Dinastía d'os Comnenos

De Biquipedia
Ir ta: navego, busca

A dinastía d'os Comnenos estió una familia que gobernó en o Imperio Bizantín principalment entre os sieglos XI y XII. Representaba os intreses d'a nobleza terratenient d'o medio rural descendients d'os campesins-soldatos d'os themas bizantins. En a obra de Chuan Ferrández d'Heredia l'apellito s'escribe "Comneno" por un regular y a vegatas en o "Libro de los fechos et conquistas del principado de la Morea" como Comnino.

Alexo I Comneno (1081) habió de luitar contra os normandos, que amés de mantener-sen bellas anyatas en Dyrrachion, feban incursions por Macedonia, Tesalia y Epiro baixo Baimundo de Tarento.

En Costantinoble creixeba o sentimiento anti-latino y se refirmaba a Henrique IV contra o Papato. Se concedió a Venecia privilechios comercials en 1084 pa asegurar-se la suya aduya naval.

Aleixo habió de combatir a los pazinacos, que invadioron Tracia en 1086 y plegoron a asitiar Costantinoble en 1091. Los redotoron en 1091 en Mont Lebunion d'una traza decisiva, con l'aduya d'os cumans.

Quan encomenzó a primera cruzata o Imperio no yera en periglo inmediato. Aleixo I yera intresato en reclutar mercenarios occidentals pero no heba demandato aduya a lo Papa de Roma Urbán II. Acullió a los cruzatos con desconfianza y recelo. Entre os cruzatos i heba enemigos naturals de Bizancio como os normandos d'o sud d'Italia. Con tot y con ixo consiguió que os suyos chefes acceptasen prou l'autoridat imperial y un compromís que entregasen a Costantinoble os territorios que conquerisen y que hesen estato bizantins en tiempos inmediatament anteriors.

Gracias a los cruzatos o Imperio recuperó Nicea, Dorilea, Efeso y atras plazas que aseguraban o control d'a Mar Echea, pero o Emperador habió d'acceptar a formación d'os principatos d'Edesa y Antioquía, on os cruzatos tenioron a colaboración d'os armenios locals. Baimundo de Tarento, sinyor d'Antioquía prebó d'atacar Illiria en 1107, pero fue redotato y rindió vasallache a lo emperador por o suyo principato en 1111. O suyo succesor Tancredo se negó a renovar-lo.

Con Chuan II Comneno (1118-1143) y Manuel I Comneno (1143-1182) continó a restauración d'o poder bizantín, con mayor atención a los afers d'os Balcans. Os latins iban ocupando as rutas y mercatos d'a Mediterrania oriental, y os turcos continaban como un periglo latent en as mugas asiaticas. En 1122 fracasó a zaguera incursión d'os pazinacos en os Balcans y Chuan II podió sozmeter bien a los serbios y encarar-se con os hongaros en Croacia y Dalmacia, a lo tiempo que examplaba os privilechios conceditos a Venecia en 1126 y os que Pisa teneba en Costantinoble en 1111. A lo mesmo tiempo miraba de fer liga con o Sacro Imperio Román Chermanico pa contrarrestar a influencia normanda en o sud d'Italia, on Rocher II de Secilia prenió o títol de rei en 1130. En l'ambito oriental se consiguió recuperar o vasallache d'Antioquía entre 1137 y 1142, y a recuperación d'a costa d'a Mar Negra en l'aria de Trapisonda.

Manuel I Comneno prebó d'ir més luent, sobretot dimpués d'o fracaso d'a segunda cruzata. Se facioron peyors as relacions con Loís VII de Francia, con Conrado II d'Alemanya y Frederico I y con a Republica de Venecia. Entre 1155 y 1170 concedió privilechios comercials a Chenova y en 1170 renovó os privilechios de Pisa. Rocher II ocupó Corfú en 1147, y encara que fue forachitato por os venecians, aduyó a los serbios quan en 1149 se rebeloron.

O exercito bizantín desembarcó en o sud d'Italia y i habió una guerra contra os normandos d'Italia entre 1155 y 1158 en a que Frederico I y Venecia se posoron en contra de Costantinoble.

Manuel I consiguió por bellas anyatas sozmeter Serbia, dominar en Croacia y confiscar os biens venecians en Costantinoble y suspender-ie o comercio venecián en 1171 en un tiempo que o Papato s'amanó cheopoliticament a la Liga Lombarda, a Hongría (fendo liga en 1164) y a las republicas mercantils de Chenova y Pisa.

Manuel I recuperó por bellas anyatas a supremacía bizantina en afers orientals fendo liga con o Reino de Cherusalem y recuperando o dominio sobre Antioquía en 1159, en un tiempo que os cruzatos veyeban a suya situación peyor debant d'a unificación d'Echipto y Siria. A expedición de griegos y latins en o delta d'o Nilo fracasó. Manuel I habió de reaccionar quan en 1162 se crebó o tractato de Paz con os turcos de Rum, y en 1176 Kilij-Arslan II li inflichiba una derrota en Myriokephalon (batalla que significó a fin d'o control bizantín en Asia la Menor). En 1179 Bizancio perdió o sistema de ligas con os vicins occidentals quan Frederico I y a Liga Lombarda firmoron a paz. Os recursos de Bizancio quedoron acotolatos, perdió a iniciativa en a politica exterior, mancaban recursos militars y financiers. A l'este i yera o periglo turco, a l'ueste i heba estatos hostils y en os Balcans i heba pueblos que se rebelaban. Dende 1180 creixioron os problemas y o poder imperal decayó.

A rechencia d'Alexo II Comneno fue asumita a la fuerza por Andronico I Comneno en 1182, qui ocupó a cadiera imperial en 1183. En 1182 i habió una revuelta contra os comerciants occidentals en Costantinoble, uns 60.000, que fuoron forachitatos y debastoron as islas d'a Mar Echea.

Ya en 1183 Andronico I Comneno procuraba compensar a los venecians y favoreixer o suyo reestablimiento en a ciudat. En 1185 os normandos ocuporon por bell tiempo Tracia y Salonica, dica que los derrotó Isac II Ánchel, qui succedió a Andronico I, asesinato en una revuelta.

Bibliografía[editar | editar código]

  • Jose-Ramón Julià: Atlas de Historia Universal. Tomo I De los orígenes a las crisis del siglo XVIII. Editorial Planeta.