Hunnos

De Biquipedia
Iste articlo ye en proceso de cambio enta la ortografía oficial de Biquipedia (la Ortografía de l'aragonés de l'Academia Aragonesa d'a Luenga). Puez aduyar a completar este proceso revisando l'articlo, fendo-ie los cambios ortograficos necesarios y sacando dimpués ista plantilla.
Suposata estensión de l'Imperio d'os hunnos u d'a suya aria d'influencia dende a mar Negra dica a mar Baltica.

Os hunnos[1] estioron un pueblo nomada turco d'as estepas d'Eurasia que invadió l'Imperio Romano en o sieglo V. Se suposa que son relacionatos con os Hsiu nu d'as fuents chinesas y que o nuclio orichinal d'as hordas hunnas yera de luenga y cultura turquica, encara que a fin d'a historia d'os hunnos los vincula mes a l'Imperio Romano y a los pueblos chermanicos.

En Asia Central os hunnos conquirioron o país d'os masachetas y se mezcloron con ellos. Uno d'os primers pueblos d'Europa invaditos por os hunnos estioron os alanos, parte d'ellos se sozmetioron a los hunnos y d'atros emigroron ta o Caucaso u ta Occident. En l'anyo 375 os hunnos trescruzoron o río Don y desfacioron o reino Ostrogodo. Dimpués d'os ostrogodos fuoron derrotatos os visigodos, que abandonoron Dacia cruciando o Danubio. Entre l'anyo 377 y l'anyo 405 os hunnos s'establioron en as planas d'as actuals Ucraína y Rumanía. Os ostrogodos y atros chermans formoron buena parte de l'exercito d'os hunnos y d'a población de l'aria dominata por os hunnos. A onomastica de muitos hunnos como Atila ye d'orichen chermanico. Os romanos feban servir a los hunnos pa atacar por a espalda y enfeblir a los pueblos chermanicos cuan teneban prou poder pa representar una amenaza pa os romanos. Os burgundios fuoron redotados en Worms por os hunnos, que feban de mercenarios pa l'Imperio Romano, y o reino burgundio d'o Rin fue destruito.

En l'anyo 441-453 Atila se desfizo d'o suyo chirmán rival Bleda y se convertió en caudiello unico. Atila se convertió en a mayor amenaza pa l'Imperio Romano, y muitos pueblos barbaros reconoixioron a suya autoridat. En a capital de l'Imperio hunno d'Atila bi heba consellers griegos como Onegesies y romanos como Orestes. O Imperio Romano d'Orient pagó a los hunnos pa que no los atacasen, y Atila endrezó os ataques ta l'Imperio Romano d'Occident. En l'anyo 451 Atila fue derrotato en a batalla d'os Campos Catalaunicos, amán de Troyes y se retiró t'a val d'o Po. A derrota en os Campos Catalaunicos animó a bels vasallos a rebelar-sen, como ye o caso d'os ostrogodos de Teodomir.

En l'anyo 453 morió Atila y encomenzó un conflicto succesorio. Teodomir continó con a suya revuelta, consiguiendo chunto con os chepidas d'Arderico vencer a los hunnos en a Batalla de Nedao en hibierno de l'anyo 454 y convertir-se en pueblos independients. Os hunnos perdioron a hechemonía en Panonia, nuclio d'os dominios d'Atila. Panonia se la disputarán os ostrogodos, herulos, esciros y chepidas, estando estos zaguers qui rematarán dominando-ie. No se sabe bien si os hunnos d'Europa Central fuoron exterminatos, asimilatos por atros pueblos u tornoron enta las estepas d'Europa Oriental.

Referencias[editar | modificar o codigo]

Bibliografía[editar | modificar o codigo]

Vinclos externos[editar | modificar o codigo]

Wikisource
Wikisource
En Wikisource bi ha un texto sobre Atila en la Cronica de los Conquiridores.