Columba palumbus

De Biquipedia
Ir ta: navego, busca
Columba palumbus
Torcaz
Torcaz (Columba palumbus)
Denominacions populars
Torcaz, torcazo
Estato de conservación
Status iucn2.3 LC.svg
Seguro (IUCN)
Clasificación scientifica
Dominio:
Eukaryota
Reino:
Animalia
Filo:
Chordata
Clase:
Aves
Orden:
Columbiformes
Familia:
Columbidae
Subfamilia:
Columbinae
Chenero:
Columba
Especie:
C. palumbus
Descripción
Columba palumbus
L., 1758
Distribución cheografica
Columba-palumbus-dist.png
Distribución cheografia de C. palumbus.
Amariello = De veranos.
Verde = Tot l'anyo.
Azul = En hibierno.

O torcaz (/tur'kaθ/~/tor'kaθ/) u torcazo (/tur'kaθo/~/tor'kaθo/; Columba palumbus (Linnaeus, 1758)) ye una especie de palomo salvache propio d'Europa, Orient Meyo y o norte d'Africa.

Pertenece a la orden Columbiformes y a familia Columbidae, en a que comparte o chenero Columba con belatras especies, como os palomos domesticos.

Descripción[editar | editar código]

Ye o palomo más gran que habita en a Peninsula Iberica, con o cuerpo robusto y a cabeza chicorrona en comparanza. Mesura bells 40 cm dende o pizco dica la coda.[1]

A color d'o plumache, muit caracteristica y sin quasi variacions d'entre individuos, ye plomiza, con brilluras azulencas y moradas en a tripa y o papo. En o cuello i tiene dos mallas blancas, a costau y costau, que la fan inconfundible.

O tulido que fa ye caracteristico tamién, con una voz pareixida a .

Hábitat[editar | editar código]

Os torcazos habitan en as selvas, tanto en as de coniferas como en as de planifolios,[1] anque prefieren as selvas mixtas.[1] En Europa central y en o Norte as poblacions de torcazos son migraderas, y marchan cara ta'l sud d'o continent y o norte d'Africa en setiembre, d'a on que en tornan cara ta marzo.[1] En a Europa atlantica y mediterrania i remanen tot l'anyo. En qualques zonas d'o magreb no i son sique hibernaderas.

Como todas as columbidas, os torcazos s'alimentan de simients,[1] preferencialment cerials, anque incluyen en a suya dieta lulos y cocullos[1] brostadors que pican en as brancas. O consumo d'alimentos d'orichen animal (insectos, larvas, etc.) ye anecdotico.

En l'actualidat, qualques poblacions s'ha establiu en as ciudatz, y se'n i puede veyer con freqüencia en os parques y os chardins publicos, tot coexistindo con belaltras especies de palomos urbanas. Mientres que os torcazos de ciudat se son acostumbraus a la presencia humana, y s'agosan con freqüencia a on son as presonas ta picar alimento, os torcazos de poblacions salvaches, como os que se'n troba en l'Alto Aragón, son muit timidos y a sobén s'ahopan quan sienten a presencia humana nian a decenas de metros.

Niedo[editar | editar código]

A nidificación a fan en as ramas d'os árbols u en arbustos bien pretos, d'entre 5 y 30 metros por alto d'o suelo.[1] Fican 2 uevos de regular,[1] excepcionalment dica 3, y s'aclucan d'entre 16 y 19 días ta cobar-los.[1]

Os polletz, como os de totz os palomos, naixen despullaus y con bells flequichons, que nian gosan estar plumas de verdat, de color amariella. Os empapan y os apuyan d'entre totz dos prochenitors, y os pichons (palomos chuvenils) prencipian a esvolutar-se en o niedo a partir d'os 20 días de vida, d'a on que se revolan a partir d'os 30.

Imáchens[editar | editar código]

Caza[editar | editar código]

O torcazo ye una carne de caza muit apreciada.

Os torcazos son aus de caza prencipals. En l'Alto Aragón se'n i caza con freqüencia, pus i son abundants, y como todas as Columbidae son animals prolificos que gosan sacar mas d'una cobada cada anyada, por o que con as adequadas precaucions as suyas poblacions se mantienen estables nian a tamas de a presión cinechetica.

A cazada d'os torcazos se fa en resacando-los, que ixo ye, quan uno u mas d'un cazataire s'amaga en a marguin d'un campo, y un altro, o «resacador», s'adintra en a selva colindant a on se sabe que en i ha, y con a suya presencia y o rudio que fa prevoca que os palomos se revolen, tot mirando ta que amaneixcan por alto d'o campo obierto.

O costumbre d'istes animals de desplazar-se en parellas u chicotz estallos fa que, quan se'n resaca un grupo, con escopetas y bells cazataires se'n pueda abatir uns quantos exemplars d'una sola tongada.

Nombres[editar | editar código]

As mallas a costau y costau d'o cuello son as responsables de a etimolochía d'o nombre «torcaz/o».

O nombre torcaz dimana d'o latín <*TORQUATUS, «o qui tiene collar» (de <TORQUE, «collar»), y fa una referencia clara a las dos mallas blancas en o cuello d'os adultos. A parola ye común a l'aragonés y a o castellano, anque ista zaguer luenga s'estima mas emplegar a parola con chenero femenino, mientres que en aragonés o chenero ye mayoritariament masculino.

A forma torcaz coexiste en buena cosa d'o dominio lingüistico aragonés con a forma torcazo, con -o final que refirma o chenero masculino. Todas dos presentan dos pronuncias alternativas, la una con [o] y l'altra con [u],[2] en a primer silaba.

Como ye regular en aragonés, en existe versions con metatesi de a consonant R, como trocazo y trocaz,[2] que s'alternan en a cheografía con as que tienen l'orden natural d'as consonants.

Referencias[editar | editar código]

  1. 1,0 1,1 1,2 1,3 1,4 1,5 1,6 1,7 1,8 (es) FELIX, Jîrî y TOMAN, Jan; Guía de Campo (3ª Ed.); Ediciones Susaeta. Madrid, 1999. ISBN 84-305-7413-1
  2. 2,0 2,1 (an) VIDALLER TRICAS, Rafel, Libro de As Matas y Os Animals; Dizionario aragonés d'espezies animals y bechetals; Ed. Val d'Onsera. Zaragoza 2004. ISBN 978-84-89862-35-7

Vinclos externos[editar | editar código]