Chenero gramatical en o castellán

O chenero gramatical en o castellán distingue en os sustantivos, adchectivos, articlos y bells pronombres presonals entre chenero masculín y chenero feminín. Manimenos tamién existen restos d'o chenero neutro d'orichen latín, pero limitato a lo pronombre presonal (ello), l'articlo definito (lo), os quantificadors (cuanto, cuánto, tanto), os pronombres demostrativos (esto, eso, aquello) y bells pronombres indefinitos (algo, nada, todo).

O chenero d'os sustantivos

Muitas vegatas se puet deducir o chenero d'as parabras seguntes as suyas terminacions.

Son de chenero masculín

• cheneralment as parabras terminatas en -o, -or, -n (libro, valor, corazón, ecetra.)
• os sustantivos d'orichen grecolatin terminatos en -ma y -ta (poema, panorama, planeta, poeta, ecetra.)
• as parabras relacionatas con os hombres, animals masculins, profesions masculinas, ecetra. (panadero, conductor, padre ecetra.)
• os nombres de ríos, vals, mars, ecetra.
• os nombres de dias d'a semana u d'o mes.
• os toponimos y nombres cheograficos que no terminan en -a.

Son de chenero feminín

• cheneralment as parabras terminatas en -a (casa, puerta, ventana, ecetra.)
• as parabras relacionatas con as mullers, animals feminins, profesions feminins, ecetra. (madre, vaca, modelo, ecetra.)
• totas as parablas terminatas en -dad u -tad, -tud, -ción, -sión y -xión (calidad, juventud, canción, pasión, flexión, ecetra.).
• os toponimos y nombres cheograficos que terminan en -a.

Bells eixemplos como excepcions

• parabra que termina en -o, pero ye feminina: mano
• parabras que terminan en -a, pero son masculinas: día, mapa, tequila, ecetra.

Parabras invariables en chenero

En castellán bi ha parabras, sobretot que significan profesions, que no varían en chenero. En iste caso nomás l'articlo definito u l'adchectivo marca o suyo chenero:

• parabras terminatas en -ista: el periodista, la periodista
• parabras terminatas en -nte: el cantante, la cantante; el presidente, la presidente (encara que existe tamién a forma moderna la presidenta).
• altros eixemplos: el joven, la joven (encara que existe a forma dialectal la jovena); el juez, la juez (tamién existe a forma poco usual la jueza).

Parabras de chenero ambigo

• Bi ha bells sustantivos en castellán que se puet usar como masculins y feminins tamién, por eixemplo: el mar, la mar (a segunda forma ye més poetica).
• En ocasions, una parabra puet usar-se como masculina en singular y feminina en plural: el arte histórico, pero las bellas artes.

Parabras homonimas con significatos que varían seguntes o chenero

• el capital ('fondo monetario') y la capital ('ciudat prencipal')
• el orden ('colocación u clasificación de cosas', 'institución relichiosa') y la orden ('mandato que s'ha d'executar'), ecetra.

O chenero d'os pronombres, articlos y quantificadors

A diferencia d'os sustantivos, os pronombres, articlos definitos y os quantificadors pueden tener chenero neutro, antimás d'o masculín y feminín. En iste caso, a terminación masculina ye -e o consonant (este, ese, aquel, él, el), a feminina ye -a (esta, esa, aquella, la, ella) y lo neutro ye -o (esto, eso, aquello, lo, ello, algo, todo, cuanto, tanto).

Como os adchectivos no tienen formas especificas o terminacions ta lo chenero neutro, a forma en que deben concordarse con ellos no difiere d'a masculina. Eixemplos: lo malo; algo bueno; esto es verdadero.