Conquiesta de Zaragoza
De Biquipedia
A conquiesta de Zaragoza á los musulmans acayezió en l'año 1118, dentrando en a ziudat os exerzitos d'o rei Alifonso I d'Aragón.
Por ixas embueltas, o zaguer gobernador almorabet, o emir Ibn Tifilwit teneba un rolde de poetas e filosofos que fuyiban d'o integrismo d'o sur pa dedicar-se á la bida cortesana. O zaguer d'os gobernadors sabios nombró á Abempaze gran bisir. Cuan morió Ibn Tifilwit en 1117, la rechenzia de Zaragoza la chestionó lo gobernador de Murzia mientres uns meses. En marzo de 1118 Alifonso I lo Batallero empezipió o setio de Zaragoza con tropas aragonesas, nabarras, cruzatos oczitans e tropas d'os ordens melitars.
Enantes de conquerir-se Zaragoza Gastón de Biarn eba conquiesto Moriella pa tallar o camín ta Balenzia, dende on podeban plegar refuerzos musulmans. Zaragoza fue presa con l'aduya de cruzatos oczitans e d'as maquinas de guerra que Gastón de Biarn conoxeba e eba feito serbir en Tierra Santa cuan las cruzatas. Zaragoza cayó en mans cristianas a fins d'o año 1118.
Con a conquista d'a ziudat por Alifonso I lo Batallero, esdebinió a ziudat més important d'o suyo estato cristián nabarro-aragonés, pero no s'adibió almenistratibament en Aragón, e estió por muito tiempo capital d'o Reino de Zaragoza. Zaragoza teneba un bico mozarabe, pero lo Batallero dixó lo poder en mans d'os nobles que lo eban aduyato, nombró Tenient a lo suyo amigo Gastón de Biarn e i plegoron muitos repobladors oczitans.
Dimpués d'a derrota en a batalla de Fraga os almorabez abanzoron ta l'ueste pa recuperar Zaragoza. O emperador de León e rei de Castiella Alfonso VII los aturó en Fuents d'Ebro, feito que se recordará pa cutio en o lión que bi ha en o escuto de Zaragoza.
