Bosnians musulmans

De Biquipedia
Ir ta: navego, busca
Bosnians musulmans
BosniaksToday.svg
Mayorías de bosnios musulmans en verde
Población total
2,4 - 4,4 millons
Rechions con comunidatz importants
Flag of Bosnia and Herzegovina.svg Bosnia y Herzegovina
Flag of Serbia.svg Serbia
Flag of Montenegro.svg Montenegro
Idiomas
Serbocrovata
Pueblos relacionatos
Pueblos eslavos

Os bosnians musulmans son os habitants mayoritarios de Bosnia, y forman minorías en Herzegovina y l'antigo Sanchac de Novi Pazar (entre Montenegro y Serbia). Parlan una luenga eslava meridional, o serbocrovata y son musulmans.

Etnonimo[editar | editar código]

A mesma denominación d'a nacionalidat bosniana musulmana ye questionable. Bi ha musulmans de luenga serbocrovata tamién en Herzegovina, sobretot en as ciudatz d'a ribera d'o río Neretva. Os musulmans de luenga serbocrovata d'o Sanchac de Novi Pazar no han tenito guaire relación con os de Bosnia y Herzegovina, y os musulmans de luenga serbocrovata d'o Kosovo y Macedonia son serbios islamizatos que encara se consideran serbios. Tito introdució a denominación de musulmans pa esta nacionalidat que tampoco yera acertato de tot porque os albaneses que i heba en Yugoslavia son musulmans y porque a nacionalidat "musulmana" yera a que presentaba o mayor porcentache d'ateus.

Dende ambients anglosaxons s'ha cheneralizato a denominación de bosniacos, con o sufixo -aco present en muitos etnonimos.

Historia[editar | editar código]

Orichens[editar | editar código]

Bosnia XIV c.jpg

Os eslavos d'as montanyas entre o río Sava y la Mar Hadriana no teneban una organización politica tan estable como os eslavos de zonas més costeras (serbios, crovates) u os bulgaros. D'esta traza yeran baixo a influencia occidental d'os crovates y hongaros, catolicos y oriental d'os serbios, bulgaros u Bizancio, ortodoxos. En a primera mención de Bosnia por Costantín Porfirocheneta Bosnia ye descrita como un principato serbio, (s'ha d'aclarir que a tierra dita Bosnia orichinariament yera a cuenca d'o río Bosna, actual Bosnia Oriental).

En os sieglos XI e XII Bosnia estió primero baixo sobiranía bizantina, a traviés d'intermediarios crovates u serbios, dimpués fue adhibita a lo reino serbio de Raška, dimpués estió baixo dominio hongaro, dimpués tornó breument a dominio bizantín, y quan en 1180 morió Manuel I Comneno os bizantins perdioron o control de Bosnia, control que no recuperoron ni os crovates ni os hongaros, por o que Bosnia esdevinió una entidat politica independient por primera vegata. O estato de Bosnia existió de bella traza dende l'anyo 1180 dica 1463, a penar d'invasions d'os hongaros, que reclamaban este territorio. Os sobirans bosnians més prominents fuoron o Ban Kulin (1180-1204), o Ban Stjepan Kotromanic (1322-1353) y o rei Tvrtko I (1353-1391).[1]

En o sieglo XII amaneixió a Ilesia de Bosnia, considerata heretica tanto por os catolicos como por os ortodoxos y que prenió importancia en os sieglos XIII y XIV. Os seguidors d'esta ilesia son conoixitos como bogomils, y muitos historiadors la veyen como una extensión d'o bogomilismo que apareixió en Bulgaria. Os historiadors modernos posan en duda que a ilesia bosnia fuese bogomila.[1]

En o sieglo XIV s'imposó a dinastía d'os Kotromanic, Tvrtko I encomenzó una expansión territorial y s'anexionó Hum (Herzegovina) y part de Dalmacia. O principe Lazar de Serbia, que yera en guerra contra os otomans li cedió una part important d'o que huei ye Montenegro a cambeyo d'aduya melitar.[2] Tvrtko I se proclama en 1390 como "rei de Serbia, Bosnia, Croacia y Primirje" (o litoral). Quan en 1391 muere Tvrtko bi ha problemas por a sucesión.

