Cyanobacteria
De Biquipedia
| Cyanobacteria | ||||
|---|---|---|---|---|
 Filamento d'Anabaena spiroides en microscopía optica. |
||||
| Clasificazión zentifica | ||||
|
||||
| Ordens | ||||
| A claseficazión se troba en rebisión en estes años
|
Cyanobacteria, tamién ditas bacterias azuls, algas azuls u algas zianofitas (lo termín "alga", anque d'emplego frecuent, no les estarba apropiato, doncas as algas autenticas son eucariotas) son un filo de bacterias que otienen a suya enerchía á partir de prozesos eufotosinteticos. Lo nombre les bién d'a color que prenen as suyas zel·lulas u colonias en muitos causos (en griego κυανός -kianós- ye «azul»), anque ixo no se i cumple siempre. Muitas d'as suyas espezies son enormement importants en ecolochía de gran dibersidat d'ambients per a suya capazidat d'afixar lo nitrocheno. Á más, son a component más important en a biomasa produtora d'ambients acuaticos, tanto d'auguas dulzas como marinas, pero i son tamién presents en os ambients terrestres.
S'han trobato estromatolitos de zianobacterias produtoras d'osicheno fosilizatas d'en abe á redol de 2800 millons d'años, e la más gran parte d'as teyorías modernas sobre la eboluzión biolochica en a tierra les atorgan lo paper d'aber estato las introdutoras de l'osicheno (enantes, un gas muit residual) en a atmosfera d'o planeta. A traszendenzia d'o suyo metabolismo con abilidat ta fer fotosintesis osichenica ye cabal, pos aberban asinas cambeyato l'atmosfera d'o planeta Tierra de prefundament redutora á prenzipalment osidadora, feito que aberba cambeyato dramaticament as perspetibas ebolutibas en o planeta, mudando los graus de predominanzia d'os diferents grupos d'organismos, e permetendo-ie la ulterior esplosión d'a biodibersidat.
A Teyoría d'a Endosimbiosis les atorga, á más, lo papel d'estar as precursoras d'os cloroplastos en plantas e algas eucariotas per un complexo prozés d'asimilazión simbiontica, que mos aberba dato los debantpasatos d'ixes organismos modernos.
