Dieta Atkins

De Biquipedia
Ir ta: navego, busca

A dieta Atkins ye una dieta que suprime os hidratos de carbonio y fa que l'organismo consuma os lipidos, estando una d'as dietas más populars y controvertidas.

O suyo autor, o cardiologo estatounitense Robert C. Atkins, estió uno d'os primers en identificar bells tipos de carbohidratos como a causa más important d'a obesidat. Simplificando a tesi de l'autor, podríanos decir que bells tipos de carbohidratos refinaus provocan en os individuos con estendencia a estar obesos una reacción en os nivels d'insulina en sangre. A insulina, que ye a hormona que regula o nivel de glucosa, actúa ta que ista torne ta os suyos nivels normals, convertindo ixos aportes de glucosa primero en glucocheno (que s'almazena en os musclos y sirve de combustible más inmediato) y dimpués en grasa.

Seguntes o doctor Atkins, a restricción en o consumo de carbohidratos refinaus (zucre, farinas blancas refinadas, amelons...) fa que os nivels d'insulina en sangre se mantiengan baixos. Malas que s'acotolan as reservas de glucocheno d'os musclos (que no gosan durar más de 48 horas), o cuerpo dixa de disponer de glucosa como fuent d'enerchía, y s'enchega alavez un mecanismo (natural y sin contraindicacions) de lipolisi. A lipolisi ye a obtención d'enerchía fendo servir como combustible as grasas en puesto d'a glucosa. Iste mecanismo de crema de grasas permite perder os kilos que s'han puesto ir amogolonando en una persona en muito tiempo.