Belarrusos

De Biquipedia
Ir ta: navego, busca
Belarrusos
Rechions con comunidatz importants
Flag of Belarus.svg Belarrusia
Idiomas
Belarruso
Relichión
Cristiana Ortodoxa
Pueblos relacionatos
Pueblos eslavos

Os belarrusos son os habitants mayoritarios de Belarrusia y tamién habitan como minoría en Rusia, (en a rechión de Smolensk viven os krivichi u jriviche, consideratos Belarrusos), y Polonia. Parlan una luenga eslava oriental, o belarruso y son de relichión cristiana ortodoxa.

Luenga[editar | editar código]

Gnome-searchtool.svg
Ta más detalles, veyer l'articlo idioma belarrusoveyer os articlos [[{{{2}}}]] y [[{{{3}}}]]veyer os articlos [[{{{4}}}]], [[{{{5}}}]] y [[{{{6}}}]]veyer os articlos [[{{{7}}}]], [[{{{8}}}]], [[{{{9}}}]] y [[{{{10}}}]].

O belarruso ye una luenga eslava oriental. En muitos caracters ye intermedio entre o ruso y o polaco. Os textos més antigos en luenga eslava con rasgos belarrusos son d'o sieglo XIII. A fins s'o sieglo XV o belarruso ya heba sustituito a lo latín como luenga escrita d'o Gran Ducato de Lituania. Os textos més importants son os codigos churidicos (estatutos lituans) de 1529, 1566 y 1588, amés de traduccions y prefacios d'a Biblia de Francis Skaryna. Manimenos en 1696 o parlamento polaco prenió a decisión de fer d'o polaco a unica luenga oficial en tota a Unión Polaco-Lituana y o belarruso cayó en desuso como luenga escrita.

O renaiximiento d'a luenga belarrusa se produció a principios d'o sieglo XIX como resultato d'investigacions folkloricas en tierras d'a Unión Polaco-Lituana absorbitas por o Imperio Ruso, investigacions que quereban demostrar a identidat rusa u polaca d'a población local. L'acumulación d'ixos datos etnograficos, folkloricos y linguisticos conducioron a la conclusión que os belarrusos son un pueblo eslavo diferenciato.

Con a publicación d'os periodicos Nasha Dola y Nasha Niva dende 1905 y l'aparición d'os primers escritors destacatos Kupalas, Kolas y Ahdanovich, se fixó una luenga standard. En a primera guerra mundial os ocupants alemans permitioron l'uso d'esta luenga y que s'ubrisen escuelas belarrusas. Dende 1918 amaneixioron dos normas, a d'os bielorrusos de Polonia que teneban como centro intelectural Vilna y a d'os belarrusos d'a URSS, (con a gramatica de Taraxkyevich u Taraxkevitsa como standard). O belarruso sovietico desembolicó un os anyos 20 una terminolochía d'administración, de fuerzas armatas y sciencias, pero en a decada de 1930 Stalin esclafó con una fura represión a vida intelectual belarrusa, ordenó una reforma ortografica en 1933 y unos cambeyos gramaticals enfilatos a amanar a luenga escrita a lo ruso. Os alemans permitioron periodicos en belarruso y escuelas en belarruso, pero os profesors yeran obchecto de represalias por parte d'os partisans.

Dimpués d'a segunda guerra mundial cada vegata i heba menos escuelas que fesen servir o belarruso. As autoridatz sovieticas ixemenaban a ideya que o belarruso yera dialecto rechional inferior y que a luenga d'alta cultura yera o ruso, muita chent deixó de charrar belarruso. Amés, charrar belarruso representaba o periglo d'estar acusato de nacionalista burgués. Manimenos dende os anyos setanta bells intelectuals han encomenzato a defender o belarruso y bi ha una nueva cheneración d'escritors.

O belarruso yera a sola luenga oficial d'a Belarus d'os primers anyos d'independencia, encara que i heba presions pa fer d'o ruso una segunda luenga oficial. O dictador postsovietico de Belarrusia yera pro-ruso y yera en contra d'o belarruso.

O belarruso s'escribe en alfabeto cirilico con dos normas, una anterior a 1933 (entre os emigratos y entre bells chóvens de Belarrusia) y posterior a 1933. Tamién existe un sistema alfabetico con caracters latinos, y os tartres de Belarrusia fan servir a grafía arabe.

Relichión[editar | editar código]

Os belarrusos gosan estar cristians ortodoxos, y a ilesia ortodoxa de Belarrusia ye administrata por o patriarcato de Moscú. Bi ha una ilesia ortodoxa autocefala en a diaspora.