Dominación Otomana[editar | editar código]

Ottomanbosnia.PNG

Dimpués d'a muerte de Tvrtko I en 1391 o suyo reino s'esminglanó. As zagueras decadas d'a Bosnia independient medieval fuoron decadas de guerra civil, intervencions d'os hongaros y principio d'a invasión otomana. Bosnia encomenzó a ser ocupata por os otomans y en 1436 os bosnians habioron de pagar-lis tributo. En 1448 os otomans ocuporon una parte important d'o centro de Bosnia, a redolata de Vhrbosna, (de dimpués esdevinió Sarajevo).[1] En 1465 tota Bosnia ya ye ocupata por os otomans, resistindo més tiempo o país de Hum. En Hum o voibot Stefan Vukcic se posó baixo a protección d'o Sacro Imperio y prene en 1448 o títol chermanico de duque (herzeg) de Santa Sava y d'esta traza Hum (a Chelmenia d'os "Anales de la Corona de Aragón") pasa a denominar-se Herzegovina. En 1482 Bosnia-Herzegovina s'adiben a lo Imperio Otomán.

Bosnia fue absorbita a escape por o Imperio Otomán y fue dibidita en Sanchacs (distritos administrativos y militars). En 1580 Bosnia y partz mugants de Croacia y Serbia adquirioron a categoría de Elayet, o provincia d'o Imperio, que conservó dica a fin d'o dominio otomán.[1]

Muita población se convierte a l'islam. Bi ha una teoría popular que explica a conversión de muitos bosnians a lo islam por que ixo permitiba a los bogomils de continar estando diferents tanto d'os catolicos como d'os ortodoxos. Manimenos s'ha de fer notar que os albaneses no heban estato bogomils y tamién se convirtioron mayoritariament, que bi ha testimonios de eslavos catolicos de Bosnia que se convirtioron a la relichión musulmana, y que una d'as zonas de Bosnia de mayor predominio musulmán (Bihac) yera una zona crovate y catolica. Ye més verosimil que a conversión a lo islam siga o deseyo d'os sinyors feudals bosnians de conservar os privilechios. Atros puntos de vista lo explican dende un punto de vista economicista: as ciudatz de Sarajevo y Mostar teneban muita presencia musulmana y yera imposible tener una buena vida social u un prestichio social u puyar socialment sin convertir-se a lo islam. Tamién podió influir o deseyo de no pagar o impuesto dito harach que heban de pagar os cristians.

Os otomans empentoron a repoblación d'o norte y l'ueste de l'actual Bosnia, y se fació sobretot con "vlacos"[1](s'ha d'aclarir que os otomans diciban vlacos a totz os nativos cristians de Bosnia y no especificament a los que charraban arrumán), que corresponden a la población ortodoxa y de luenga serbocrovate que huei ye mayoritaria en l'aria de Banja Luka.

Quan os austriacos reconquieren Croacia y Hongría a fins d'o sieglo XVII y XVIII Bosnia contina estando una parte d'o Imperio Otomán con gran importancia estratechica. En a guerra de 1683-1699 os austriacos reconquioron Hongría y Eslavonia y muitos musulmans en fuyoron y s'establioron en Bosnia. En 1697 o principe Euchenio de Savoya adrezó un chicot exercito enta Bosnia central, amenazó Sarajevo y se'n tornó t'Austria con muitos bosnians catolicos (que dende o punto de vista actual serían crovates).[1] Os austriacos conseguirán ocupar a ribera sur d'o Sava entre 1718 y 1739, y as mugas no cambearán dica 1918.

