Caxicar
De Biquipedia
Caxicar u Caxigar ye una selba on l'estrato arborio lo forma una un més espezies de caxico.
Lo que en aragonés se diz caxicar en conchunto, rezibe diferents denominazions en atras luengas on s'espezifica lo conzeuto de caxico con parabras més bariatas. Asinas por exemplo en la zona de lo noreste de la Peninsula Iberica bi ha dos clases prenzipals de caxicars:
- Caxicars con caxicos de fuella gran e caduzifolia.
- Caxicars con caxicos de fuella menos gran e marzeszents u semicaduzifolios.
Los segundos tienen un carauter submediterranio e gosan ocupar lo piso supramediterranio en las sierras e cordeleras on puyando ent'alto aumentan las prezipitazions u umidat. Por ixo en lo Prepirineu (e tamién zonas de semontano) ocupan estensas arias denzima de lo nibel de los carrascals pero por debaxo de las pinetas naturals, fayars e abetosas. Caxicar u Caxigar amanixen en l'Alto Aragón como macrotoponimos (Monesma e Caxigar) u microtoponimos. En aragonés meyebal esitioron microtoponimos basatos en robre e no caxico (reboret < ROBURETUM).
En lo Sistema Iberico ocuporon estensas arias dica que en la Edat Meya empezipió un prozeso de desforestazión que duró dica lo sieglo XX. En castellán de bellas zonas de Tergüel, un caxicar rezibe güei lo nombre de rebollar, pero bi ha toponimos documentatos como caxigar en la Edat Meya como Cerro del Caxigar en Olalla e atros que son güei cajigar como en Cosa, u o caso de Bal de Zebro on se documenta un Caxigar de Valdezebro d'o sieglo XV e güei bi ha una partita clamata Los Cajigares.
