Campos d'urnas catalano-aragoneses

De Biquipedia

La Cultura d'os campos d'urnas s'espardió dende lo Lenguadoc dica Catalunya y la val d'Ebro en lo periodo final de la Edat de Bronce, pervivindo encara en la primera Edat de Fierro.

Cronolochía[editar | modificar o codigo]

La periodización d'os campos d'urnas que fació Martín Almagro Gorbea pa lo nord-este de la peninsula iberica ye:

Anyo antes Cristo
Periodo I: Campos d'urnas antigos1100 aC
Periodo II: Campos d'urnas antigos1000 aC
Periodo III: Campos d'urnas recients900 aC
Periodo IV: Campos d'urnas recients800 aC
Periodo V: Campos d'urnas de lo fierro u tardanos700 aC-600 aC
Periodo VI: Capos d'urnas de lo fierro u tardanos600 aC-500 aC

Por o que pareix os campos d'urnas antigos representan una difusión dende lo Lenguadoc, tradicionalment considerada como movimientos de población que levaban ixa cultura, y los campos d'urnas recients representan una evolución local d'os anteriors, sin guaire relación con lo que s'escaiciba ya a lo norte d'os Pireneus. Se considera que bel elemento común entre los campos d'urnas d'a Edat de Fierro y la cultura de Hallstatt d'Alemanya y Renania (Hallstatt D) s'explicarían por relacions comercials.

Campos d'urnas antigos periodo I[editar | modificar o codigo]

No ye representau en Aragón pero en a redolada de Barcelona corresponde a lo livel Can Missert I y en Lenguadoc a Prével.

Campos d'urnas antigos periodo II[editar | modificar o codigo]

En Barcelona ye representau por o livel Can Missert II y en Lenguadoc por Hasard I y Tafanel I-II A. As urnas de Can Missert II son d'o tipo Sassenay, que tamién se troba en Lenguadoc. Pareix que hi habió una expansión enta lo Segre y enta lo sud plegando dica Borriol (Castellón). Se considera d'este periodo la etapa inicial d'ocupación d'o cabezo de Monleón (Casp) en base a la suposición d'a presencia d'uns vaixiellos de cuerpo globular, cuello cilindrico y borde convexo.

Campos d'urnas recients[editar | modificar o codigo]

Representan una tercera fase d'lo Bronce final, y abarca dende lo 850 aC dica lo 700 aC.

En esta epoca perduran poblaus que ya existiban como lo de Monleón, pero en apareixen de nuevos. D'o sieglo IX a. ye la famosa estela de Luna, (Val Palmas).

Os poblaus de nueva planta como lo de Pompeya (Sant Per de Calanda) tienen casas de planta rectangular. A fase II d'o poblau de Palermo tien carreras nuevas, con casas de planta rectangular, bancas corridas y fogars con recipients de bardo pa mantener as brasas.

En o chacimiento d'Els Castellets de Mequinenza bi ha una sepultura circular colectiva, de tradición megalitica, que perteneixió a mes de 30 personas, con aixuvars de ceramica acanalada y brazalez de bronce.

O livel de Campos d'Urnas recients d'o chacimiento d'o Cabezo de Monleón correspon a lo periodo III d'esta cultura.

O chacimiento de Coll del Moro, lo livel Zaila I y lo livel I d'o chacimiento Roquizal de Rullo de Favara perteneixen a lo periodo IV d'os campos d'urnas recients.

Campos d'urnas tardanos[editar | modificar o codigo]

Son campos d'urnas d'a primera Edat de Fierro. Perteneixen a esta etapa cualques livels d'os poblaus de Roquizal del Rullo (Favara), Cabezo de Monleón (Casp) y Loma de Brunos (Casp) que ya existiban.

A introducción d'a metalurchia de fierro no ye uniforme. L'analís con carbonio 14 amuestra una antigüidat de 500 anyos pa la fase final d'ocupación (u albandono) d'a Loma de los Brunos, y 600-630 pa lo fondo de cabana y sepulcre de Gavín. En Loma de Los Brunos se veyen obchetos de fierro en as sepulturas.