As crisis bosnianas[editar | editar código]

En o sieglo XIX os otomans preban d'introducir reformas que no intresan a la oligarquía feudal, que fomentan revueltas. Omer Pachá, un serbio de Croacia, restableix l'orden en 1850 y imposa una administración centralizata. En 1862 os cristians se sublevan y en 1875 esclata una revuelta campesina en Herzegovina que contina por Bosnia. Os serbios y montenegrins lo refirman. Se produce una crisi internacional que será enchaquia d'o congreso de Berlín de 1878, que deixará que o Imperio Austro-Hongaro ocupe y administre Bosnia-Herzegovina y prenga o control d'o Sanchac de Novi Pazar. En 1882 Bosnia queda baixo un gobernador civil, l'hongaro Kállay, que ocupa o puesto dica 1903.

A segunda crisi se produce dimpués d'o 5 d'octubre de 1908 quan o Gubierno austro-hongaro decide anexionar-se Bosnia-Herzegovina y tornar a los otomans o Sanchac de Novi Pazar. Rusia lo acepta (Enfeblita por una derrota en Manchuria y por una revolución), y Serbia lo reconoix en marzo de 1909.

Bosnia en o Imperio Austro-Hongaro y a primera Guerra Mundial[editar | editar código]

Bosnia-Herzegovina no s'une ni a Austria ni a Hongría y ye un condominio. Bi ha un prochecto de fer un Estato Serbocrovate dentro d'o Imperio Austro-Hongaro pero no se acabará posando en practica a ideya.

En Bosnia bi ha nacionalistas serbios que deseyan que Bosnia faiga part de Serbia. O 28 de chunio de 1914 l'archiduque Francisco Ferrando muere en un atentato en Sarajevo obra d'o nacionalista serbio bosnio Gavrilo Princip. Se demostró que l'atentato heba estato preparato en Belgrado por a sociedat secreta Man Negra dirichita por o cabo d'o servicio d'información d'o Estato mayor serbio. O Gubierno austrongaro adreza un ultimatum a Serbia que no acepta y conduce a la primera Guerra Mundial.

Bosnia en o periodo d'entreguerras[editar | editar código]

A fins de 1918 Bosnia-Herzegovina desapareix y ye adhibita a lo Reino d'os Serbios, Crovates y Eslovens. Mientres o gubierno d'o estato recientment costituito preneba o control de Bosnia-Herzegovina os bosnios musulmans cayoron victimas d'os voluntarios serbios que saqueyaban o territorio. Muitos musulmans se'n fuoron ta Turquía. Una vegata que l'orden yera establito en a propaganda nacionalista serbia os musulmans yeran presentatos como galvans, maltraballas y inutils y que lis caleba rehabilitación pa recuperar a identidat serbia. En a reforma agraria de 1919 expropioron a los propietarios musulmans. Os musulmans de totas as clases socials creyan un frente unito, a Organización Yugoslava, con seu en Sarajevo. En 1929 Bosnia-Herzegovina desapareixe como entidat administrativa y ye repartita en quatre banovinas con unas mugas que preban de deixar a los bosnians musulmans como minoritarios en cadaguna. Os musulmans no podeban influir sobre o gubierno, dominato por o centralismo serbio. Os musulmans optoron por o yugoslavismo, que lis ofreixeba un refuchio entre os nacionalismos serbio y crovate.

Bosnia en a segunda Guerra Mundial[editar | editar código]

En 1941 tota Bosnia-Herzegovina será adhibita a lo Estato Independient de Croacia, os bosnians musulmans serán consideratos crovates y posarán un vicepresident musulmán.

En 1941 os partisans de Tito son vencitos en as montanyas de Serbia y pasan a principios de 1942 a Bosnia. En Bihac fundan un Exercito nacional de liberación. Os alemans contraatacan y lis obliga a reblar y refuchiar-sen en Montenegro. En setiembre de 1943 os italians capetulan y Tito torna a entrar en Bosnia establindo un Comité de liberación en Jajce.

Entre 1942 e 1944 os ustaixas crovates mirarán d'eliminar a población serbia fendo mortaleras grans. En represalia os guerrillers serbios monarquicos (chetnics) feban mortaleras de musulmans en as zonas que controlaban. S'organizó una división d'as SS con bosnians musulmans que tamién mataban serbios. Bells musulmans bosnians s'organizaban en unidatz d'autodefensa, pero cada vegata més yugoslavos de totas as nacionalidatz veyeban que a sola salita yera unir-sen a los partisans.

