Fogache de 1495
De Biquipedia
O fogache de 1495 ye un fogache que encomendó lo rei d'Aragón Ferrando II o Catolico ta cullir o impuesto d'as sisas.[1] Debant d'o periglo d'una agresión de Carlos VIII de Franzia á o reino, y ante o problema d'a peste negra que afeutaba a las chuderías d'o reino,[2] Ferrando II combocó Cortes d'Aragón ta fer que aprebasen a formazión d'un exerzito de 4.000 ombres,[3] y l'aduya economica nezesaria. As Cortes alcordaron aportar pa ista fin a cullita de l'impuesto d'as sisas, que yera un impuesto sobre articlos de primer nezesidat.
Pa ista fin se trestalló Aragón en 12 sobrecullidas[1] (dibisions fiscales almenistradas por un sobrecullidor), y s'ordenó una imbestigazión d'a poblazión aragonesa recontando os fuegos d'o reino. Pa fer ixe recuento caleba que un comisario besitase toz os lugars abitaus chunto con un notario que en dase fe. Tamién yeran acompañaus d'una patrulla melitar pues en bels lugars no yeran bien rezibius (o recuento iba á serbir ta cobrar impuestos). As sobrecullidas estioron: Zaragoza, Alcañiz, Montalbán, Tergüel-Albarrazín, Daroca, Calatayud, Tarazona, Uesca, Chaca, Aínsa, Balbastro y Ribagorza.[1]
A sisa senzilla estió de 13 sueldos por fuego ta lugars de 99 fuegos u menos, 16 sueldos por fuego ta lugars de 100 fuegos u más, y 21 sueldos por fuego t'as ziudaz. A sisa doble estió, respeutibament, de 16, 22 y 33 sueldos por fuego.
En o fogache s'endica o numero de fuegos de cada lugar, villa u bicos (en o caso d'as ziudaz). Se i cuaternan os nombres d'os representants d'o lugar que "manifestaban" os fuegos que bi eba (o bicario, o churau, l'alcait, atros testes...). Se fa tamién una relazión nominal d'os fuegos, cuaternando-ie o nombre d'o cabeza de familia (encara que as biduas que son cabeza de familia amaneixen bellas begadas por o suyo nombre, y atras como bidua de... u madre de...). Un fuego tamién podeba estar un monesterio, etz.
En bels casos, trobamos informazión adizional postpuesta á o nombre, como ye l'ofizio (çapatero, texedor, pelayre...), o cargo que teneban (jurado, justicia, alcayde), u mesmo si yeran pobres (endicau con parolas como: pobre, muy pobre, pobre de bacín, pobre que no tiene res, pobre vergonyant, por Dios, pobre loco o miserable ...). As anotazions que se i fan son diferents seguntes as sobrecullidas. Tamién i amaneixen fuegos moriscos, que en bels lugars son mayoría. Mesmo bi eba lugars abitaus nomás que por moriagos. Cal remerar que os chodigos eban estau forachitaus d'o reino 3 años antes, en 1492.
O total de fuegos recontaus en o reino fue de 51.056, trestallaus en sobrecullidas como sigue:
[editar] Referenzias
|
