Confraría relichiosa

De Biquipedia
Ir ta: navego, busca
Quadro de lo Museu de Sevilla.

Las confrarías, conflairías u cofadrías relichiosas son collas de laicos pa promover una creyencia. Las confrarías relichiosas las diriche un gran mayestre, un mayordombre, un santo u un gurú, y pueden estar:

  • Confraría musulmana. Han estendillato a sobén bellas nocions preislamicas u cristianas en lo Islam, como por eixemplo l'amor mistica de Dios u lo culto a los santos. Bellas escuelas de sufís se dicen confrarías, como por eixemplo los derbixes.
  • Confraría catolica. Una confraría ye una asociación de creyents catolicos que fan rolde arredol d'una advocación de Cristo, la Virchen u un santo, un inte de la pasión u una reliquia. Bi n'ha tres tipos:
    • Confrarías penitencials, que salen en Semana Santa. Son talment las més conoixitas en lo Baixo Aragón.
    • Confrarías de Gloria, que salen la resta de l'anyo.
    • Confrarías sacramentals, que tienen como titular a lo Santismo Sacramento.

Totas las confrarías gosan organizar una procesión, a lo menos una vegata en una anyata, solas u con atras confrarías.

L'organo plenario de la confraría ye lo capítol u asambleya cheneral de totz los conflaires. Lo capítol cheneral s'encarga d'esleir a la chunta, que ye l'organo de gubierno de la confraría, con un president.

Bellas confrarías tamién pueden aplegar-se en un organo superior que prene diferents nombres seguntes lo puesto: Consello cheneral, Capítol de Confrarías, Capítol superior, Federación, Agrupación, Unión, Chunta Local...

En las confrarías bi ha bellas clases de miembros, como los mayordombres, estants, costalers, hombres de cadiera reyal, cargadors, ezetra...

En principio cualsiquier cristián puet fer parte d'una confraría, conseguindo la firma de bel chirmán que lo avale. Los nuevos miembros gosan recibir la investidura de la tunica y la imposición d'escapulario u medalla.

Una confraría important en la baixa Edat Meya zaragozana estió la Ermandat et Confrayría in honore de Sancte Marie de Transfixio (1311-1508), que escribió los suyos estatutos en aragonés. Atra confraría baixomeyeval que se'n conoixen los suyos estatutos en aragonés ye la de Confrairía de Santiago en Tudela, fundata en 1355 con l'aprobación de Carlos de Navarra.

La tradición de confrarías catolicas baixomeyevals s'estendilló en las zonas d'America controlatas por Castiella y Portugal, y i estioron un elemento importantismo de la vida. En Brasil los negros formoron confrarías d'esclavos d'orichen africán, y asinas empecipió un sincretismo relichioso entre lo catolicismo y los cultos africanos, desembocando en los cultos afrocaribenyos como lo Candomblé.