O livel Zaila II de campos d'urnas tardanos, o chacimiento de La Salcediella, (Baixo Mayestrato), o de Vilaseca IIIB (Tarragona), y Agullana IV (Ampordán), y Taffanel III (Lenguadoc) corresponen con o periodo V, y talment tamién o d'a fase inicial de La Pedrera en o Segre-Cinca.

O chacimiento de Tossal Redó, Solivella I (Castellón), La Pedrera (Segre-Cinca), Vilaseca IV (Tarragona) Anseresa (Barcelona) Muralla NE (Ampordán), y Taffanel IV (Lenguadoc) corresponen con o periodo VI.

Miguel Beltrán Lloris indica una succesión de poblaus con voluntat cronolochica, dende lo sieglo VII aC:

Muitos d'estos asentamientos los albandonan de sopetón en lo sieglo VI aC, en muitos casos con sinyals d'incendios cheneralizaus. Ixo fa pensar en la presencia de chent enemiga d'identidat y procedencia desconoixida. Bi ha una coincidencia entre l'albandono d'estos poblaus y la formación d'a cultura iberica en comarcas vecinas de l'este.[1].

Economía[editar | modificar o codigo]

Yeran pueblos pa qui l'agricultura cerealista yera muit important y que ocupaban as tierras facilment cultivables de las riberas. En a Edat de Bronce final presuntos recient plegaus portadors d'a cultura d'os campos d'urnas ocupaban altarias inferiors a los 600 m, mientres que los portadors de culturas nativas, influyius u no por os campos d'urnas, s'establiban en las partes mes alteras, en especial en o Sistema Iberico teruelano.

Tecnolochía[editar | modificar o codigo]

Por o que se considera hue, prenioron a tecnolochía d'a metalurchia d'o fierro a traviés de contactos con griegos y fenicios y no por invasions de pueblos afins de l'atro costau d'os Pireneus.

Historia[editar | modificar o codigo]

A fin d'os campos d'urnas d'a primera Edat de Fierro la marca la iberización en a zona oriental y l'aparición d'a cultura protoceltiberica en a Meseta oriental y Sistema Iberico interior.

Adscripcions etnicas[editar | modificar o codigo]

A mitat de sieglo historiadors y arqueologos espanyols, con visions invasionistas tipicas d'a epoca consideroron que con la extensión d'os Campos d'urnas por a peninsula Iberica en diferents tandadas trayó pueblos indoeuropeus preceltas primero (ilirios), y celtas dimpués. Atros historiadors precisaban que los preceltas entroron con los campos d'urnas y los celtas con la cultura de Hallstatt. Pericot y Maluquer consideraban que la entrada d'os campos d'urnas por o costau catalán y d'o baixo Ebro y por o costau aquitano y guipuzcuano enta l'alto Ebro dixó aislada a una población nativa d'a Edat de Bronce en os Pireneus centrals que dimpués serían los bascons[2].

Hue s'ha visto que no ye posible diferenciar tan bien unas pocas tandadas d'invasors, y no consideran que hi habió una cultura de Hallstatt en a peninsula iberica, so que se charra de campos d'urnas d'a primera Edat de Fierro.

No se considera a los primers pueblos que trayoron los campos d'urnas ni como ilirios ni como celtas. Se considera que los ilirios son una branca indoeuropea que individualizó en los Balcans occidentals en a primera Edat de Fierro. S'interpreta que los portadors d'os primers campos d'urnas que entroron en la peninsula estioron indoeuropeus no diferenciaus en las brancas linguisticas actuals y que charrarían un antigo europeu, que mos ha dixau un lexico que Coromines baptizó como sorotaptico.

Se sabe que los antipasaus lingüisticos d'os basco-aquitanos tamién yeran portadors d'os campos d'urnas porque en os Pireneus navarros bi ha uns cromlechs con urnas, como lo que podemos veyer en o mont Orkulu en Irati.

Referencias[editar | modificar o codigo]

  1. (es) Guillermo Fatás Cabeza (coordinador): Los celtas en el valle medio del Ebro. C.A.I, 1989.
  2. (es) Juan Maluquer de Motes Nicolau y Lluís Pericot García: La humanidad prehistórica. Salvat, Alianza Editorial, 1969.

Bibliografía[editar | modificar o codigo]