Día Nacional de Castiella

De Biquipedia
Ir ta: navego, busca
Pendón chigant en a Plaza Mayor de Villalar

O Día Nacional de Castiella, u actualment Día de Castiella y Leyón, ye a fiesta nacional de Castiella y día autonomico de Castiella y Leyón. Se celebra totz os anyos o día 23 d'abril en a localidat vallisoletana de Villalar de los Comuneros. En ista calendata se remera o cabo d'anyo d'a batalla de Villalar, decisiva batalla d'a Revuelta d'as Comunidatz de Castiella.

Orichen[editar | editar código]

O naiximiento de Villalar como simbolo se remonta tiempo atrás. Ya en o sieglo XVIII León del Arroyal, ilustrato economista y destacato protoliberal, manifestaba que Villalar estió lo "zaguer sospiro d'a libertat castellana". Os antecedents d'as conmemoracions de Villalar calerba situar-los en 1821, quan o guerrillero castellán, Juan Martín Díez "El Empecinado", y os suyos companyers d'a societat "Los Comuneros", organizoron una expedición a Villalar mirando as restas de Padilla, Bravo y Maldonado. Istos feitos tenioron o suyo punto culminant con un acto d'homenache a los Comuners en a plaza de Villalar o 23 d'abril de 1821.

Por ixas envueltas ye quan bells sectors, entre ells os miembros d'as sociedatz secretas "Los Comuneros" u "Los Hijos de Padilla", prencipian a emplegar o descutito pendón morato. Mientres o Trienio Liberal (1820-1823), Os Comuners estioron obchecto d'admiración por as corrients progresistas d'o país. Mientres a Primera Republica Espanyola, a revolución comunera estió tamién un referent de libertat ta l'ala federalista d'o Partito Republicán Democratico Federal, que en 1869 proclamó lo Pacto Federal Castellán, o primer intento d'una organización territorial federalista en Espanya. Asinas en o zaguer paragrafo d'iste pacto s'afirma: "a sangre d'os Padilla, Bravo y Maldonados que corre por as vuestras venas y a l'ardimiento de que conservan a remeranza istos lugars d'as comunidatz, garantizan o exito d'as nuestras aspiracions y deseyos". En ixa epoca o mesmo Francesc Pi i Margall, president d'a Primera Republica, afirmaba que "Castiella fue entre as nacions d'Espanya la primera que perdió as suyas libertatz en Villalar baixo lo primer rei d'a Casa d'Austria".

En os primers anyos d'o sieglo XX, mientres a Restauración, bi habió atros intentos de celebración en Villalar. Entre ells a iniciativa de José María Zorita Díez, deputato liberal por Valladolit, que realizó una petición d'un credito extraordinario ta remerar a batalla de Villalar. En 1920 o Concello de Santander proposó que as corporacions castellanas celebrasen o IV Centenario d'os Comuners de Castiella. Asinas mesmo, a Casa de Palencia alcordó en 1923: "que o 23 d'abril proximo vaigan totas as representacions de Castiella a los campos de Villalar, a churar o Santo Gredal castellán, debant d'o scenario d'a batalla de Villalar (...). Que o mesmo día e a la mesma ora s'adedique en totas as ciudatz castellanas un menuto de silencio a los heroes de Villalar".

Anyos dimpués, son asabelas as referencias a lo simbolismo de Villalar. Pere Corominas i Montanya manifiesta en o suyo libro "Por Castiella adintro" (1930): "o caracter eminentment nacionalista d'a guerra d'as Comunidatz de Castiella". Por ixo, lo documento que ninvió a Santa Chunta a lo rei ye "a más polita y libre Constitución que s'haiga dato nunca a la nación castellana". Corominas afirma que o sentimiento d'a libertat politica "fa d'os comuners un nuclio precursor d'as revolucions anglesa y francesa. No sé si en bella luenga s'ha esfensato lo prencipio de sobirania popular en una forma tan elegant y humana como a emplegata por a Santa Chunta en o suyo mensache a lo emperador".

En aquellos anyos o profesor Misael Bañuelos manifestó que "Castiella deixa d'estar Castiella en os campos de Villalar, y o castellán dixa de pareixer-se a l'antigo castellán, coincidindo con aquel succeso desgraciato d'a nuestra historia que estricalla la presonalidat de Castiella (...)". Con o golpe melitar de 1936 y o esclatito d'a guerra civil espanyola, a referencia comunera contina present entre os escamotz esfensors d'a Republica. Mientres a guerra se creya lo "Batallón Comuneros de Castella". En o suyo orichen se difunde a convocatoria ta fer parti d'una "columna castellana" ta liberar a las provincias d'Avila y Salamanca. Os suyos miembros yeran basicament castellans y emplegaban como simbolochía o pendón morato.

"Los Comuneros Padilla, Bravo y Maldonado en el Patíbulo", d'Antonio Gisbert, 1860.

