Hulagu Khan

De Biquipedia
Ir ta: navego, busca
Hulagu Khan
Khan d'o Ilkhanato Persa
HulaguAndDokuzKathun.JPG
Hulagu con su muller Doquz Khatun

1217 - 1265
Succesor Abaqa Khan

Muerte 8 de febrero de 1265
Enterreco Laco Urmía
Conchuche/s Doquz Khatun
Pai Tolui
Mai Sorghaghtani Beki

Hulagu Khan, tamién conoixito como Hülegü u Hulegu, (c. 1217 - 8 de febrero de 1265) estió un gobernant mongol que conquistó gran part d'Asia suroccidental, con tota Persia. O suyo exercito destruyó os dos mayors centros de poder islamico d'Orient Meyo: Bagdad y Domás, por o que os mamelucos d'Al Caire esdevinioron a dinastía més poderosa d'o mundo islamico. Hulagu yera nieto de Chinguis Khan y chirmán d'Arik Boke, Möngke‎ y Kublai Khan. Dimpués d'a muerte d'o Gran Khan habió de viachar t'Asia Central dixando temporalment as suyas tropas, que fuoron derrotatas por os mamelucos en a batalla de Ain Yalut. Hulagu Khan estió o primer Khan d'o Ilkanato de Persia.

Se crei que Hulagu yera budista, pero simpatizaba con o cristianismo por que yera de mai y mullers nestorinas, y en consequencia protechió as confesions cristianas. En o campos d'a sciencia acomandó a Nasīr al-Dīn al-Tūsī a construcción y a dirección de l'observatorio astronomico de Maragha. A suya muller Dokuz Khatun influyó en a seva protección d'os nestorins (entro os que se trobaban os asirians cristians d'os territorios conquiestos) y ella mesma los benefició.

En 1255, Hulagu fue ninviato por o suyo chirman Möngke (qui estió o Gran Khan dende 1251 dica 1258) pa conquerir u destruir os estatos musulmans de l'Orient Meyo. A campanya de Hulagu teneba como obchectivo sozmeter a los luros, a destrucción d'a secta d'os nizarís, sozmeter o Califato Abbasí sozmeter u destruir os estatos d'a dinastía ayubí en Siria, y a la fin sozmeter y destruir a los mamelucos d'Echipto.[1]

Hulagu partió un exercito que talment siga o mayor exercito mongol d'a Historia, car Mongke ordenó fer part d'este exercito a un de cada diez hombres en condicions de peleyar en tot o Imperio Mongol. Os luros fuoron sozmesos con facilidat y os nizarís, impresionatos, rindioron a suya fortaleza d'Alamut sin resistir-sen. Dimpués de conquerir os castiellos d'os nizarís d'as montanyas a lo sud d'a Mar Caspia s'adrezó enta Bagdad y desfació o Califato Abbasí. A conquiesta mongola de Bagdad ye recordata en a memoria colectiva d'os musulmans d'ixa zona como a mayor mortalera que han sufrito. O califa y quasi tota a suya familia fuoron executatos. Marco Polo comenta que dixoron morir de fambre a lo califa, pero no ye confirmato.

Dimpués d'a conquiesta de Bagdad, os mongols s'adrezoron enta Siria chunto con tropas d'os suyos vasallos cristians como o Reino d'Armenia la Chica baixo Haiton I y as tropas francesas de Boimundo IV d'Anquioquía. Halep y Domás cayoron y a dinastía Ayyubí destruita.

Mencions en fuents aragonesas[editar | editar código]

Hulagu Khan ye mencionato en "La Flor de las Ystorias d'Orient" como Aloon u Haloon.

Apres ordeno las gentes de armas qui deuien seguir Aloon su hermano; la ora Aloon et el rey de Erminia, con grant companya de gent, caualgaron tanto que plegaron al rio de Phison, et antes que passassen vii. meses, Aloon occupo todo el regno de Perssia, et priso todas las encontradas et las tierras entro a la tierra do habitan los assasins, qui son gentes sin fe saluo que creyen lo que su senyor, el qual ha nombre el Viello de la Montanya, les ensenya creyer; et son tan obedientes a su senyor que se meten a muert por su mandamiento. En aquella tierra de los assasins auia vn fuert castiello, bien fornido de todas cosas, que auia nombre ...

En "La Flor de las Ystorias d'Orient" transmiten a version de Marco Polo que fació morir de fambre a lo califa, versión que recuerda a la historia d'o Rei Midas.

...la ley de Mahomet, nos te faremos guarda de las tus riquezas, et que ende manges, sinde quieres." Et en tal manera fino su miserable vida el Gallifa, et iamas despues no huuo Gallifa en Beldach.

Comentan como habió de tornar t'Asia Central quan morió o Gran Khan:

...el fue muyt dolent de la muert de su hermano, et por el conssello de su gent lexo vn su varon qui auia nombre Guiloia, con .x. tartres, por guardar el regno de Siria, et mando que todas las tierras que eran stadas de los cristianos les fuessen tornadas. Apres el sen torno deues orient, et lexo vn su fillo, qui auia nombre Abaga, a Turis. Et de aqui sende partio Aloon, et vino por sus iornadas al regno de Perssia...

En o "Libro d'as Marabillas d'o Mundo" li dicen Halaon:

Si lo fezo Halaon venir deuant eill, et li diso por que el no auia tomado por sus gageros vna partida deste tresoro...
...su hermano Halaon, con grant multitud de gentes, por ganar la Tierra Santa, et por la meter enlas manos delos christianos, et por destruir la ley de Mahomet, et por prender el califfa de Bandas, qui hera...


Predecesor:
denguno
Khan d'o Ilkhanato Persa
1217 - 1265
Succesor:
Abaqa Khan


Referencias[editar | editar código]

  1. Amitai-Preiss, Reuven. The Mamluk-Ilkhanid War