor, son equibalents a una combinazión d'indutanzia, bella resistencia debita a la resistibidat d'o filo, e bella capazitanzia. En bellas frecuenzias, un indutor reyal se comporta como un zercuito resonant debito a la capazitanzia parasita. A más de disipar enerchía por a resistencia eletrica d'o filo condutor, o nuclio d'os indutors tamién la pueden disipar debito a la isteresis e con grans corrients tamién se pueden produzir perdugas d'enerchía a causa d'a no linialidat d'os zercuitos.

Construzión[editar | editar código]

Un indutor ye formato normalment por una bobina de material condutor, tipicament cordón de cobre. Esisten indutors con nuclio d'aire u con nuclio d'un material ferroso, ta incrementar a suya indutanzia. As bobinas tipicas son formatas por espiras, feitas de filo esmaltato, e gosan embolber un nuclio de material ferromagnetico. En os motors eletricos son mesas aintro d'as ranuras.

Os indutors pueden estar tamién construyitos en zercuitos integratos, usando lo mesmo prozeso emplegato ta reyalizar microprozesadors. En istos casos s'emplega, a sobén, l'aluminio como material condutor. Manimenos, ye raro que se metan indutors aintro d'os zercuitos integratos; ye muito más prautico emplegar un zercuito dito "chirador" que, por meyo d'un amplificador operazional, fa que un condensador se comporte com si estase un indutor.

A begatas se pueden construyir chicoz indutors ta frecuenzias muit altas con un condutor que pase a traviés d'un zilindro de ferrita u granulato.

O indutor en os zercuitos eletricos[editar | editar código]

Os inductors s'oposan en os cambeyos a la corrient eletrica, un indutor ideyal no oposarba denguna resistencia a una corrient contina constante, manimenos nomás os indutors supercondutors tenerban en reyalidat una resitenzia nula.

En cheneral, a relación entre a bariazión d'o boltache en o tiempo v(t) a traviés d'un indutor con una indutanzia L e una bariazión d'a corrient que i pasa a lo largo d'o tiempo i(t) se describe por meyo d'una ecuazión diferenzial:

v(t) = L \frac{di(t)}{dt}

á on que v ye o boltache,di(t)/dt ye a deribata d'a corrient e L ye a indutanzia en henrys.

As bobinas en as maquinas eletricas puede ir tanto en o rotor como en o estator e conforman o zercuito eletrico d'a maquina. Seguntes como se quiera que treballe o motor, as bobinas se pueden colocar de dos maneras: En o polos (salita con salita, dentrata con dentrata, salita con salita…) u en os polos consecuents (salita con dentrata, salita con dentrata, salita con dentrata…). Tamién se pueden meter en series paralelas en as que cal mantener as espiras coneutatas a lo rete eletrico.