Chubo

De Biquipedia
(Reendrezato dende Chugo)
Ir ta: navego, busca
Chubo ta dos mulas.

O chubo, ye un instrumento de matiera que, meyant una traviesa mantiene chuntos dos animals de tiro, como machos u bueis, con l'ochectivo d'aproveitar a suya fuerza en fainas como aladrar a tierra, estibar os carros u altros quefers en os que siga menester.

O vocable chubo vienen dreitament d'o latín "iugum", que ye una palabra tipicament referita como de radices indoeuropeas, car que tamién amaneix en o sanscrito como "yug" que significa "Unión" y ha orichinato a palabra "yoga". Atras paronas relacionatas con chubo con chunyir/chunir y o cultismo conchuche. Chugo ye la suya forma baixo montanyesa, talment influita por o castellano "yugo". A variant ixubo ye un caso de xeada.

Emplego y formas diferents[editar | editar código]

Una chunta de bueis con o chubo ligato a os suyos cuernos.

Os chubos emplegatos con equinos u bovinos son diferents. Istas diferencias se deben a la forma anatomica de cada especie, en as quals cal aproveitar os puntos d'aplome d'o cuello u d'os quartos debanters ta fer a tracción.

Os bovinos, de normal bueis, per l'anatomía más estreita d'os suyos quartos debanters, y lo feito que gosan levar o cuello más abaixato que no los machos, amenistan que ta estibar de l'aladro quan i son puestos en chunta, leven o chubo ligato a os suyos cuernos, por cuenta d'estar posato dreitament a l'alto d'a collera como se fa con as mulas.

En o caso d'as mulas y d'altros equinos, a posición d'o suyo cuello ye más alto y por l'amplaria d'os suyos huembros ye prou més fácil enchascar-be lo chubo contra d'os cuartos debanters de l'animal, de normal fendo servir una collera que estando más blanda que no la matiera de l'instrumento deixa que l'animal no se faiga mal en fer esfuerzos.

A correya d'o chubo se diz chunidera.

Simbolochía[editar | editar código]

Chubo ta bueis, más baixo que no os chubos ta machos.

En muitas luengas latinas, a palabra chubo s'emplega metaforicament ta designar ixas situacions en as quals una u más presonas se troban obligadas a fer bella cosa, u que son privatas d'a libertat de decisión.

En o contexto historico d'a Baixa Edat Meya, os Reis Catolicos emplegoron o chubo y un faixo de flechas como sinyal reyal, significando lo chubo la potencia agricola d'a Corona de Castiella mientres que as flechas simbolizaban o poder melitar d'Aragón. Ixe mesmo sinyal fue adoptato por a Falange Española en o sieglo XX, con altro simbolismo.

Vinclos externos[editar | editar código]