Coscollo
De Biquipedia
| Coscolla | ||||||||||||||||
|---|---|---|---|---|---|---|---|---|---|---|---|---|---|---|---|---|
 Coscolla |
||||||||||||||||
| Clasificazión zentifica | ||||||||||||||||
|
||||||||||||||||
| Nomenclatura binomial | ||||||||||||||||
| Quercus coccifera L. |
O coscollo u coscollera (Quercus coccifera (L., 1758)) ye un arbusto de fuella perenne, berda toda l'añada, que no s'alza si que bel par de metros d'altaria (muit pocas begadas plega enta o porte arborio). Gosa estar ramificau dend'es alazez de la base suya, fendo que as brancas, de berla grisa u blanca, s'entaranan dixando o interior d'o matullo cuasi impenetrable.
As suyas fuellas son simples, alternas, mimbranosas e richidas, sin de pilosidaz en garra cara. As marguins foliars son ondeyadas con punchas más u menos numerosas. A colorazión ye berda intensa, e tienen forma agüebada u alargada, con a superfizie brilant e lustrosa.
As flors están, como en tot o chenero Quercus, separadas por sexos. As flors masclo son chicolonas, con l'embolique fendo forma de copa, trestallada en 4, 5 u mesmo 6 dients e con un numero bariau d'estambres (entre 4 e 10). Forman collas en forma d'espica corta, de color amarillenca, primetas e penchadas d'as brancas.
As flors fembra libran d'a mesma planta, pero nomás cuan as masculinas son ya xutas (ta ebitar l'autofecundazión). Anisoladas u en collas de dos u tres, a fecundazión ye eolofila.
O fruito d'ista planta ye de tipo glan e se diz coscollina u coscollín, encara que tamién se diz en bels puestos bellota borde u simplament bellota/billota. No contién que un embrión. Son dicotiledonias, e os cotiledons pueden separar-se lonchitudinalment cuan a coscollina ye ubierta. Una carauteristica d'istas billotas ye que no s'emplegan ta garra bestiar, porque o suyo gusto ye muit amargo e os animals las dixan estar.
[editar] Enrastres esternos
- Wikispecies tien informazión adizional sobre os coscollos.
