Ernst Kaltenbrunner
De Biquipedia
|
||||||||||||
.svg){kind=small}
Ernst Kaltenbrunner, naxito de Braunau am Inn (Imperio Austro-Ongaro, güé Alta Austria, Austria) o 4 d'otubre de 1903 y muerto executato o 16 d'otubre de 1946 en Nürnberg (Babiera, Alemaña) dimpués d'os Chudizios de Nuremberg, estió un abogato y politico austriaco con una important partezipazión en o Terzer Reich alemán dimpués d'o Anschluss, en estar miembro d'as Schutzstaffel (u SS), con o ran de cheneral, y chefe d'a Gestapo, a prenzipal organizazión polizial d'o Terzer Reich.
Contenius |
[editar] Primeras añadas
Kaltenbrunner, que yera orichinario d'a mesma rechión d'Austria que Adolf Hitler, fazió estudeyos de Dreito en a Unibersidat de Graz, en militando en ixas embueltas en grupos paramelitars austriacos partidarios de l'anesión d'Austria por Alemaña. Asinas, en 1930 se fazió melitant d'o Nationalsozialistische Deutsche Arbeiterpartei y en 1931 d'as Schutzstaffel. Encara que antis d'o Anschluss yera nomás un informador en Austria d'o chefe d'as SS, Heinrich Himmler, Kaltenbrunner puyó á escape en a cherarquía nazi austriaca, y en 1934 fue engarcholato por as suyas autibidaz por o Gubierno austriaco d'Engelbert Dollfuss, acusato d'alta traiduría, estando luego condenato á seis meses de garchola.
[editar] Dimpués d'o Anschluss
Dimpués d'o Anschluss, l'anesión d'Austria por o Terzer Reich, Himmler nombró á Kaltenbrunner chefe d'as Schutzstaffel en l'antigo territorio austriaco.
[editar] En a guerra
Dimpués de prenzipiar a Segunda Guerra Mundial, o 30 de chinero de 1943, Kaltenbrunner fue nombrato chefe d'o Sicherheitsdienst u SD, o serbizio d'informazión d'o Nationalsozialistische Deutsche Arbeiterpartei, establito en 1931 por Reinhard Heydrich, y tamién fue nombrato chefe d'a Reichssicherheitshauptamt u RSHA, a Polizía de Seguredat alemana, sustituyindo-ie á Heinrich Himmler, que asumiba ixas funzions dende l'asasinato de Reinhard Heydrich por a Resistenzia checoslobaca en 1942 en Praga.
Teneba asinas á la suyas ordens a os Einsatzgruppen, responsables de más de 600.000 asasinatos en a retaguardia d'o Frente Oriental, y tamién á la Gestapo.
O 20 de chulio de 1944, cuan l'atentato cuentra Hitler feito por Claus von Stauffenberg, Kaltenbrunner estió o imbestigador y responsable d'as detenzions y execuzions d'os conspiradors.
[editar] Final d'a guerra
En os zaguers días d'a Segunda Guerra Mundial, os treballadors de Biena fazioron una sulebazión cuentra o Terzer Reich antis de dentrar en a ziudat o Exerzito Royo sobietico, y Hitler bi nimbió á Kaltenbrunner ta reprimir-la, encara que os sobieticos prenioron a ziudat antis de que Kaltenbrunner bi plegase. Ernst Kaltenbrunner dezidió no tornar ta Berlín, que yera ya en plena batalla de Berlín, y partió ta os Alpes de Babiera, á on se deziba que as Schutzstaffel farían a zaguera resistenzia á os Aliatos.
Feito preso en Alt-Aussee por o Exerzito britanico o 15 de mayo de 1945, fue nimbiato á o Reino Unito ta estar interrogato, estando acusato en os Chudizios de Nuremberg de crimens de guerra y crimens cuentra a umanidat. Kaltenbrunner bi negó toda responsabilidat, negando mesmo que a suya firma en os decumentos estase autentica. Sin d'embago, as fotografías d'o catalán Francisco Boix estioron dezisibas ta contrimostrar as suyas besitas á o campo de conzentración de Mauthausen-Gusen. Condenato á muerte, fue enforcato o 16 d'otubre de 1946 en Nürnberg.
