Condato de Pallars

De Biquipedia
Ir ta: navego, busca
Escut dels comtes de Pallars.svg

Lo condato de Pallars estió uno de los condatos que i heba en lo territorio que en la primera mitat de lo sieglo IX bells cronistas de la cort carolinchia clamoron Marca Hispanica.

Este condato se trobaba situato en la cuenca alta de la Noguera Pallaresa, entre los monts Pireneus y la redolada de La Pobla de Segur, incluindo-ie la Vall d'Àneu, la Vall de Cardós y la Vall Ferrera, asinas como a vegatas la marguin cucha de la Noguera Ribagorzana y la Vall Fosca.

As primeras anyadas: o dominio tolosán[editar | editar código]

Os territorios d'o condato de Pallars y d'o condato de Ribagorza fueron conqueritos a o Emirato de Cordoba en as primeras anyadas d'o sieglo IX por Guillén I, conte de Tolosa, que os incorporó a o suyo condato.

Asinas, Guillén I establió o monesterio de Santa María de Gerri en a val d'o río Noguera Pallaresa en Gerri de la Sal (hue a capital d'o municipio de Baix Pallars, en Lerida), o monesterio de Senterada en a val d'o río Flamisell (hue en Senterada, Lerida) y o monesterio de Santa María y Sant Per d'Alaón en Sopeira en a val d'o río Noguera Ribagorzana, en a Ribagorza (hue Uesca). Antiparte, Carlos Magno encluyó istos territorios en o bispato d'Urchel.

En 806 abdicó Guillén I, que se fació monche en o monesterio de Sant Guillén dau Desèrt, que heba establito en l'actual departamento francés d'Erau, en Occitania. Os suyos sucesors estioron en o condato de Tolosa Begón de París y dimpués Bernardo de Septimania (iste zaguer yera fillo de Guillén I).

A independencia pallaresa y ribagorzana dende meyatos d'o sieglo IX[editar | editar código]

A clase social dirichent d'os territorios ribagorzans y pallareses refusaba o dominio tolosán, y asinas en 833 Aznar Galíndez (que heba estato conte de Aragón y yera conte d'Urchel y conte de Cerdanya) s'apoderó d'os condatos de Pallars y Ribagorza, que esdevenioron asinas independients d'o condato de Tolosa dica que en 844 Fredelón de Tolosa expulsó a ista linia y recuperó os condatos.

Sindembargo, quan en 872 fue asesinato o conte Bernardo II de Tolosa por estar enemigo de Carlos o Calvo, Remón (que seguntes bells autors yera un sinyor local, encara que yera descendient d'a nobleza franca) aprofitó isto ta independizar os condatos a o sud d'os Pireneus y ta creyar una dinastía contal propia.

Contes de Pallars (sieglos IX-XI)[editar | editar código]