Cruzata de Balbastro
| Cruzata de Balbastro | |
|---|---|
| [[]] | |
| Información cheneral | |
| Calendata: 1064 | |
| Puesto: Balbastro | |
| Resultato: Victoria inicial cristiana, refusatos dimpués por os musulmans. | |
| En conflicto | |
 Aragón Urchel Aquitania Estatos Pontificios |
Taifa de Saraqusta |
| Comandants | |
| Arnau Mir de Tost, Guillén d'Aquitania, Guillén de Montreuil | Al-Muqtadir |
A Cruzata de Balbastro (tamién conoixita como Guerra de Balbastro u Setio de Balbastro) estió una expedición melitar empentata por o papa Aleixandre II pa prener a os moros a ciudat de Balbastro. Bi participó un important exercito, composato por combatients que veniban de tota a cristiandat occidental. O setio d'a ciudat estió en 1063. Por o caracter internacional d'o exercito y por o refirme papal estió un preludio d'as Cruzatas en Tierra Santa.
Expedición [editar]
O papa Aleixandre II estió o primero en predicar a Reconquiesta en 1064, presentando-la como una urchencia d'a cristiandat. Tamién fue predicata en Borgonya, fácil que con o refirme de l'abate Hugo de Clunyego, chirmán de Tomás de Chalon qui mandó un destacamento. A voluntat de participar en a cruzata s'estendilló més luent de Francia seguntes o monche Aimé du Mont-Cassin, qui sinyala que "grant chevalerie de Francoiz et de Borguegnons et d'autre gent" yeran presents en o setio. De feito, un important exercito composato prencipalment por Franceses y Burgunyons, un continchent pontifical (con normandos d'Italia sobre tot) y un exercito de combatients catalans y aragoneses yeran presents en 1063 quan encomenzó o setio.
A capeza d'o continchent papal estió o normando Guillén de Montreuil, a d'os aragoneses Sancho Remíriz d'Aragón, reino muito amenazato por os moros. O continchent més grant yera o d'os occitans d'Aquitania condueito por Guillén VIII (u Guy-Geoffroi). S'entituló Christian generalissimo, implicando a dirección d'a expedición en conchunto. Encara que a composición d'o exercito ye encara un tema controvertito, ye acceptato por un regular que a mayor parte yeran d'orichen norpirenenco.
O duque d'Aquitania condució o suyo exercito a traviés d'os Pireneus pasando por Somport. Este exercito s'adhibió a o exercito catalán en Chirona a prencipios de l'anyo 1064. O exercito completo prenió Graus, que resistió dos asaltos, y dimpués en marzo s'adrezó enta Balbastro, que alavez feba parte d'a Taifa de Leida, dirichita por al-Muzaffar.
A ciudat de Balbastro, que no podeba recibir aduya dende Leida, fue asetiata, y con l'aprovisionamento d'augua tallato, fue rapidament presa. Os cruzatos saqueyoron brutalment a ciudat y facioron mortaleras con os musulmans, (se diz que i murioron 50.000).
Conseqüencias [editar]
O botín d'os cruzatos fue considerable: as cronicas mencionan a captura de muitas mullers musulmanas y tamién de muitos trasoros. A dirección d'a ciudat fue cedita a Ermengol III d'Urchel.
Os musulmans practicoron a tecnica de tierra cremata pa evitar l'abance d'os cristians. As tropas cargatas de botín y lo duque Guy-Geofrroy, que yeran deseyosos de tornar a lurs tierras troboron un pretexto pa fer meya vuelta.
En 1065, os Moros contratacoron y reprenioron a villa, fendo una mortalera con a guarnición y desfendo o treballo d'os cruzatos.
Tibalt, qui yera a lo mando d'os Burgunyons morió, fácil que como conseqüencia d'as feritas sufritas mientres fuyiba dimpués que os moros reprenesen Balbastro.
Desacherata intencionalment por a Orden de Clunyego, a presa de Balbastro tenió un grant impacto en a cristiandat. Enantes d'esta batalla os caballers que luitaban contra os moros en Espanya lo feban a tetulo individual y yeran en a subchección d'un rei u prencipe local. A Guerra de Balbastro estió a primera vegata que un exercito trescurzó os Pireneus pa luitar contra os musulmans y estió un preludio d'as Cruzatas.
