Dolmen

De Biquipedia

Un dolmen ye una costruzión megalitica feita con dos losas (ortostatos) fincatas en la tierra en posizión bertical e una losa de cubierta apoyata sobre ellas en posizión orizontal; tot ixo enronato, formando un tumulo. La parabra probién de lo bretón "mesa de piedra".

Bi n'ha en Europa Ozidental, sobre tot en la frontera atlantica, e las costruyoron en lo neolitico final e calcolitico. Lur funzión se crei que ye de sepulcre comunal, pero tamién se crei que puet estar una forma de siñalar que lo terreno pertenex a la comunidat umana que apedeca los muertos en ixe dolmen.

[editar] Tipos

Los models planers de dolmens son dos u més losas berticals e denzima una d'orizontal, por un regular acompañatas con atras piedras arredol de grans dimensions.

Cuan s'añade a lo dolmen un corredor que lo coneuta con l'esterior se'n diz que ye un sepulcre de corredor, con cambra que puet estar costruita con grans losas (clamatas ortostatos) e una falsa cupula feita con losas u aber-se entallato en la roca.

Un terzer tipo de tumba megalitica ye la de galería, on lo corredor no se diferenzia de la cambra, e a begatas tien un pilar pa sostener las pesatas cubiertas.

[editar] Dolmens en l'Alto Aragón

L'Alto Aragón ye entre dos de los cuatro focos megaliticos que gosan considerar los preistoriadors en España (o nuclio basconabarro e o nuclio catalán). Los dolmens de l'Alto Aragón tienen dimensions reduzitas en comparazión a los dolmens d'estos dos nuclios megaliticos.

Encara que puet que i aiga por lo menos un megalito en cada bal perinenca, la mayor conzentrazión de dolmens se da por una parte en l'Alto Aragón ozidental entre la Guarguera e la Bal d'Echo e por atra en lo Prepirineu oriental.

Por los axugars funerarios los dolmens més antigos de l'Alto Aragón calendan de lo calcolitico e son més tardanos que beluns d'Alaba que calendan de lo neolitico superior. Se sape que bels dolmens de l'Alto Aragón los reutilizoron en epocas posteriors, (en Asturias se conoxen reutilizazions dica l'Alta Edat Meya). Uno de los dolmens de Santa Elena en Biescas tien materials de la Edat de lo Bronze que endican contautos con la cultura de l'Argar.

Por la mesma razón que los dolmens fuoron reutilizatos se puet pensar que bels dolmens calendatos como calcoliticos podioron estar tamién en reyalidat reutilizatos en lo calcolitico, tresbatir-se allora lo suyo material neolitico e remontar-sen a lo neolitico superior.

En los zagueros sieglos s'han perdito bels dolmens, como por exemplo en Pauls (Biello Sobrarbe), on lo bicario se lebó la losa superior de lo dolmen que bi eba a lo costato de la carretera e la adibió a la ermita.

Lo famoso dolmen de Santilena ye una recostruzión de lo que i eba enantes de la guerra zebil con las mesmas piedras.

Pero la trasformazión de lo territorio tamién ha contribuito a que se conoxcan dolmens nueblos como lo de Seira, que se descubrió cuan se desfeba lo suyo tumulo con enchaquia de costruzión d'infrastruturas eletricas.

Bels preistoriadors especulan que las comunidaz que costruiban dolmens en los Perineus entre Cataluña e lo País Basco podioron estar portadors de luengas de la familia de lo basco en base a que la presenzia de toponimia basca en Cataluña, Aragón e Oczitania coinzide con la presenzia d'estos megalitos, que son anteriors a la plegata de los pueblos indoeuropeus.