Corylus
De Biquipedia
| Corylus | ||||||||||||||
|---|---|---|---|---|---|---|---|---|---|---|---|---|---|---|
 Corylus avellana |
||||||||||||||
| Clasificazión zentifica | ||||||||||||||
|
As abellaneras (zentificament, o chenero Corylus) son un chenero d'árbols de fuella caduca en a familia Betulaceae, anque cualques autors el deseparan en chunto con Carpinus e Ostrya en una altra familia, dita Corylaceae. O chenero conta con á redol de 10 espezies descritas e destribuitas á redol en as latituz temperatas de l'hemisferio norte.
As fuellas suyas son simplas, de laderas aserratas doblement (ixo ye, que sobre cada "dient" se i forman altras més chicononas). As flors naixen d'antes que no las fuellas, con destribuzión monoica (ixo ye, que un solo árbol en tiene d'os dos sexos) anque forman amentos deseparatos, cadagún con flors en esclusiba d'un d'os sexos. Os amentos masculins penchan 5 u 10 cm en as brancas, con una carateristica color blanca amarellisca, e os amentos femenins son muit chicoz, cuasi que ocultos en as chemas d'a branca, d'á on que ne demanarán as abellanas, e n'amaneixen ta fora d'ixa estrutura só que os estilos de color royisca u rusienca.
As abellanas son o fruito d'estes árbols, son nuculas d'entre 1 e 2,5 cm de lonchitut, e 1 u 2 cm de diametro. Como tamién pasa en os carpins (chenero Carpinus), a forma de l'imbolucro de bracteyas que acompanian l'abellana fan a diferenzia que, posatas en comparanza, permite que se clasefiquen as espezies d'este chenero.
As dos espezies millor apreziatas en agricultura, en dintro d'este chenero, son l'abellanera d'Europa ozidental (Corylus avellana) que pocas begatas gosa pasar d'un port arbustibo gran, e l'abellanera turca (Corylus colurna) que en comparanza se gosa manifestar coma árbol de grans dimensions (se n'han puesto descrebir eixemplars que feban dica 35 metros d'altaria). As abellaneras bordes en o Perineu fan parte d'a bechetazión tepica en as marguins d'os campos, e tamién en os sotos d'os ríos, las menos de begatas feitos creixer coma campet caultibato de forma intenzional.
[editar] Enrastres esternos
Biquiespezies tien un articlo sobre Corylus.
Se beigan as imachens de Commons sobre Corylus.
