Castor fiber

Castor fiber
Denominacions populars
Vebre, Vibre, Castor
Estato de conservación
Seguro (IUCN)
Clasificación scientifica
Dominio:	Eukaryota
Reino:	Animalia
Filo:	Chordata
Clase:	Mammalia
Orden:	Rodentia
Familia:	Castoridae
Chenero:	Castor
Especie:	C. fiber
Descripción
Castor fiber Linné, 1758
Destribución cheografica
Aria de distribución de Castor fiber.

O castor europeu (Castor fiber _{(Linné 1758)}), en bells textos meyevals aragoneses nombrato vibre u vebre, ye una especie de radedors d'a familia d'os Castoridae, a sola especie euroasiatica d'o chenero. Ya en a Edat Meya heba desapareixito d'Aragón pero encara se'n troba exemplars en a compleganza d'o Roine en Occitania y Arpitania.

Castor fiber apareixe en o Pleistocén inferior, estando-ne os restos més antigos en os Pireneus d'a glaciación de Mindel, continando present en o Riss y en o Wrum. A fins d'o Wrum y en part de l'Holocén ye quan més abundant ha estato en os Pireneus, en as dos versants. Plinio y Estrabón parlan de l'abundancia d'o vibre en Hispania, y de feito se n'han trobato restas de vibre en o chacimiento román de Bilbilis (Calatayú). O zaguer vibre peninsular conoixito ye de periodo román tardano y ye de Sant Pere de Gavà en a desembocadura d'o Llobregat.

Os vibres d'Europa Occidental estioro a cantos d'extinguir-se en os sieglos XIX y XX por un caza abusiva, y os zaguers que quedaban yeran en o sud de Noruega y en as compleganzas de l'Elba y o Roine. As mesuras de protección tenioron efecto y dende ixos reductos s'ha puesto reintrucir en atros puestos.

Zoonimia

En en o sieglo XV son denominatos vebres en os peaches de Zaragoza y Monzón. En atros textos meyevals como "Letra intimada" dicen vibre.

e assi mateix me dio con la dita espada un grand birrel de vibre, é alto forrado de erminios: é aqueste por esguart é honor del officio que tenia.

Manimenos en a traducción aragonesa d'o "Libro d'el Trasoro" dicen castor, que ye como en os peaches de Zaragoza y Daroca denominan a la secreción d'as glandulas odoriferas de l'animal y que se feban servir como perfume y medecina.

Castor es vna bestia q(ue) conu(er)sa enla ma(r) de pont e por esto es clamada ma(r) de ponto por q(ue) el es en algu(n)a cosa Resenbla(n)t a can sus cullon(e)s son muy calie(n)tes e p(ro)ueytosos en medicina por esto lo sigue(n) los caçador(e)s por au(er) sus cullon(e)s . Mas nat(ur)a q(ue) a todos muest(r)a las p(r)opriedades le faze sab(e)r la prop(r)ia causa por q(ue) el om(n)e lo caça q(ue) alla do el sabe q(ue) no(n) puede foyr el mjsmo talla sus cullon(e)s con sus dientes elo gita dauant del caçador e asi Redime su cue(r)po por aq(ue)lla p(ar)tida q(ue) mjllor es . e dela ora aua(n)t si el om(n)e lo caça do qujer q(ue) es visto el de[^s]cubre sus cullones e demuest(r)a alos caçador(e)s como el es desculla(n)ado

Pa diferenciar a esta especie d'a suya vicariant en Norteamerica en o luengache scientifico anyaden l'adchectivo "europeu" y "euroasiatico" a la denominación vernacla. D'esta traza en aragonés sería "vibre europeu" u "castor europeu".