Eneas

En a mitolochía romana, Eneas (en griego antigo Αἰνείας, Aineías, en latín Aeneas) ye un heroe d'a guerra de Troya, que dimpués d'a caita d'a ciudat aconsiguió escapar, emprendendo un viache que lo levaría dica a tierra de Lazio (en l'actual Italia) an dimpués d'una serie d'escayecimientos se convirtió en rei y a la vez en o prochenitor d'o lugar romano, pus en ixa mesma tierra dos d'os suyos descendients, Romulo y Remo, fundarían a ciudat de Roma. Yera fillo d'o principe Anquises y d'a diosa Afrodita (Venus en a mitolochía romana); o suyo pai yera amás primo d'o rei Príamo de Troya. Se casó con Creusa, una d'as fillas de Príamo, con a quala tenió un fillo, clamau Ascanio u Iulo; en a suya fuyida d'a ciudat acompanyau de toda a suya familia, a suya esposa murió en a ciudat, se le amaneixió tiempo dimpués como una pantasma ta dicir-le que no sufrise por a suya muerte, pus ixe heba estau o suyo destín, asinas como o destín d'Eneas sería d'estar o pai d'una gran nación. Posteriorment ya en a tierra de Lazio, se casó con a princesa Lavinia, filla d'o rei Latín, unión ista a que ye l'orichen mitico d'o lugar romano.