Ya en a decada d'os anyos 60, o historiador José Antonio Maravall publica o libro "Las Comunidades de Castilla. Una primera revolución moderna", que constituye a primera contrebución contemporania que allora revisaba y contradeciba en parti a particular y deformata bisión que d'os comuners heban ofreixito dica allora historiadors proximos a las instancias oficials d'o rechimen de Franco. Maravall considera as Comunidatz de Castiella no como una simpla rebelión. Ta iste autor a guerra d'as Comunidatz estió muito más que una serie de motins y disturbios, inspirata por un pensamiento politico coderent que li da o caracter de primer movimiento revolucionario d'a Europa moderna. Istas teorías son confirmatas en estudeyos posteriors levatos a termin por investigadors de gran prestichio, como Juan Ignacio Gutiérrez Nieto en "Las Comunidades como movimiento antiseñorial" (1973) y por Joseph Pérez con a suya tesi doctoral "La revolución de las Comunidades de Castilla (1520-1521)", publicata en 1977. Os estudeyos d'istos tres historiadors servirán d'alazet a los nuevos movimientos autonomistas que surtirán mientres a Transición dica la democracia, movimientos que tendrán en Villalar un referent fundamental.

Ofrenda en Villalar 2006

Con l'actividat antifranquista de prencipios d'os anyos 70 y as luitas sendicals, se producen os primers episodios que pueden considerar-se como premonitorios d'o posterior naiximiento d'o nacionalismo castellán moderno, y que teneban como obchectivo la consecución d'a democracia y as reivindicacions autonomistas. En a primavera de 1972 se funda en Valladolit a librería "Villalar", o nombre d'a quala ye un homenache simbolico a las libertatz castellanas. Dende ista librería s'articuló buena parti d'o movimiento antifranquista clandestino en Valladolit. En iste mesmo anyo, en a librería "Villalar" se presenta o poema "Los Comuneros" escrito por Luis López Álvarez, obra literaria que se convirtió en referencia y himno de l'autonomismo castellán-leyonés, y más encara quan en 1976 o grupo folk Nuevo Mester de Juglaría fació una adaptación musical d'iste poema. En 1976 se convoca a primera concentración autonomista en Villalar d'os Comuners (Valladolit). A tamas d'a prohibición d'o gubierno, bellas 400 presonas se i concentroron convocatas por o Instituto Regional Castellano-Leonés, asociación rechionalista que heba naixito meses antis y que agrupaba a intelectuals, profesors universitarios, periodistas, ecolochistas y representants de partitos politicos. As presonas congregatas en Villalar habioron de ser disueltas por a Guardia Civil y as actuacions musicals previstas a la fin no podioron celebrar-se.

Istos feitos contrebuyoron a refirmar a importancia posterior d'a conmemoración de Villalar. A l'anyo siguient, en 1977, bellas 20.000 presonas asistioron a lo Día de Villalar, en una convocatoria conchunta d'os dos prencipals colectivos rechionalistas d'a epoca: o Instituto Regional Castellano-Leonés y l'Alianza Regional de Castilla y León.

Actos[editar | editar código]

Banderas en Villalar

O día important y con mayor numero de celebracions y actos ye o día 23, pero los actos prencipian en a nueit d'o día 22, con actuacions de grupos musicals, y a más bi ha una zona d'acampada libre ta pasar a nueit. En o maitín d'o 23 d'abril se fan os actos politicos a lo costato d'o monolito erichito en homenache a los Comuners a on que cada partito politico realiza una ofrenda floral y prenuncia un descurso. Mientres tot o día d'o 23 d'abril se contina l'actividat politica alternata con bailes y conciertos de musica tradicional castellana y leyonesa, esportes autoctonos, exposicions, teatro de carrera, actividatz ludicas, ecetra.

Evolución[editar | editar código]

O 23 d'abril en os suyos orichens gosó congregar a 200.000 presonas,[1] en os tiempos d'a preautonomia demandando l'autonomía ta Castiella y Leyón. Hue contina estando un simbolo de rechionalismo y os allora Partido Autonómico Nacionalista de Castilla-León, Alianza Regional de Castilla y León, Instituto Regional de Castilla y León, ecetra., han deixato paso a partitos rechionalistas como Unidad Regionalista de Castilla-León, partitos nacionals como Partito Socialista Obrero Espanyol, Izquierda Unida, partitos nacionalistas y castellanistas como Tierra Comunera, Izquierda Castellana u tamién más timidament o Partido Popular.

A entidat encargata d'organizar actualment a fiesta de Villalar ye a Fundación Villalar - Castilla-León, dando cierto aire d'oficialidat a la conmemoración, dimpués d'o periodo de gubierno d'Aznar en Castiella-Leyón que decidió fer itinerant a celebración d'o Día de Castiella-Leyón, en detrimento d'a concentración popular de Villalar.

Vinclos externos[editar | editar código]

Referencias[editar | editar código]

  1. Asinas lo reculle por eixemplo lo libro "Fuerzas políticas en el proceso autonómico de Castilla y León 1975 - 1983" en a suya pachina 245