Os belarrusos ortodoxos yeran clasificatos como rusos y os belarrusos catolicos como polacos. A hierarquía catolica polaca administra a Ilesia Catolica de Belarrusia y no li fa goyo de considerar que i haiga belarrusos catolicos, manimenos os habitants de Belarrusia que alegan estar polacos son unos 300.000 mientres que os catolicos plegan a los 2.000.000.

Bells belarrusos han encomenzato a recuperar a Ilesia Greco-Catolica u Uniata dende fa pocos anyos. En a decada de 1990 encara no bi ha una traducción completa y consensuata d'a Biblia en belarruso.

Bi ha comunidatz de viellos creyents en bellas zonas de Belarrusia, a més grant en Vyetka, a man de Homyel, en 1913 yeran 98.000 individuos, y muitos d'ellos se consideran de nacionalidat belarrusa.

Bi ha supervivencias de celebracions y costumbres paganas d'o politeísmo eslavo en o medio rural: como o kupally u solsticio de verano y Dzyady, cerimonia ritual con platos especials en recuerdo d'os antipasaus, o día d'os difuntos.

Historia[editar | editar código]

O estato de Kiev esclata en o sieglo XII en unos quantos principatos sozmesos por os mongols en 1239. Os sobirans lituans consiguen refusar a los mongols y liberar a los eslavos orientals de Belarrusia d'o poder mongol. Os principes eslavos orientals prefieren estar en a subchección d'os lituans que en a d'os mongols, y os eslavos orientals s'asocian con o pueblo lituán primero, y tamién con o pueblo polaco dende 1386 formando a Unión Polaco-Lituana.

Os rutens en a Unión polaco-lituana[editar | editar código]

A unión Polaco-Lituana estió en luita contra os teutons (vencitos en 1410), os tartres u os turcos. Os eslavos orientals que quedan dentro d'a Unión Polaco-Lituana son denominatos rutens y son os antipasaus d'os actuals belarrusos y ucraineses. Os rutens charran una luenga encara a man d'o protoeslavo y que ye oficial en o Ducato de Lituania dica 1696. Dende o sieglo XVI una parte d'a nobleza rutena prene a luenga polaca y se convierte a lo catolicismo u a lo calvinismo.

Os belarrusos actuals representan os rutens que yeran més en contacto con os lituans y os ucraineses os rutens que yeran més en contacto con os polacos, sobretot quan poco enantes d'a Unión de Lublin (1569) os rutens d'o sud pasoron a depender de Polonia, quedando os rutens d'o norte en Lituania dentro d'a Republica d'as Dos Nacions. Os rutens de Smolensk quedoron pronto baixo a sobiranía d'o Imperio Ruso y son consideratos por beluns como belarrusos.

En 1596 se celebra o Sinodo de Brest en o que una asambleya de rutens fidels y clerigos d'a relichión ortodoxa restablix a comunión con Roma conservando o rito bizantín, con o que naixe a Ilesia Uniata, que no conseguirá aplegar a totz os rutens, car muitos preferirán seguir estando en a subchección d'un metropolitán de Kiev independient de Roma.

Os repartos de Polonia[editar | editar código]

En os repartos d'a Republica d'as Dos Nacions, os territorios habitatos por rutens d'o norte esdevienen part d'o Imperio Ruso principalment en tres etapas:

En o Imperio Ruso os territorios belarrusos son denominatos Rusia Occidental, y a Ilesia Greco-Catolica queda ligata autoritariament y por a fuerza a la Ilesia ortodoxa en 1839.

Os etnografos por ixe tiempo investigaban as tradicions d'os belarrusos.

Bielorrusia disputata entre Lituania, Polonia y a URSS[editar | editar código]

Gnome-searchtool.svg
Ta más detalles, veyer l'articlo Guerra polaco-sovieticaveyer os articlos [[{{{2}}}]] y [[{{{3}}}]]veyer os articlos [[{{{4}}}]], [[{{{5}}}]] y [[{{{6}}}]]veyer os articlos [[{{{7}}}]], [[{{{8}}}]], [[{{{9}}}]] y [[{{{10}}}]].

