Alum

De Biquipedia
Ir ta: navego, busca
Cristals d'Alum (KAl(SO4)2·12H2O).

L'alum[1][2] u alumbre ye un sulfato doble d'un catión trivalent con atro de monovalent que puet cristalizar fendo octaedros regulars. L'alum mes común ye sulfato doble d'aluminio y potasio y tien muitas aplicacions.

Lo fan servir como astrinchent y caustico en medicina, lo fan servir los barbers pa favorir la cicatrización d'os tallos. En as tintorerías lo fan servir como mordient, pa que as colors sigan perens en os teixius. Tamién se fa servir pa aclarir as auguas burencas.

En a Edat Meya bi heba muita requesta d'Alum en a industria textil. A primers d'a Edat Meya l'alum proveniba de Focea y Quíos, a zaguers d'a Edat Meya ya s'espleitaba en Tolfa, Bochía y sudeste d'a Peninsula Iberica.[3]

Chacimientos en Aragón[editar | editar código]

En Aragón os chacimientos d'alum corresponden en a mes gran part d'os casos a kailinita (alum potasico), y en a mes chica part a tschermichita (alum amonico).[4]

En o sieglo XVIII s'espleitaba alum en Alloza, Arinyo, Gargallo y Estercuel como mos indica Asso,[5] en puestos a on pasaban augua a traviés de lignitos y archilas d'a formación arenas d'Utriellas[4] pa disolver-lo y dimpués concentrar-lo. A zaguera explotación duró principios d'o sieglo XX en Arinyo.[6]

Asso describe como lo estrayeban y como lo deixaban cristalizar en lacos.

En este caso lo dexan cristalizar en unos noques revestidos de piedra, que llaman lacos: pero si el caldo se destina para alumbre, lo pasan à otro noque,...

Mencions en fuents aragonesas[editar | editar código]

En as actas d'o proceso de Cortz d'Alcanyiz de 1436 que regulan os peaches se documenta l'uso d'a parola alum:

Ytem de roua de pegunta, vn dinero / Ytem de roua de alum de roca, quatro dines mialla.

Tamién s'escribe "alum de roca" en aragonés medieval en textos comercials de primers d'o sieglo XV en Uesca:

Alum de arocha ha en la rova el peso e la aluda segunt que dito es al gingebre,[7]

Se nombra l'alum en textos comercials d'o sieglo XV escritos en Zaragoza en un luengache mixto aragonés y catalán seguntes o parrafo u linia on s'indican productos que os comerciants d'a Corona de Castiella compraban en Zaragoza:

Item, de Johan Bitoria VII fustanis lonbarts, IIII fustanis de Pavia, III docenas de lacha, LI libra d'alum,

Manimenos tamién se puet leyer alumbre en atra clase de textos:

Et el aranbre et el fierro et el plomo et el stanyo et las piedras preçiosas et el coral et el alumbre et otras cosas semblantes las quales son uistas et coneçidas[8]

Referencias[editar | editar código]

  1. (es) José Antonio Saura Rami: Elementos de fonética y morfosintaxis benasquesas. Gara d'Edizions, Institución Fernando el Católico, 2003.
  2. (es) Mariano Laborda Recuerdos de Híjar 2. Editato por lo Centro de Iniciativas Turísticas del Cuadro Artístico de Híjar, 1993.
  3. (es) Jose-Ramón Julià: Atlas de Historia Universal. Tomo I: De los orígenes a las crisis del siglo XVIII. Editorial Planeta. p 226.
  4. 4,0 4,1 Josefina Besteiro, Miguel Calvo, Andrés Pocoví, Emilia Sevillano: Minerales de Aragón. Mira Editores S.A, 1988. pp 85-86
  5. (es) Ignacio Jordán Claudio de Asso y del Río: Historia de la Economía Política de Aragón Editorial MAXTOR, 2010
  6. (es) Luis Miguel Bajén García, Fernando Gabarrús Alquézar: Memoria de los hombres-libro. Guía de la Cultura Popular del Río Martín. Biella Nuei Sociedad Cooperativa, 2002. p 72
  7. (es) María Isabel Falcón Pérez: Comercio y comerciantes en Huesca a principios del siglo XV Aragón en la Edad Media, ISSN 0213-2486, Nº 9, 1991 , pp. 243-268 [1]
  8. (an) Secreto Secretorum

Bibliografía[editar | editar código]