Adicción

De Biquipedia
Ir ta: navego, busca
Icono d'aviso medico
Advertencia: Biquipedia no ye un consultorio medico.
Si creye que aprecisa d'aduya, por favor consulte con un profesional d'a salut.
Articlo d'os 1000
Botella d'heroína, una droga que puet causar adicción a escape.

O termin adicción ye emplegato en quantos contextos ta describir una inclinación, una obsesión, una obligación u una dependencia fisica u psicolochica excesiva. Bells eixemplos d'adicción pueden estar l'adicción a las drogas (drogadicción), a los vidiochuegos, a lo chuego (ludopatía), a lo tabaco (tabaquismo), a l'alcohol (alcoholismo), a l'ordinador, a la pornografía, a minchar, entre d'atros.

En terminolochía medica, una adicción ye un estato en que o cuerpo pende d'una substancia ta funcionar normalment, y desembolica una dependencia fisica a ista, como en o caso d'a drogadicción. Quan a droga u a substancia de qué bell un pende se li retira, ixo causa en o malauto un sindrome d'abstinencia, que presenta un conchunto caracteristico de sintomas. En o campo d'a Psicolochía, una adicción no ye asociata necesariament con l'uso abusivo d'una substancia, ya que ista forma d'adicción se puet chenerar encluso seguindo a medicación d'un tractamiento medico convencional, prescrito por un medico.

A OMS, por eixemplo, ha emplegato los termins "habituación", "farmacodependencia", "uso perchudicioso" y atros ta referir-se a l'uso de substancias, cosa que reflecta la discusión en o interior d'os diversos comités que s'han formato ta descutir o tema.

En l'actualidat esiste un cierto consenso, no de tot aceptato, que distingue a lo menos dos fenomens relacionatos con l'uso de substancias psicoactivas: adicción y dependencia. Istos dos fenomens son de tot diferenciables tanto en a clinica como en a neurobiolochía, conducta y tractamiento. Manimenos, os dos grans manuals de consenso arredol d'os trastornos psiquiatricos (o DSM IV de l'American Psychiatric Association, y a CIE-10, d'a OMS) presentan una mezcla d'os suyos signos caracteristicos.

Orichinalment, adicto yera qui seguiba ciegament a lo lider, sin de creticar nian tartir (en latín a-dicti: no dicción). Dimpués se dició addictus a un esclavo por deudas. D'aquí viene addictio: adchudicación, cesión a lo millor postor, consagración, dedicación.

Manimenos, l'uso común d'o termin adicción ha enamplato lo suyo campo semantico a la dependencia psicolochica. En iste contexto, se fa servir o termin en a drogadicción y os problemas d'abuso de substancias, pero tamién se refiere a los comportamientos que no se reconoixen por un regular como problemas d'adicción, como l'adicción a minchar, a lo chuego u a los ordinadors. En iste tipo d'acepción, o termin denota o comportamiento compulsivo d'un individuo en realizar bella actividat especifica, a tamas d'as conseqüencias perchudiciosas que pueda tener ta la suya salut, o suyo estato mental u a suya vida social.

Vinclos externos[editar | editar código]