Hotel Sacher

De Biquipedia
Ir ta: navego, busca
Hotel Sacher

L'Hotel Sacher ye un hotel de cinco estrelas situato en o districto d'Innere Stadt d'a ciudat de Viena, Austria, chunto a o edificio d'a Opera Estatal de Viena. Ye famoso internacionalment por a suya especialidat culinaria, a tarta Sacher, un pastel de chicolate con mermelada d'albercoque. Bi ha tamién aintro de l'hotel una galería d'arte con una selección obras dende o sieglo XIX. L'hotel se troba en o mesmo puesto a on vivió Antonio Vivaldi.

Historia[editar | editar código]

Una cambra de l'hotel

L'hotel lo fundó en 1876 Eduard Sacher (1843–1892) como una maison meublée. Dimpués d'a suya muerte, a suya viuda Anna Sacher (1859–1930) se convirtió en directora d'o establimiento. Baixo a suya dirección, l'hotel se convirtió en un d'os hotels mas exclusivos d'o mundo, estando un punto de trobada de l'aristocracia y os diplomaticos. Dimpués d'a Primera Guerra Mundial Anna Sacher refirmó a categoría de l'hotel, negando o servicio a clients que no fesen parti de l'aristocracia y dando a la vegada creditos a aristocratas que s'heban empobrecito. A suya chestión levó a o negocio a tener problemas financiers[1] y en zaguerías a la bancarrota, fendo que cambease de propietarios en a decada de 1930.[2]

Dende 1934, l'hotel ye propiedat d'a familia Gürtler, a traviés d'a interpresa de nombre "Eduard Sacher GmbH & Co OHG". Ista interpresa tamién ye propietaria d'un segundo Hotel Sacher en Salzburgo, d'antis mas conoixito como Österreichische Hof.

En rematar a Segunda Guerra Mundial, l'Austria ocupata, igual que Alemanya, fue dividita en quatre zonas entre as potencias aliatas. Viena, como Berlin, se treslalló en quatre sectors. Mientres os anyos d'ocupación britanica l'hotel s'emplegó como cuartel cheneral d'o gubierno britanico y apareixió por ixas envueltas en a cinta de Carol Reed The Third Man.

Dimpués, l'hotel s'ha feito prou famoso en os países de parla alemana debito a la serie de televisión Hallo ... Hotel Sacher, Portier protagonizata por Fritz Eckhardt.

Referencias[editar | editar código]

  1. Matthias, p. 22.
  2. Campbell and Cotter, p. 33.

Se veiga tamién[editar | editar código]

Bibliografía[editar | editar código]

Vinclos externos[editar | editar código]