Dinastía Ming

De Biquipedia
Ir ta: navego, busca
Articlo d'os 1000
大明
Gran Ming
3by2white.svg 1368 — 1644 3by2white.svg
China Qing Dynasty Flag 1889.svg
Situación de Dinastía Ming
Capital Nanquín (1368-1421)
Pequín (1421-1644)
Idioma oficial Chinés
Gubierno Monarquía
 • Formación 1368
 • Desaparición 1644

A dinastía Ming estió una dinastía que gobernó en China succedendo a la dinastía Yuang y precedendo a la dinastía Qing. Estió una dinastía autoctona.

Orichen[editar | editar código]

En a decada de 1350 dimpués d'una rebelión en o baixo Yangzi se funda un estato con capital en Nankín que se proclama continador d'os Song. En 1366 Zhu Yuanzhang, un campesín se fa con o control d'a rebelión. Dos anyatas més tarde funda en Nankín a dinastía d'os Ming y esdevién o emperador Hongwu. En 1369 fuye de Pequín o zaguer emperador Yuang (dinastía d'orichen mongol), y os mongols orientals son derrotatos quasi pa cutio.

O nuevo rechimen[editar | editar código]

Hongwu se considera hereu d'os Han, no d'os Song, y veye en l'agricultura a riqueza de China en cuenta de veyer-la en o comercio. Ye un autocrata que desconfía de l'administración. Bi ha un desentendimiento entre o gobierno imperial y a sociedat mercantil d'o baixo Yangzi, y tamién entre l'administración (neoconfucianista) y a cort, (on os eunucos que dependen dreitament d'o emperador tienen cada vegata més poder). Os eunucos dirichen as policías secretas. Hongwu muere en 1398. O emperador Yongle cambeya a capital en 1421, esleyendo Pequín.

A navegación[editar | editar código]

Alavez os navilios chineses yeran millors que los d'os europeus. Yongle encarga a lo eunuco Zheng He grans expedicions maritimas (entre 1405 y 1433 se'n fan siet). Zheng dica arriba en Insulindia, India d'o Sud, Golfo Persico, Mar Roya y Africa oriental. L'obchectivo ye diplomatico, persuadir a los estatos vesitatos que reconoixcan a sobiranía chinesa.

En 1433 as expedicions deixan de fer-se porque son costosas, os mandarins s'oposan a lo contacto con forans y a lo poder d'os eunucos. Anyatas dimpués que os chineses deixasen de fer expedicions, as expedicions portuguesas pasarán ya o cabo de Buena Esperanza.

Luita contra os mongols[editar | editar código]

En a decada de 1430 os mongols occidentals se fan més poderosos que os mongols orientals u oiratos y esdevienen una amenaza pa os chineses. En 1449 os mongols orientals derrotan a los chineses en Shanxi, fan prisionero a lo emperador y saqueyan o norte de China.

Pa protecher-sen d'os mongols orientals, que no consiguen creyar un mando unificato y tamién luitan entre ellos, os Ming reconstruyen a Gran Muralla dende 1474. O mongol occidental Dayan Can esdevién un nuevo lider mongol, y a fins d'o sieglo XV infliche a los chineses grans derrotas. En a decada de 1550 Altan Khan, o suyo nieto, torna a atacar a los chineses en a redolada de Pequín, y consigue un tractato comercial que lo beneficia en 1574.

L'arribata d'os europeus[editar | editar código]

Dimpués de fer-sen con Malaca en 1511, os portugueses plegan a las costas de China en 1514. Pretenden negociar con as autoridatz imperials, pero ya os emisarios d'o soldán de Malaca heban advertito a los chineses como yeran os portugueses. Prohiben o comercio con os europeus pero os chineses d'o sud comercian clandestinament. Os portugueses s'estableixen en Macau en 1535 y i fundan una colonia dende a decada de 1550, en uns tiempos que una piratería chaponesa con mayoría chinesa fa pitanzas en a costa dende Shandong dica Guangdong. A piratería plega a un apocheu entre 1540 y 1565, en un tiempo que a marina imperial ye abandonata dende fa un sieglo y no puet reaccionar. As autoridatz evacuan as zonas litorals dando a espalda a la politica maritima.

Macau atraye a los chesuitas, que aprenden chinés. En 1601 o chesuita italián Matteo Ricci s’estableix en Pequín y despierta l'atención d'a clase intelectual chinesa con a suya astronomía. Ricci emprende o suyo apostolato evitando considerar o culto a los antipasaus como incompatible con o cristianismo. A posición de Ricci y atros chesuitas d'a suya escuela fará que en o futuro lo critiquen y orichinará a disputa d'os ritos chineses en a ilesia catolica.

A decadencia d'os Ming[editar | editar código]

En 1592 os chaponeses invaden Coreya. Os Ming aduyan a lo suyo reino tributario, encomenzando una guerra que dura dica 1598. A principios d'o sieglo XVII bi ha una grau crisi politica entre os eunucos y l'alta administración. Puyan os impuestos y bi disturbios. Dende 1627 as revueltas son cada vegata més lumerosas y ixemenatas. En 1643 un d'os cabos rebels, Li Zicheng, proclama una nueva dinastía en Xi'an, y a l'anyo vinient entra en Pequín.

Bibliografía[editar | editar código]

  • Jean Sellier: Atlas de los pueblos del Asia meridional y oriental. Acento Editorial.