Decretos de Nueva Planta

De Biquipedia
Ir ta: navego, busca
Portalada d'os Decretos de Nueva Planta de 1716

Os Decretos de Nueva Planta son o conchunto de decretos promulgaus por Felipe V d'Espanya en a Guerra de Succesión Española, entre 1707 y 1716, por os quals se transformó a organización d'os territorios d'a Corona d'Aragón (Valencia, Catalunya, Balears y Aragón).

A Corona d'Aragón refirmó a candidatura de l'archiduque Carlos d'Austria a o trono espanyol, contra o candidato francés Felipe de Borbón, refirmau por a Corona de Castiella. A derrota d'as tropas de l'archiduque en a batalla d'Almansa, o 25 d'abril de 1707, ubrió as puertas d'os reinos d'Aragón y Valencia a l'exercito d'os Borbons.

O 29 de chunio de 1707 s'emitió un decreto que suprimiba la organización politica d'Aragón y Valencia pa implantar-sen as leis propias de Castiella, y se chustificaba a decisión por a rebelión d'ixos reinos y o dreito de conquista. O decreto no aclariba brenca cómo s'heban d'organizar enta debant -o Decreto quereba castigar a os reinos rebels, y no pas creyar una nueva organización estatal-, y por ixo mientres seguiba la Guerra de Succesión o caos politico y chudicial estió completo.

En 1711 s'emitió un segundo decreto que afectaba, mas que mas, a Aragón: s'organizó a nueva Audiencia de Zaragoza que gobernaría enta debán o reino, y sobretot se reinstauró o dreito aragonés p'as relacions entre os aragoneses, que s'ha manteniu vivo dica l'actualidat.

Entre 1715 y 1716 se completó a Nueva Planta d'a Corona d'Aragón, con decretos parellanos que afectaban a Catalunya y Balears. En os dos casos, os Decretos de Nueva Planta yeran millor planificaus que en 1707, pero también mostroron especial rigor con Catalunya, centro d'a resistencia austracista. Se vedó l'uso oficial d'o catalán, s'eliminoron as veguerías y se zarró a Universidat de Barcelona, encara que igual que en Aragón se conservó o dreito civil.

A conseqüencia d'istos decretos estió l'asimilación forzada d'a Corona d'Aragón a las leis y costumbres de Castiella, y a fin d'as institucions aragonesas, como as Cortz, a Deputazión u o Chusticia. O dreito aragonés se mantenió, como o zaguer repui de l'antiga organización d'o reino. Por contra, istos decretos permitioron que os habitants d'a Corona d'Aragón podesen ir, por primer vegada, enta America.

Vinclos externos[editar | editar código]