Fraxinus excelsior

De Biquipedia
Ir ta: navego, busca
Fraixin
Fraxinus excelsior - Ardenne 1a.JPG
Fraxinus excelsior
Clasificación scientifica
Dominio: Eukaryota
Reino: Plantae
División: Magnoliophyta
Clase: Magnoliopsida
Orden: Lamiales
Familia: Oleaceae
Chenero: Fraxinus
Especie: F. excelsior
Nomenclatura binominal
Fraxinus excelsior
L.

Fraxinus excelsior (L., 1758), conoixito popularment como fraxín/o u fráixen ye un árbol d'a familia d'as oliacias. Os dos nombres populars d'esta especie conoixen diferents variants foneticas en tot l'Alto Aragón, anque de forma aproximativa se'n podese decir que la primera ye preponderant en a metat occidental d'o territorio, y la segunda en a oriental.

Descripción[editar | editar código]

Lo fraixín ye un árbol alto, capaz de plegar t'os 40 m y 1 de diametro, d'una crosta grisenca que se fende con es anyos. Caducifolio, as suyas fuellas, pinnaticompuestas con entre 7 y 15 foliolos, amesuran de 20 ta 35 cm, y son d'as zagueras en ubrir-se de primavera y d'as primeras en cayer-se d'agüerro si bi ha bella chelata guaire luego. As chemas son negras, a diferiencia d'as pardas d'altras especies de fráixins. As flors, d'un porpra escuro y sin de petalos, s'ubren d'antis que no las fuellas, estando las fembras una mica més luengas.

Habitat[editar | editar código]

L'árbol creix per quasi tota Europa (defueras d'a faixa més septentrional d'Escandinavia y d'a faixa més meridional d'a Europa mediterrania) y en bells puestos d'Asia occidental.

Usos[editar | editar código]

A fusta de fraixín ye estata tradicionalment usata en Europa como material ta fer arcos, mangos de ferramientas, gayatas u raquetas de tenis, entre altras cosas, gracias a la suya alta flexibilidat y resistencia. Tamién s'ha feito servir t'os fogarils perque crema prou bien dica quan que ye plegata de tallar.

Curiosidatz[editar | editar código]

L'árbol da nombre a bells toponimos; ixemplos en son Fraxén (en a val de Broto, comarca aragonesa de Sobrarbe), El Fraixno en a Comunidat de Calatayú, La Fraixneda en o Matarranya u la ciudat californiana de Fresno (que ye «fraixin» en castellán).