Guernica (cuadro)
De Biquipedia
|
||||
|---|---|---|---|---|
| Cuatrón informatibo | ||||
| Pintor | Picasso | |||
| Año | 1937 | |||
| Estilo artistico | Cubismo | |||
| Tecnica pictorica | Olio sobre lienzo | |||
| Dimensions | 351 x 776 cm | |||
| Localizazión | Museo Nacional Centro de Arte Reina Sofía (Museu Nazional Zentro d'Arte Reina Sofía) Madrid, España |
|||
O Guernica ye o nombre d'un famoso cuadro de Pablo Picasso, que tien como enchaquia o bombardeyo de Guernica. O Gubierno d'a Republica Española encargó á Picasso un cuadro que emperifolla-se o Pabellón Español mientres a Esposizión Internazional de 1937 en París. Picasso reyalizó un cuadro cubista esprisando a suya bisión d'o bombardeyo y lo clamó Guernica. Ha pasato a estar una obra siñalera.
O cuadro se prenzipió l1 de mayo de 1937 fendo bels estudeos prebios. O 8 de mayo se i ficoron as feguras d'a mai y o caballo. L'11 de mayo prenzipió a tela finitiba que remató o 4 de chunio.
O Guernica de Picasso amuestra presonas, animals y edifizios estricallatos per a biolenzia y o caos cheneratos per as bombas. Ta muitos, iste cuadro refleixa a inumanidá, bestieza y crueleza d'a guerra.
L'austeridá cromatica ye á consonante con o tema d'o cuadro. A primera imachen que Picasso beyó d'o bombardeyo estió á trabiés d'os diyarios franzeses, o que propizia a tioría de que plasmó a orror que el prexinó, refleixando-lo con tons negros e blancos.
A suyo composizión apresta as feguras a modo de "friso" de templo griego, con un encuadramiento triangular d'as mesmas. A mirada diagonal d'a muller d'o cobaxo á la cucha empenta a güellada d'o espeutador de dreita ta cucha, rematando n'o quinque y a bombiella superiors.
Autualmén se troba en esposizión permanent n'o museu Reina Sofía deMadrid, España.
[editar] Istorietas arredol d'o cuadro
- Diz a falordia que en 1940, con París ocupata per os nazis, un ofizial alemán, déban d'a foto d'una reproduzión d'o Guernica, li preguntó ta Picasso que si yera el qui l'eba feito. O pintor li dizió: «No, han estau bustez».
- Diz que cuan Dolores Ibárruri, "A Pasionaria", beyó o cuadro n'o Casón d'o Güen Retiro (Casón del Buen Retiro), dizió con una boz queda y baxa: «A Guerra Zebil ha rematato».
- Cuan o cuadro s'esposó en Nueba York, os treballadors que partizipaban en o armato d'as obras d'a esposizión (a mayoría ni sisquiera conoxeban t'o pintor), se sacoron os cascos de protezión en siñal de benerazión e d'almirazión.
