Arziagne

De Biquipedia

L'arziagne yera lo diacon prenzipal d'una Seu. La etimolochía d'arziagne s'esplica á partir de lo grieco άρχι lo primero e διάκονος serbidor, menistro, pasando á lo latín ARCHIDIACONUS.

L'arziagne yera tioricament lo primer de los diacons, en l'orden cherarquico ocupaba lo estamento chusto baxo lo bispe, dreitament á las suyas ordens, en l'almenistrazión de la diozesis, por ixo yera debant lo capítol como cabo de los ausiliars d'este.

Güei estos debers los asinnan á un bicario cheneral, fegura que fue sustituindo á l'arzediagne de traza progresiba á partir de lo sieglo XVI.

En la Comunión Anglicana se sigue mantenendo la nomenclatura de arzediagne pa los ausiliars de lo bispe (archdeacon).

[editar] Arziagnes en diozesis aragonesas

Yera á l'arziagne á qui competeba la presentazión de los ordinandos á lo bispe e qui teneba churisdizión e dreito de bisita sobre lo clero de la demarcazión eclesiastica clamata arzedianato; por esta razón gosaban estar-ne uns cuantos los de cada capítol de seu: en Uesca, los de Sobrarbe, Sarrablo, Las Balles e Santa Engracia de Zaragoza (enantes clamato prior de Santas Masas); en Chaca, los de Laurés, Ansó y Guarga; en Zaragoza, los de Zaragoza, Daroca, Belchit e Tergüel; en Tarazona, los de Tarazona e Calatayú; y en Roda, los de Benás e Ribagorza; en Albarracín no i eba que un arzedián. En Uesca e Chaca l'arziagne de la Cambra teneba churisdizión sobre un territorio común á las dos seus, l'arzedianato de la Cambra, que con las suyas rendas proveyeba las nezesidaz de bestuario de los canonches de las dos. Esta mesma funzión competeba á lo cambrero (CAMERARIUS en latín) de Zaragoza, Roda e Tarazona.