Follín

De Biquipedia
Ir ta: navego, busca
Emisión de grans cantidatz de follín per as chamineras d'un cambión diesel.

O follín (tamién dito fullín) ye un conchunto de particlas solidas de mida chicota de composición predominant de carbonio que se son despresas de materials ricos en ixe elemento quan se creman, tals como la matiera, lenya u lo carbón. Tiene l'aparienza pareixita d'a cenisa, pero con color de regular més fosca que no esta.

No ye mica estranyo de trobar-lo en grans cantidatz en as chamineras, cremallos y calders esposatos a l'acción d'o fuego, y tamién las surtitas de combustión d'as calderas. Per a suya color negra, ye un d'os colorants més antigos emplegatos ta dar-le ixa coloración a os materials, y per ixo encara enguán se gosa producir a escala industrial como colorant, con calderas lur chamineras d'extracción tienen dispositivos especials ta la captación d'este material. Un d'os nombres comercials d'o follín como colorant ye negro de fumo.

Os gases d'escape d'os motors que emplegan combustible diesel tamién gosan dipositar follín en as conduccions per on amaneixen, perque pueden contener hidrocarburs asorbitos, fetos prencipalment de lubricants y restas de combustible no cremato. A demés, tamién pueden contener restas d'altras sostancias solidas como oxidos de metals y compuestos sulfuratos.

Tamién se i solen trobar grans cantidatz d'esta material a dintro d'os transformadors de potencia electrica que son refricheratos con aceite dielectrico dimpués que i aiga pasato un accident. Ixo ye perque l'apariello posei matiera en a parte interior y quan lo fallo eletrico produce garra arco voltaico, este preboca que l'aceit se creme deixando-ie las ditas cantidatz de follín en as paretes interiors d'a cuba d'o transformador.

Vinclos externos[editar | editar código]