Bosnia Herzegovina en a Yugoslavia de Tito[editar | editar código]

En 1946 o rechimen de Tito instituyó a Republica Socialista de Bosnia y Herzegovina pa evitar enfrentamientos entre Serbios y Crovates. Bi ha un esfuerzo d'industrialización pero Bosnia-Herzegovina contina estando una zona pobre. En aviento de 1990 bi ha eslecions libres y o 84 % d'os escanyos se reparten entre partitos representants d'as nacionalidatz: musulmans 36 %, serbios 30 % y crovates 18 %.

A guerra d'independencia de Bosnia Herzegovina[editar | editar código]

Gnome-searchtool.svg
Ta más detalles, veyer l'articlo Guerra d'independencia de Bosnia-Herzegovinaveyer os articlos [[{{{2}}}]] y [[{{{3}}}]]veyer os articlos [[{{{4}}}]], [[{{{5}}}]] y [[{{{6}}}]]veyer os articlos [[{{{7}}}]], [[{{{8}}}]], [[{{{9}}}]] y [[{{{10}}}]].

Quan o principio d'a guerra d'independencia crovate bi ha tensión en a Republica Socialista de Bosnia y Herzegovina, os musulmans y crovates deseyan a independencia y os serbios s'oposan a esta independencia. Se contempla a ideya d'a partición de Bosnia en tres partz, ideya a la que se oposan os musulmans.

En marzo de 1992 bi ha un referendum boicoteyato por os serbios que proclama a independencia d'a Republica de Bosnia y Herzegovina y poco dimpués se forma a Republica Serbia de Bosnia y Herzegovina que encomienza a guerra prenendo o control d'as zonas de mayoría serbia y atacando zonas con muita población serbia como Sarajevo (a ciudat ye de mayoría musulmana pero os lugars d'a redolata no), Posavina (de mayoría crovata pero necesaria pa dar continuidat territorial a los serbios), y ciudatz grans de Bosnia Oriental de mayoría musulmana. En l'aria de Bosnia Oriental a man d'a muga os musulmans no controlan que bells enclaus como Gorazde, Srebenica, Zepa, etc... A lo principio os crovates luitaban contra os serbios chunto con os musulmans y prenen o control d'Herzegovina occidental y muitas localidatz de Bosnia Central de mayoría crovata u de mayoría musulmana como Kiseljak. Os refuchiatos musulmans d'atras zonas fan que aumente o porcentache de población musulmana en puestos como Mostar.

O 22 de mayo de 1992 a Onu reconoix a independencia d'a Republica de Bosnia y Herzegovina, pero en ixos días os serbios y crovates negocian en secreto a partición de Bosnia. Mientres os musulmans, que no s'heban preparato pa a guerra, no pueden recuperar as zonas que pierden y tienden a reblar, os crovates mantienen as suyas posicions y funcionan d'una traza cada vegata més autonoma con respecto a lo gubierno bosnio, y plegan a fer treguas con os serbios.

En otoño de 1992 se producen os primers enfrentamientos greus entre musulmans y crovates. En octubre de 1992 Bosanski Brod caye en poder d'os serbios, que tienen ya asegurato o corredor entre Banja Luka y Bosnia oriental. Tamién en octubre de 1992 Jajce caye en mans d'os serbios dimpués de combates entre crovates y musulmans bosnians por o control de Bosnia Central.[3]

En chinero de 1993 o plan Vance-Owen proposa a división de Bosnia-Herzegovina en 10 provincias autonomas, 3 de musulmanas (Bihac, Zenica y Tuzla), 3 de crovatas (Mostar, Kupres y Posavina) y 3 de serbias (Bosnia Occidental, Bijeijna y Herzegovina oriental) y una común (Sarajevo). Os serbios no aceptan y a guerra contina. Tamién en chinero de 1993 bi ha violentos combates entre crovates de Bosnia-Herzegovina y tropas musulmanas.[3]