Quan dimpués d'a Revolución d'Octubre as potencias centrals ocupan amplos territorios en o frent oriental, negocian con o nuevo gobierno ucranián y reconoixen un Estato lituán a lo que conceden Grodno, Bialystok y Brest-Litovsk. Manimenos o 25 de marzo de 1918 se problamó a republica nacional de Belarrusia sin garra eco. Os polacos dende 1919 preboron de recuperar as mugas de 1772, extendendo a sobiranía polaca por os países rutens que enantes yeran d'a Unión Polaco-Lituana u d'a Republica d'as Dos Nacions. O exercito polaco topetó cn o Exercito Royo y lo fació reblar, encomenzando a guerra polaco-sovietica. A guerra polaco-sovietica conduce en 1920 a que o territorio d'os Belarrusos quede dividito en dos entre Polonia y a URSS por una muga a l'este de Minsk, ratificata por o tractato de Riga o 18 de marzo de 1921. Os belarrusos serán a mayor part d'a población d'as rechions de Volinia y Vilna en a Polonia independient.

Periodo d'entreguerras[editar | editar código]

O renaiximiento cultural belarruso se produce en a decada de 1920 en o costato sovietico d'a muga. A Republica Socialista Sovietica de Belarrusia, establita o 1 de chinero de 1919 arredol de Minsk y Bobruisk será una republica costitutiba d'a URSS o 30 d'aviento de 1922 con Rusia, Ucraína y Trascaucasia. Entre 1924 y 1926 s'exampla con Polotsk, Vitevsk, Moguilov y Gomel. Queda una muga fixata entre Rusia y Belarrusia corresponde a la muga entre Rusia y Polonia enantes de 1772. A luenga belarrusa encomienza a ser normalizata y s'esviella socialment. Se prene como modelo una d'as parlas locals tradicionals pa esdevenir luenga oficial y muitos belarrusos la han d'aprender en a escuela. Por un tiempo se fa oficial a luenga belarrusa y se creya una elite intelectual belarrusa, pero o Stalinismo reprimirá estas expresions y diezmará a clase intelectual.

Belarrusia dende 1939 dica 1991[editar | editar código]

O Pacto chermano-sovietico de 1939 permite a los sovieticos ocupar a metat occidental de Belarrusia, baixo poder polaco y que l'anterior Polonia quede dividita entre o III Reich y a URSS. Bielorrusia se reunifica,con o paso d'as rechions de Vilna y Volinia t'a RSS de Belarrusia. O exercito royo fa limpiezas etnicas de población polaca y muitos polacos son deportatos ta Kazakistán. En 1941 os alemans atacan a la Unión Sovietica y ocupan Belarrusia. S'organiza una resistencia partisana que se mantién dica a contraofensiva sovietica de 1944. En as selvas bi ha una resistencia de partisans que son hostils a la ideya d'una identidat belarrusa, y matan a los mayestros que amuestran a luenga belarrusa. Os Einsatzgruppen eliminan a población chodiga en a retaguardia d'as linias alemanas. En 1944 o exercito royo recupera Belarrusia.

En 1945 se creya una nueva muga con Polonia basata en a linia Curzon, considerata dende 1919 como muga etnica, encara que no lo veigan asinas os polacos. A Bielorrusia d'a postguerra teneba un menisterio d'Afers Esteriors teoricament diferent d'a URSS, y Bielorrusia fa part o mesmo que Ucraína d'os fundadors d'a ONU, pero o país dependeba en realidat d'a URSS de tot. A presión politica y cultural rusa ye muito fuerte, y por eixemplo a meyatos d'a decada de 1980 no i heba garra escuela en Minsk que amostrase Bielorruso. A fins d'esta decada amanixió o Frent Popular Belarruso. Belarrusia estió o país més perchudicato por a esferra nucleyar de Chernobil de 1986.

Belarrusia independient[editar | editar código]

A independencia de Bielorrusia ye més resultato d'as circustancias que d'a voluntat nacional d'un pueblo que deseye a independencia. Lo que quereban més os bielorrusos yera una renovación politica d'a unión de republicas, un cambeyo politico con fin d'a hechemonía politica d'o Partito Comunista, unas esleccions libres y reparacions por a esferra de Chernobil. A independencia de Belarrusia plega por as circustancias, quan diferents republicas socialistas sovieticas van declarando a independencia y se descompone a URSS.

O golpe militar d'agosto de 1991 en Rusia significó a fin d'a URSS, y o 8 d'aviento de 1991 os presidents de Rusia, Bielorrusia y Ucraína (as republicas eslavas), firmoron a fin d'a URSS y a formación d'a CEI (Comunidat d'Estatos Independients). Dende ixe inte Belarrusia ha tenito buenas relacions con Rusia.

En setiembre de 1991 a republica prenió o nombre de Belarus en cuenta de Belorosija. Staniskav Chchkevitch esdevinió chefe d'Estato de facto, pero fue destituito y reemplazato en chinero de 1994 por Mietchislav Grib.

Bibliografía[editar | editar código]