Gregorio López Raimundo
| Gregorio López Raimundo | |
|---|---|
| Información personal | |
| Calendata de naixencia: | 11 de chunio de 1914 |
| Puesto de naixencia: |  Taust (Cinco Villas, Aragón) |
| Calendata de muerte: | 17 de noviembre de 2007 |
| Puesto de muerte: |  Barcelona (Barcelonés, Catalunya) |
| Ocupación: | Politico |
| Conchuche: | Teresa Pàmies |
| Fillos: | Sergi Pàmies |
Gregorio López Raimundo, naixito de Taust (Cinco Villas) l'11 de chunio de 1914[1] y muerto en Barcelona (Barcelonés, Catalunya) o 17 de noviembre de 2007,[2] estió un politico aragonés, qui desenvolicó a suya carrera politica en a politica de Catalunya, estando-ie Secretaire Cheneral d'o Partit Socialista Unificat de Catalunya.
Contenius |
[editar] As suyas primeras anyadas
Quan Gregorio teneba 12 anyadas, os suyos pais se tresladoron a treballar a la ciudat de Zaragoza, encara que Gregorio, con o suyo chirmán Antonio López Raimundo, quedó en Taust con uns familiars. En 1934 viviba en Barcelona, a on esdevinió miembro d'as Juventudes Socialistas, prenendo parte en 1936 en a creyación d'as Juventuts Socialistes Unificades de Catalunya.
En primerías d'a Guerra Civil morió o suyo chirmán Antonio López Raimundo, sendicalista d'a Unión General de Trabajadores, y Gregorio pasó a melitar en o Partit Socialista Unificat de Catalunya (PSUC), estando comisario politico d'o Exercito Popular Republicano en o Frent d'Aragón dica l'ofensiva de Catalunya, quan trescruzó a muga con Francia ta esdevenir-ie refuchiato politico, estando internato en o campo de concentración de Sant Cebrià de Rosselló.
[editar] A Guerra Civil y o franquismo
Quan esclató a Segunda Guerra Mundial, Gregorio Lopez Raimundo se tresladó en primeras enta Mexico, a on vivió 6 anyads, ta dimpués tornar clandestinament a trescruzar a muga tornando a l'Espanya franquista. Una vegata en trritorio catalán, tornó a organizar o PSUC clandestín en Barcelona, dica a suya detención por a Policía franquista en 1951 quan preneba parte en a vada de tranvías de Bacelona, d'a quala n'estió uno d'os organizadors. Os vecins de Taust organizoron una recullita de sinyaturas ta demanar a suya libertat, estando o primer sinyatario l'alcalde de Taust.[1] En 1952 lo condenoron a 20 anyadas de garchola por as suyas actividatz politicas, no demanando-ie a pena de muerte por as presions internacionals.[1] L'indultoron d'a suya condena, pero l'expulsoron de territorio espanyol, encara que tornó a dentrar-ie clandestinament.
En 1956 l'esleyoron miembro d'o Secretariato y en 1965 Secretaire Cheneral d'o Partit Socialista Unificat de Catalunya, sustituyindo a Josep Moix i Regàs. Dende ixe inte, desenvolicó en a clandestinidat as suyas tascas politicas.
[editar] O restablimento d'as libertatz
En 1977, quan se legalizó o PSUC, l'esleyoron deputato en o Congreso d'os Deputatos por o suyo partito por a circumscripción de Barcelona en as eleccions chenerals espanyolas de 1977, tornando a esleyir-lo en as eleccions de 1979 y en as eleccions de 1982. Dende os suyos cargos politicos, estió firme valedor de l'eurocomunismo que preconizaba o Secretaire Cheneral d'o Partido Comunista de España, Santiago Carrillo.
En 1985 albandonó a primera linia d'a vida politica, anque en 1997 optó por vinclar-se con o PSUC viu, estando-ne o suyo president honorifico.
[editar] Homenaches
- Fillo predilecto de Taust.[1]
- 2001: Medalla d'Oro de Barcelona.
- 2004: Doctor honoris causa por a Univerdidat Politecnica de Catalunya.
- 2005: Medalla d'Oro d'a Cheneralidat de Catalunya.
Antiparte, o cantaire Raimon li adedicó en 1973 a suya canta T'he conegut sempre igual.
[editar] Obras
- 1976: PSUC: per Catalunya, la democracia i el socialisme.
- 1979: Cristianismo y socialismo en libertad.
- 1981: El PSUC y el eurocomunismo.
- 1989: Escrits. Cinquanta anys d'acció (1937-1988).
- 1993: Primera clandestinidad: memorias.
- 2006: Para la historia del PSUC.
[editar] Vinclos externos
- (es) Lopez Raimundo nombrado Hijo Predilecto de la Villa de Tauste en TausteWeb.
- (es) Muere Gregorio López Raimundo, líder del PSUC durante el franquismo y la transición, en El Sueño Igualitario, numero 48.
- (es) Fallece Gregorio López Raimundo, histórico dirigente del PSUC, en o diario La Vanguardia.
| Predecesor: Josep Moix i Regàs |
Secretaire Cheneral d'o Partit Socialista Unificat de Catalunya 1965-1977 |
Succesor: Antoni Gutiérrez Díaz |
