Florín (meyebal)
De Biquipedia
Lo Florín yera una moneda meyebal orichinaria de Florenzia que dimpués s'imitó en tota Europa.
Contenius |
[editar] Orichens
En los testos latins con elementos romanzes que s'escribiban en l'aria aragonesa se zitan ya los florinos como elemento romanze en meyo de lo latín d'ixos testos:
- et pectavit mihi mille florenos et insuper habebo. (1172)
En baxo latín se documentan los florins un testo de 1252 d'atra zona e seguntes l'autor Niermeyer marca lo prinzipio de la suya acuñazión en Florenzia.
[editar] Florín de Florenzia
Lo Fiorino d'oro yera l'aureu tipico de Florenzia, e se clamaba asinas por que se i marcaba lo lirio de los Medici. La suya balura tenió bariazions e Yanguas comenta que se graduaba con sueldos de plata, seguntes lo curso que teneban en los mercatos, u se fixaba enantes en los contratos. En Nabarra teneban la balura nominal de 30 sueldos. En Cataluña zerculó dende lo sieglo XIII dica lo sieglo XVI e teneba la balura que oszilaba entre 11 e 17 sueldos. Los aragoneses e nabarros en deziban Florín de Florença, como se bei escrito en testos notarials e comerzials.
[editar] Florín d'oro d'Aragón
Por orden de Pero IV d'Aragón, en 1346, prinzipioron á acuñar en Perpiñán florins clamatos en catalán Florí d'or d'Aragó. Dende 1365 tamién se fabricoron en las zecas de Barzelona, Balenzia, Mallorca e Zaragoza. Sin d'embargo en Zaragoza nomás que por tres añadas, car los estamentos aragoneses establioron que lo diner chaqués de bellón continase estando la unica moneda de lo reino.
Teneba de balura onze sueldos de menutos. La lei d'esta moneda yera de 24 quilaz menos cuarto. Seguntes Mateu e Llopis en 1464 baleban 14 sueldos en tota la Corona d'Aragón. Seguntes Borau lo florín d'oro baleba 20 sueldos en 1439 e 16 en lo reinato de Carlos I d'España. Simonet da notizia de lo florín d'Aragón, que s'introduzió en Florenzia.
[editar] Referenzias
Maria Rosa Fort Cañellas. LEXICO ROMANCE EN DOCUMENTOS MEDIEVALES ARAGONESES (Siglos XI y XII). Departamento de educación y cultura de la DGA.