Se suceden plans de paz que no se aceptan y altos o fuego que no se respetan. A Unión Europea se mostró un intermediario ineficient y iba estando sustituita por Estatos Unitos. O principal d'a guerra yera o enfrentamiento de crovates y musulmans en Bosnia central. A guerra yera perén en Gornji Vakuf. En chunio de 1993 bi ha una ofensiva bosniana musulmana en Travnik contra os crovates,[3] os crovates pierden a ciudat y se refuchian en territorio ocupato por os serbios. O 28 d'agosto de 1993 s'estableix oficialment a Republica Crovata de Herzeg-Bosnia. En octubre de 1993 bi ha atra ofensiva musulmana en Vares en a que os crovates fuyen d'a ciudat perdita.[4] Os serbios, que ya teneban lo que quereban se limitaban a ir ocupando as ciudatz que resistiban aislatas en Bosnia Oriental u a abanzar por Bosnia Central aproveitando que i luitaban os crovates y musulmans.

Os musulmans yeran més lumerosos y poquet a poquet prenioron o control de muitas localidatz de Bosnia central. En Bosnia central os serbios y crobates yeran aligatos pero en Herzegovina os serbios yeran aligatos d'os musulmans. En Bihac os musulmans locals s'heban declarato autonomos d'os musulmans de Sarajevo, teneban o refirme d'os serbios y encomenzó una guerra en a que as autoridatz de Sarajevo forachitoron a los musulmans autonomistas.

Estatos Unitos y a Unión Europea replanteyoron a qüestión con o prochecto de formación d'una federación crovata-musulmana y forzoron que os crovates y musulmans continasen chuntos, (encara que a guerra entre os dos bandos tardó en aturar-se). Con os dos bandos chuntos i habió primero unos abances en Bosnia Oriental a man de Tuzla y en Bosnia central prenendo a ciudat de Kupres.

Os serbios prenioron Srebenica y facioron una gran mortalera, (més rapida y gran que as atras que heban feito en atras ciudatz de Bosnia Oriental). Por ixos mesmos tiempos o exercito crovate de Bosnia aduyato por o exercito crovate abanzoron por Bosnia Occidental a man d'a muga pa aislar a capital de Krayina Knin.

En verano de 1995 a guerra cambeó de tot. Os crovates heban recuperato Krayina y os musulmans de Bihac ya no yeran rodeyatos de serbios y podioron abanzar enta l'este. Un nuevo atentato en Sarajevo estió enchaquia pa que a Otan bombardeyase as posicions serbias arredol de Sarajevo. Os crovates de Bosnia central abanzaban por a meseta de Kupres y recuperoron Jajce. Os musulmans de Bosnia centtal tamién abanzoron enta l'ueste y ocuporon enclaus serbios que i heba en a mesma Bosnia central. Os serbios de l'aria de Banja Luka reaccionoron con més expulsions y mortaleras.

Estatos Unitos forzó que o 21 de noviembre de 1995 se firmase a paz de Dayton, que divide o estato Bosnio en dos entidatz pseudoestatals: a Federación Crovata-musulmana y a Republica Serbobosnia.

Referencias[editar | editar código]

  1. 1,0 1,1 1,2 1,3 1,4 1,5 History of Bosnia-Herzegovina. Articlo tetulato Balcan States en a edición de l'año 2007 d'a Enciclopedia Britannica
  2. Enciclopedia Britanica. 1990
  3. 3,0 3,1 3,2 Carlos Taibo José Carlos Lechado Los conflictos yugoslavos: una introducción. Editorial Fundamentos 1993
  4. Carlos Taibo José Carlos Lechado Los conflictos yugoslavos: una introducción. Editorial Fundamentos 1993

Bibliografía[editar | editar código]

  • History of Bosnia-Herzegovina. Articlo tetulato Balcan States en a edición de l'anyo 2007 d'a Enciclopedia Britannica