Elephantidae

Elephantidae
comparanza entre o elefant asiatico y o elefant africán
Clasificación scientifica
Dominio: Eukaryota Reino: Animalia Filo: Chordata Clase: Mammalia Orden: Proboscidea Familia: Elephantidae

A familia Elephantidae ye a sola familia actual de l'orden d'os proboscidios, orden de mamiferos caracterizato por a trompa u proboscide.

Se caracterizan por tener molars hipsodonts. A lo principio encomienza a gastar-se a primera dient de cada hemimandibula, dimpués a segunda, dica que no bi ha que una dient funcional, y quan s'ha gastato reapareix a primera.

No bi ha defensas en o maxilar inferior, no bi n'ha que en o maxilar superior. As formas actuals son tropicals y tienen a piel quasi espullata, (mantenendo bells vestichios de pelo). Manimenos en os primers meses de vida tienen pelache regularment distribuito, y bi habió formas pelutas en o pasato cheolochico, (os mamutz).

Bi ha glandulas odoriferas en a frent.

Bi ha un par de mamas peitorals.

A clasificación d'as formas fosils cambeya muito d'alcuerdo con os autors. Cheneros basicos son:

• Herperorloxodont (extincto)
• Loxodonta (os actuals elefants africans son d'este chenero: Loxodonta africana y Loxodonta cyclotis)
• Paleoloxodont (chenero exctincto, común en Europa en os periodos interglaciars y que chenero especies menutas en as islas mediterranias)
• Mammuthus (chenero extincto que colonizó tundras y taigas y pasó a America d'o Norte).
• Elephas (l'actual elefant asiatico, Elephas maximus ye d'este chenero).

Zoonimia

O elefant (en especial l'asiatico) ye mencionato en o "Libro d'el Trasoro":

Dientes son de boyre, et su pico es clamado promoistre, que es senblant a la serpient. Con aquel pico prende la bianda e metela en su boca, et es asi de grant fuerça que el quiebra tanto quanto el fiere.

E asi dizen los crimoneos que el .ij. enperador Fedric ne aduxo vno en Crimonja, que le enbio preste Iohan de las Indias, que ellos lo vieron ferir de su pico vna asna cargada asi fuert que el la gita en vna casa. E es el elefant muy fiero, no por que el viene

...fria; e dizen aquellos que visto lo han que el elefant quando cahe no's puede leuantar por todo su poder, por que el no ha en los ginollos njnguna juntura; mas natura, que todos animales guja e dreça, le muestra a cridar ad alta voz, tanto que todos los otros elefantes de la tierra...

Tamién ye citato en Secreto Secretorum:

Et piadoso como la tortol et maliçioso como la leona et es priuado de casa como la paloma et es artero et enganyoso como la rrabosa et sinple como el cordero et quexoso et leugero como la rebeca que quier dez[i]r cabra montesa Et es perezoso ansi como el honso et es preçioso et amado como el elefant

Una variant antiga d'a parabra elefant en totas as luengas escritas d'a Edat Meya yera Olifant y ye tamién como se conoix a un traste de viento feito de vori de catirón d'elefant.