Parla baturra

Parla baturra Baturro
Variedat d'o castellán
Localización cheografica
Parlato en	Aragón
Lugar(s) principal(s)
Atras denominacions	{{{atras denominacions}}}
Charradors
Oficial en
Reconoixito en	{{{reconoixito}}}
Regulato por
Vitalidat
Literatura
Escritors principals	Eusebio Blasco, Alberto Casañal, Sixto Celorrio, Crispín Botana, Mariano Baselga
Rasgos dialectals	Substrato aragonés
ISO 639-1
ISO 639-2
ISO 639-3
SIL

O baturro u parla baturra ye a forma d'o castellán que se charra en Aragón.

Ye una variedat que tien un substrato aragonés muit marcato, en especial en as comarcas de:

• Cinco Villas
• Monegros (on se charró l'aragonés dica fa bien poco)
• Ribera Baixa de l'Ebro.
• Baixo Aragón (en sentito amplo), destacando parlas como o caspolín y o chipranesco.

O substrato ye més evident en o lexico d'as actividatz produtivas como l'agricultura, ganadería, cazata, l'orache, os obchectos que bi ha en as casas tradicionals, a descripción d'o terreno.

Fonetica

En fonetica o castellán d'Aragón ha heredato a tendencia a desfer l'hiato, pero los desfá por un regular cerrando una vocal (pior) y tendencia a no pronunciar esdruixols.

Bi ha tendencia a unificar os diftongos creixients -ai-, -ei- cerrando-se o primero y ubrindo-se o segundo pa dar un grau intermeyo -äi-, (poläinas, bäilar, azäite, empäine). Este fenomeno talment tienga relación con o hispanoarabe u arabe andaluz y se troba tamién en A Riocha, bells puestos de Navarra, Alava, Burgos, Soria, Guadalachara y Cuenca.

A -y- intervocalica se pronuncia enfeblita y esdevién semivocal u semiconsonant y dica puet esdevenir un alofono pareixito a la e cerrata tamién de caracter semivocal-semiconsonant y puet desapareixer (hoio/hoeo, auntamiento, que-me-se-o, ecetra). Este fenomeno se troba tamién en o castellán de Navarra, A Riocha, Soria, y part de Burgos, Guadalachara y Cuenca.

Morfolochía

Verbos

En o Baixo Aragón, Cinco Villas y Monegros bi ha repuis d'a conchugación. Por eixemplo en o Baixo Aragón se replegan imperfectos con -iba: caiba, teniba, traiba y con -iai: teniai, ibai, veniai.

Pronombres

Se pueden sentir pronombres en aragonés: con mí, con tú, u comuns con o castellán antigo: vus bariant de "vos". Tamién formas que poderban estar aragonesas u hibridas como nusotros y vusotros, amás de formar como para yo. O pronombre plural sen dezaga d'infinitivo y cherundio ye amplament emplegato.

Ye prou cheneral a construcción se les quan o dativo ye plural en cuenta de se lo, se la, se los, se las (ya se les diré a ellos en cuenta de ya se lo diré a ellos). Esta construcción se remonta a la construcción ge les que leyemos en o Fuero romanz de Teruel y en part d'as traduccions de Chuan Ferrández d'Heredia, estando propia de l'aragonés d'as comunidatz aragonesas. En filolochía hispanica ye considerata un simple vulgarismo.

O castellán d'Aragón tamién se resiste a las innovacions modernas d'o castellán: Andalucía y Aragón estioron as zagueras grans rechions on o leísmo propio d'o castellán més actual está tardando més en imposar-se, mantenendo a diferenciación entre o pronombre lo/la de complemento directo referito a presonas y o pronombre le de complento indirecto tamién referito a presonas. Agora bells chóvens son leístas, pero muita chent (sobretot a chent viella) diz encara no lo conozco, d'alcuerdo con totas as luengas neolatinas en cuenta de no le conozco).

Sufixos

En castellán d'Aragón se troban con una gran extensión parolas aragonesas orichinatas por derivación con os sufixos caracteristicos: mesache, orache, pelaire, colgallo, tresmallo, ternasco.

O sufixo diminutivo -et, -eta, -etz, -etas con diferents pronunciacions (-é, -er, -ed), ye encara productivo (por o menos en chent naixita en a segunda mitat d'o sieglo XX) en diferents localidatz d'o Baixo Aragón, Monegros y arias recientment castellanizatas d'a Plana de Uesca.