Dique (cheolochía)

De Biquipedia
Ir ta: navego, busca
Dique chico en Baranoff, Alaska
Diques en Black Canyon, en lo Parque Nacional Gunnison, Colorado, USA.

Un dique ye en cheolochía una formación de rocas ignias de forma tabular. La suya grosor ye de muito menor que las atras dimensions y puet variar dende qualques milimetros dica muitos metros devez que la suya extensión laterar puet plegar dica muitos kilometros.

Un dique traviesa capas u cuerpos rocosos preexistents, lo que implica que un dique siempre ye mes recient que la roca en la que ye meso. Quasi siempre se presentan muito abocaus u quasi verticals, pero la deformación tectonica puet provocar la rotación de los estratos travesaus por lo dique d'una traza que lo dique quede horizontal. Un dique se diferencia d'un sill en que lo sill ye paralelo a la estratificación orichinal.[1]

Los diques se troban a sobén en ixambres radials u concentricos arredol d'intrusions plutonicas u de zonas d'alimentación de vulcans. Bi ha diques en ixambres paralelos u radials arredol de chamineras volcanicas y bi ha diques anulars arredol de cambras magmaticas escachadas.[1]

A diferencia d'atros plutons los diques precisan d'un esfuerzo tectonico que trenque la roca y desparta las masas rocosas resultants. Las fracturas pueden fer-se por inchección forzada de magma en lo caso de los diques radials, por colapso en lo caso de los diques anulars, y por distensión rechional en lo caso de los diques paralelos.[1]

Los diques pueden tener una composición basaltica, granitica, riolitica, diabasica u atra. Bi ha diques pegmatiticos ligaus a zaguers estadios d'una intrusión granitica. Los diques apliticos son formaus por una roca de gran fin con composición grantica. Bi ha cinco tipos petrograficos de diques: diques mafico-porfidicos, diques de quarz y feldespatos alcalins, aplitas graniticas, diques d'epidota-quarz y brechas hidrotermals.

En A Buerda, Piarruego y Rebiella se diz lardos a las vetas blancas de la piedra[2] por lo suyo pareixiu superficial a la disposición en vetas de lo teixiu adiposo en los animals. Por estar blanquencos esta denominación de lardo se puet aplicar a los diques de quarz-feldespatos alcalins si son chicos.

Se puet trobar diques escuros de lamprofido en Panticosa a la entrada de lo casco glacial y en a entibadera de lo Ibón Alto de Vachimanya.[3]

Referencias[editar | editar código]

  1. 1,0 1,1 1,2 (es) Francisco Anguita Virella, Fernando Moreno Serrano: Procesos Geológicos Internos. Editorial Rueda. Madrit 1991, pp 90-95
  2. (an) Chorche Chortés, Antonio Martínez: Replega d'aragonés en A Buerda, Piarruego y Revilla. Revista Fuellas, numero 95, mayo-abril 1993. pp 7-12
  3. (es) Miguel Calvo (coordinador): Minerales y rocas, de la colección Guías de campo de Aragón. Editorial Prames, 2013. pp 104.

Bibliografía[editar | editar código]

Veyer tamién[editar | editar código]