Can (monarca)
De Biquipedia
- Iste articlo ye sobre un tetulo mongol. Ta d'atros usos se beiga Can (desambigazión).
Can ye un tetulo d'orichen turco preso por atros pueblos de las estepas como los mongols que sennifica sobirán masimo. En las luengas turquicas se posa dimpués de lo nombre.
A sobent se trascribe en las luengas ozidentals como khan porque ni en franzés ni en anglés esiste lo sonito d'a J castellana e lo trascriben como Kh. En aragonés meyebal este fonema no esistiba e s'adautaba como g, (garrofera), u como n'este caso como c, (como en catalán maco). En turco moderno d'Anatolia s'escribe s'escribe han.
Una de las primeras referenzias conoxitas de l'emplego d'este tetulo ye por los Rouran; tamién ye posible que los Xianbei lo fesen serbir enantes. En ixe tiempo lo tetulo se pronunziaba Jagan. Lo sonido g se fue enfeblindo dica esdebenir Jaan en mongol moderno. Los sobirans abaros e khazaros feban serbir lo tetulo de Jagan
En La Istoria Secreta de los Mongols diferenzian clarament jaghan de can: només que a Temüjin (Chenguis Can) e a los deszendients suyos los claman jaghan ("can de cans"), mientras que atros gobernants yeran tratatos con lo tetulo de can només
Can ye tamién un de los lumerosos tetulos emplegatos por los soldáns otomans, tamién por los sobirans de la Orda d'Oro e entidaz que en yeran continadoras. Entre los turcos selchuquins yera lo tetulo que feban serbir los cabos de tribu u clan, e yeran chusto de chos d'atabeg. Lo mesmo se desbeniba entre los manchúz (que lo pronunziaban han). Los reis de Silla, un antigo reino en l'autual Corea, feban serbir lo tetulo de Marib Can o "capeza de los reis". Por exemplo, lo rei Naemul yera dito Naemul Marib Can.
Los estatos gobernatos por un can se claman canatos.
